ନୂଆଦିଲ୍ଲୀ,୧୫।୪: ୨୦୨୪ ଲୋକ ସଭା ନିର୍ବାଚନ ପାଇଁ ପ୍ରଚାରରେ ନିୟୋଜିତ ନେତାମାନେ ଏବେ ରାଲି ଉପେର ରାଲି କରୁଛନ୍ତି। ଷ୍ଟାର ପ୍ରଚାରକମାନେ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଯିବା ପାଇଁ ହେଲିକପ୍ଟର ବ୍ୟବହାର କରୁଛନ୍ତି। କଂଗ୍ରେସ ନେତା ରାହୁଲ ଗାନ୍ଧୀ ମଧ୍ୟ ହେଲିକପ୍ଟରରେ ନିର୍ବାଚନ ପ୍ରଚାର ପାଇଁ ଯାଇଥିଲେ କିନ୍ତୁ ତାମିଲନାଡୁର ନୀଳଗିରିରେ ନିର୍ବାଚନ ଆୟୋଗର ଫ୍ଲାଇଙ୍ଗ ସ୍କ୍ବାଡ ତାଙ୍କ ହେଲିକପ୍ଟର ଯାଞ୍ଚ କରିଥିଲେ। ଏହି ପ୍ରସଙ୍ଗରେ କଂଗ୍ରେସ ନେତା ଜୟରାମ ରମେଶ କହିଛନ୍ତି ଯେ କେବଳ ରାହୁଲ ଗାନ୍ଧୀ ନୁହଁନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ହେଲିକପ୍ଟର ମଧ୍ୟ ଯାଞ୍ଚ କରାଯାଉ।
ସୋମବାର ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ସେ କହିଛନ୍ତି ଯେ ଆମର କୌଣସି ଅସୁବିଧା ନାହିଁ କିନ୍ତୁ ନିର୍ବାଚନ ଆୟୋଗ ମଧ୍ୟ ପ୍ରଧାନମନ୍ତ୍ରୀ ଏବଂ ସ୍ବରାଷ୍ଟ୍ର ମନ୍ତ୍ରୀଙ୍କ ହେଲିକପ୍ଟର ଯାଞ୍ଚ କରିବା ଉଚିତ। ଏହା ବ୍ୟତୀତ ସେ କଂଗ୍ରେସ ପାର୍ଟିର ଥିମ ସଙ୍ଗ ଏବଂ ୨୧ ଜଣ ଅବସରପ୍ରାପ୍ତ ବିଚାରପତିଙ୍କ ଦ୍ୱାରା ସିଜେଆଇ ଡିଓ୍ବାଇ ଚନ୍ଦ୍ରଚୁଡଙ୍କୁ ଲେଖିଥିବା ଚିଠି ଉପରେ ମଧ୍ୟ ପ୍ରତିକ୍ରିୟା ଦେଇଛନ୍ତି।
ସୂଚନାଯୋଗ୍ୟ, ଯଦି ରାହୁଲ ଗାନ୍ଧୀ ପ୍ରଚାର ଗୀତର କେନ୍ଦ୍ରରେ ଅଛନ୍ତି, ତେବେ ରାହୁଲ ଗାନ୍ଧୀଙ୍କ ମୁହଁରେ କଂଗ୍ରେସ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଛି କି ବୋଲି ପ୍ରଶ୍ନ ଆସୁଛି। ଯେତେବେଳେ ଏହି ପ୍ରଶ୍ନ କଂଗ୍ରେସକୁ ପଚରାଗଲା, ଜୟରାମ ରମେଶ କହିଛନ୍ତି ଯେ ଭିଡିଓର ଫୁଟେଜ ଭାରତ ଯୋଡୋ ଯାତ୍ରା ଏବଂ ଭାରତ ଯୋଡୋ ନ୍ୟାୟା ଯାତ୍ରାର ଅଟେ, ତେଣୁ ରାହୁଲ ଗାନ୍ଧୀଙ୍କ ଅଧିକ ଫଟୋ ରହିଛି। ରାହୁଲ ଗାନ୍ଧୀଙ୍କ ସହ ଭାରତର ସାଧାରଣ ଲୋକଙ୍କ ଫଟୋ ମଧ୍ୟ ଅଛି।
