କାଳିଆପାଣି,୨୭ା୪(ଡି.ଏନ.ଏ.): ରେଙ୍ଗାଲି କେନାଲ ନିର୍ମାଣରେ ସମସ୍ୟା ଉପୁଯାଉଥିବା ଜଣେ ବ୍ୟକ୍ତିଙ୍କ ଘରକୁ ଜିଲା ପ୍ରଶାସନ ବୁଲଡୋଜର ଲଗାଇ ବୁଧବାର ଭାଙ୍ଗିଦେଇଛି। କାଳିଆପାଣି ଥାନା ଅଧିକାରୀ ସୁଶାନ୍ତ କୁମାର ମିଶ୍ରଙ୍କ ନେତୃତ୍ୱରେ ଏକ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇ କେନାଲ ପାଇଁ ଆବଶ୍ୟକ ହେଉଥିବା ଅବରୋଧ ଘରକୁ ଭଙ୍ଗାଯାଇଛି। ଉଚ୍ଛେଦବେଳେ ସୁକିନ୍ଦା ତହସିଲଦାର ଦମୟନ୍ତୀ ସାହୁ, କାଙ୍କଡ଼ପାଳ ରାଜସ୍ବ ନିରୀକ୍ଷକ ଅଶ୍ରଫ ଖାଁ ଓ ସୁକିନ୍ଦା ଥାନା କର୍ମଚାରୀ ଘଟଣାସ୍ଥଳରେ ଉପସ୍ଥିତ ଥିଲେ।
ସୂଚନା ମୁତାବକ, ସୁକିନ୍ଦା ତହସିଲ କାଙ୍କଡ଼ପାଳ ରାଜସ୍ବ ସର୍କଲ ଅଧୀନ ଭାଲୁକିପାତଳା ରେଙ୍ଗାଲି କେନାଲ ହୁଡ଼ା ମଧ୍ୟ ଭାଗରେ କାଙ୍କଡ଼ପାଳ ଗ୍ରାମର ବିଥଲ ବେହେରା ଦୀର୍ଘ ବର୍ଷ ହେଲା ଘରକରି ରହି ଆସୁଛନ୍ତି। ରେଙ୍ଗାଳି କେନାଲ ପ୍ରସ୍ତାବିତ ବହୁ ପୂର୍ବରୁ ବିଥଲ ସରକାରୀ ଜମି ଜବରଦଖଲ କରି ସ୍ଥାୟୀଭାବେ ପଥର ଘର କରି ୩ ଝିଅ ଓ ଗୋଟିଏ ପୁଅକୁ ନେଇ ସେଠାରେ ଚଳୁଛନ୍ତି। ବିଥଲଙ୍କ ଘର କଡ଼ରେ ମୁଖ୍ୟ କେନାଲ ଆଜକୁ ୩ ବର୍ଷ ପୂର୍ବରୁ ଖନନ କାର୍ଯ୍ୟ ଶେଷ ହୋଇ ଦୁଇବର୍ଷ ହେଲା କେନାଲରେ ଜଳ ପ୍ରବାହିତ ହେଉଛି। ତେବେ କେନାଲର ମୁଖ୍ୟ ହୁଡ଼ା ଓ ରାସ୍ତା ଅତିକ୍ରମ ପାଇଁ ବିଥଲଙ୍କ ଘର ୩ ବର୍ଷ ହେଲା ସମସ୍ୟା ସୃଷ୍ଟି କରିବା ସହ କାର୍ଯ୍ୟରେ ବାଧା ସୃଷ୍ଟି କରୁଥିଲା। ହେଲେ ବିଥଲ ଘର ସ୍ଥାନାନ୍ତର କିମ୍ବା ଭାଙ୍ଗିବାକୁ ରାଜି ନ ହୋଇ ଘର ଭଙ୍ଗା କ୍ଷତିପୂରଣ ନିମନ୍ତେ ଅଡ଼ି ବସିଥିଲେ। ମାତ୍ର ସରକାରୀ ଜମି ଜବରଦଖଲ କରି ଘର କରିଥିବାରୁ କୌଣସି କ୍ଷତିପୂରଣ ମିଳିବ ନାହିଁ ବୋଲି ବିଭାଗୀୟ ଅଧିକାରୀ ତାଙ୍କୁ କହିଥିଲେ। ଏଥିସହିତ ସରକାରୀ ଜମି ଛାଡ଼ି ଦେବାପାଇଁ ଜିଲା ପ୍ରଶାସନ ପକ୍ଷରୁ ଅନେକ ଥର ନୋଟିସ ଦିଆଯାଇଥିଲା। ହେଲେ ସେ ସରକାରଙ୍କ ନିର୍ଦ୍ଦେଶ ଅବମାନନା କରି ଚାଲିଥିଲେ।
