ଭୁବନେଶ୍ୱର,୨୦ା୧:ରାଜ୍ୟର ପ୍ରମୁଖ ରିଅଲ ଇଷ୍ଟେଟ୍ କମ୍ପାନୀ ଇଭୋସ୍ ବିଲ୍ଡକନ୍ ପ୍ରାଇଭେଟ୍ ଲିମିଟେଡ୍ ଆଗାମୀ ଦିନରେ ଜାତୀୟ ଓ ଅନ୍ତଜାତୀୟ ବଜାରରେ ଆନୁଷ୍ଠାନିକ ସେବା ଯୋଗାଇବ ବୋଲି ଇଭୋସ୍ ପକ୍ଷରୁ କୁହାଯାଇଛି। ଏପରିକି ଇଭୋସ୍ ଦୁବାଇ,ସାଉଦି ଆରବ, ଇଂଲଣ୍ଡ, କୁଏତ୍ ଭଳି ୧୨ଟି ଦେଶରେ ବାସ କରୁଥିବା ପ୍ରବାସୀ ଭାରତୀୟ ଓଡ଼ିଆ(ଏନ୍ଆର୍ଆଇଓ) ସମୁଦାୟଙ୍କ ମଧ୍ୟରେ କମ୍ପାନୀ ତା’ର ପ୍ରିମିୟର ଓ ବିଳାସପୂର୍ଣ୍ଣ ପ୍ରକଳ୍ପଗୁଡ଼ିକର ଆବଶ୍ୟକ ପ୍ରଚାରପ୍ରସାରକରି ବାସଗୃହ ଉପଯୋଗୀ ସେବା ଯୋଗାଇଦେବାକୁ ଅନ୍ତର୍ଜାତୀୟ ବଜାରରେ ପ୍ରବେଶ କରିଛି। ଉଲ୍ଲେଖଯୋଗ୍ୟ, ଅନ୍ତଃରାଷ୍ଟ୍ରୀୟ ଘରୋଇ ସଂସ୍ଥା ତଥା ଦୁବାଇର ସେରୋ ପ୍ରପର୍ଟିଜ୍ ରିଅଲ୍ ଇଷ୍ଟେଟ୍ ପ୍ରାଇଭେଟ୍ ଲିମିଟେଡ୍ ସହଯୋଗରେ କମ୍ପାନୀ ଉକ୍ତ ସେବା ଯୋଗାଇଦେବ ବୋଲି ଇଭୋସ୍ ପକ୍ଷରୁ ସୂଚନା ଦିଆଯାଇଛି। ଏହି ପରିପ୍ରେକ୍ଷୀରେ ଉଭୟ ସେରୋ ପ୍ରପର୍ଟିଜ୍ ରିଅଲ୍ ଇଷ୍ଟେଟ୍ ପ୍ରାଇଭେଟ୍ ଲିମିଟେଡ୍ ଏବଂ ଇଭୋସ୍ ବିଲ୍ଡକନ୍ ପ୍ରାଇଭେଟ୍ ଲିମିଟେଡ୍ ମଧ୍ୟରେ ଏକ ବୁଝାମଣାପତ୍ର (ଏମ୍ଓୟୁ) ସ୍ବାକ୍ଷରିତ ହୋଇଯାଇଛି। ଏ ସମ୍ପର୍କରେ ଇଭୋସ୍ ବିଲ୍ଡକନ୍ ପ୍ରାଇଭେଟ୍ ଲିମିଟେଡ୍ ଏମ୍ଡି କଳିଙ୍ଗ କେଶରୀ ରଥ କହିଛନ୍ତି, କମ୍ପାନୀ ବିଶ୍ୱାସ କରୁଥିବା ମୂଳ ମୂଲ୍ୟବୋଧ ‘ନିର୍ଭରଯୋଗ୍ୟତା, ଗୁଣବତ୍ତା, ଗ୍ରାହକ କୈନ୍ଦ୍ରିକତା ଓ ନିରନ୍ତର ଅପ୍ଗ୍ରେଡେଶନ’କୁ ସର୍ବଦା ଗୁରୁତ୍ୱ ଦେଇ ଆସିଛି। ଏପରିକି ଆମେ ଗ୍ରାହକଙ୍କ ଦୃଷ୍ଟିକୋଣକୁ ବୁଝି ଏବଂ ସେମାନଙ୍କ ସହ ସୁସମ୍ପର୍କ ଓ ବିଶ୍ୱାସ ସ୍ଥାପନକରି ବଜାରରେ ଏକ ବେଞ୍ଚମାର୍କ ସ୍ଥାପନ କରିବାକୁ ଚାହୁଁଛୁ। ସେହିପରି ସେରୋ ପ୍ରପର୍ଟିଜ୍ ରିଅଲ୍ ଇଷ୍ଟେଟ୍ ପ୍ରାଇଭେଟ୍ ଲିମିଟେଡ୍ ପ୍ରତିଷ୍ଠାତା ଅନିଲ ଦାସ କହିଥିଲେ, ଭାରତ ଓ ଭାରତ ବାହାରେ ରହୁଥିବା ଓଡ଼ିଆ ନାଗରିକମାନଙ୍କୁ ଆମେ ଏକ ଗୁଣାତ୍ମକ ସେବା ଯୋଗାଇଦେବୁ। ଗୁରୁବାର ସ୍ଥାନୀୟ ଶହୀଦନଗରସ୍ଥିତ ଏକ ହୋଟେଲରେ ଆୟୋଜିତ ଖବରଦାତା ସମ୍ମିଳନୀରେ ଉଭୟ ସଂସ୍ଥାର ସହଭାଗିତା ସମ୍ପର୍କରେ ବିସ୍ତୃତ ଆଲୋଚନା ଓ ଉଭୟ କମ୍ପାନୀର ଆଭିମୁଖ୍ୟ ସମ୍ପର୍କରେ ଇଭୋସ୍ର ଉଭୟ ସଂସ୍ଥାର ବରିଷ୍ଠ ଅଧିକାରୀମାନେ ବିସ୍ତୃତ ଆଲୋକପାତ କରିଥିଲେ।