ଭୁବନେଶ୍ୱର,୧୮।୩ (ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି) ନିର୍ବାଚନ ପାଇଁ ପ୍ରସ୍ତୁତି ପ୍ରାୟ ଶେଷ ପର୍ଯ୍ୟାୟରେ ପହଞ୍ଚତ୍ଛି। ଗୁରୁବାରଠାରୁ କମଶନିଂ ଆରମ୍ଭ ହୋଇଛି। ଖୋର୍ଦ୍ଧାରୁ ଇଭିଏମ୍ ଆସିବା ପରେ ବିଜେବି ସ୍ବୟଂଶାସିତ ମହାବିଦ୍ୟାଳୟର ଷ୍ଟ୍ରଙ୍ଗ୍ରୁମ୍ରେ କଡ଼ା ସୁରକ୍ଷାରେ ଏହାକୁ ରଖାଯାଇଥିଲା। ପ୍ରଥମ ଦିନରେ ମେୟର ପଦବୀ ପାଇଁ ଆସିଥିବା ଇଭିଏମ୍୍ଗୁଡିକରେ କମିଶନିଂ ହୋଇଥିଲା। ସମୁଦାୟ ୭୦୫ଟି ବୁଥ୍ ହୋଇଥିବାବେଳେ ୭୦୫ଟି ଇଭିଏମ୍ ଏବଂ ଅତିରିକ୍ତ ଭାବେ ଆସିଥିବା ୧୦ ପ୍ରତିଶତ ଇଭିଏମ୍ରେ କମିଶନିଂ ହୋଇଛି। ମେୟର ପଦ ପାଇଁ ଆଶାୟୀ ଥିବା ସମସ୍ତ ପ୍ରାର୍ଥୀଙ୍କ ନାମ, ଦଳ ଏବଂ ଚିହ୍ନକୁ ନିର୍ଭୁଲ ଭାବେ ମେଶିନ୍ରେ ସ୍ଥାନିତ କରାଯାଇଥିଲା। ବାଲାଟ୍ ୟୁନିଟ୍କୁ ସେଟିଂ କରାଯାଇଥିଲା। ସକାଳ ୧୦ଟାରୁ କମିଶନିଂ ଆରମ୍ଭ ହୋଇଥିବାବେଳେ ଏଥିରେ ପ୍ରାୟ ୧୪୦ଜଣ ଅଧିକାରୀ ନିୟୋଜିତ ଥିବା ସୂଚନା ମିଳିଛି। ସିସିଟିଭି ସମ୍ମୁଖରେ ଏସବୁ କାର୍ଯ୍ୟ ହୋଇଥିବାବେଳେ ବିଭିନ୍ନ ରାଜନୈତିକ ଦଳର ଏଜେଣ୍ଟ ଓ ପର୍ଯ୍ୟବେକ୍ଷକ ଉପସ୍ଥିତ ଥିଲେ। ଶୁକ୍ରବାର ସନ୍ଧ୍ୟା ସୁଦ୍ଧା ସମସ୍ତ କର୍ପୋରେଟର ପ୍ରାର୍ଥୀଙ୍କ ପାଇଁ କମିଶନିଂ ସମାପ୍ତ କରାଯିବ ବୋଲି ଏଡିଏମ୍ ପ୍ରଫୁଲ୍ଲ କୁମାର ସ୍ବାଇଁ ସୂଚନା ଦେଇଛନ୍ତି।