ପୁରୀ ଅଫିସ,୨୦।୪: ନୂତନ ଏସ୍ଓପି (ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର) ଅନୁଯାୟୀ ସୋମବାର ଶ୍ରଦ୍ଧାଳୁମାନେ ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ କରିଛନ୍ତି। ଶ୍ରୀମନ୍ଦିର ଭିତରେ ଓ ବାହାରେ କଟକଣାକୁ କଡ଼ାକଡ଼ି କରାଯାଇଛି। ଭିତରକାଠ ଦର୍ଶନ ବନ୍ଦ ରହିଛି। ତେଣୁ ବାହାର କାଠ ନିକଟରୁ ଭକ୍ତମାନେ ଦାରୁଦିଅଁଙ୍କ ଦର୍ଶନ କରିଛନ୍ତି। ବାହାର ରାଜ୍ୟରୁ ଆସିଥିବା ଶ୍ରଦ୍ଧାଳୁମାନେ ୯୬ ଘଣ୍ଟା ପୂର୍ବରୁ କୋଭିଡ୍ ଆର୍ଟି-ପିସିଆର୍ ନେଗେଟିଭ୍ ରିପୋର୍ଟ କିମ୍ବା ଭାକ୍ସିନେଶନ୍ ରିପୋର୍ଟ ଦେଖାଇ ଶ୍ରୀମନ୍ଦିରରେ ପ୍ରବେଶ କରିଥିଲେ। କିଓସ୍କୋ ବ୍ୟବସ୍ଥାକୁ ପୁଣି ଥରେ ଲାଗୁ କରାଯାଇଛି। ଓଡ଼ିଶାର ଯେକୌଣସି ସ୍ଥାନରୁ ଆସିଥିବା ଲୋକେ ପରିଚୟପତ୍ର ଦେଖାଇ ଦର୍ଶନ ସୁବିଧା ପାଇଛନ୍ତି। ସାମାଜିକ ଦୂରତା, ସାନିଟାଇଜେଶନ୍ ଓ ମାସ୍କ ପରିଧାନକୁ ଶ୍ରୀମନ୍ଦିର ପ୍ରଶାସନ କଡ଼ାକଡ଼ି କରିଛି। ସୋମବାର ରାଜ୍ୟ ବାହାରୁ ଆସିଥିବା କେତେଜଣ ଶ୍ରଦ୍ଧାଳୁ ଆଣ୍ଟିଜେନ୍ ରିପୋର୍ଟ କାର୍ଡ ଆଣିଥିଲେ। ତେବେ ପ୍ରଶାସନ ଆର୍ଟି-ପିସିଆର୍ ଟେଷ୍ଟ ରିପୋର୍ଟକୁ ବାଧ୍ୟତାମୂଳକ କରିଥିବାରୁ ସେମାନଙ୍କୁ ମନ୍ଦିର ଭିତରକୁ ଛଡ଼ାଯାଇ ନ ଥିଲା। ଫଳରେ ସେମାନେ ମହାପ୍ରଭୁଙ୍କ ଦର୍ଶନରୁ ବଞ୍ଚିତ ହୋଇ ନିରାଶରେ ଫେରିଥିଲେ। ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା କହିଛନ୍ତି, ରାଜ୍ୟ ବାହାରୁ ଆସୁଥିବା ଶ୍ରଦ୍ଧାଳୁଙ୍କ ପାଇଁ ଆର୍ଟି-ପିସିଆର୍ ରିପୋର୍ଟ ବାଧ୍ୟତାମୂଳକ। ସେହିପରି ଭାକ୍ସିନେସନ୍ ସରିଥିଲେ ଦର୍ଶନ ସୁଯୋଗ ମିଳିବ। ନଚେତ୍ ଦର୍ଶନ ପାଇଁ ଅନୁମତି ଦିଆଯିବ ନାହିଁ। ଶ୍ରୀମନ୍ଦିର ସହ ସମ୍ପୃକ୍ତ ବ୍ୟକ୍ତିମାନଙ୍କ ମଧ୍ୟରେ କରୋନା ସଂକ୍ରମଣ ବ୍ୟାପୁଥିବାରୁ ଶ୍ରୀମନ୍ଦିର ପ୍ରଶାସନ କଟକଣାକୁ କୋହଳ କରିବାକୁ ଚାହୁଁନାହିଁ ବୋଲି ଜେନା କହିଛନ୍ତି।