ଭଣ୍ଡାରିପୋଖରୀ,୮।୯(ଡି.ଏନ.ଏ.)-ସାପ ନାଁ ଶୁଣିଲେ ଲୋକଙ୍କ ମନରେ ଭୟ ଆସେ। କିନ୍ତୁ ଏଭଳି ଜଣେ ମଣିଷ ଅଛନ୍ତି ଯେ କି ସାପ ଧରି ଆନନ୍ଦ ପାଆନ୍ତି। ଲୋକଙ୍କ ଘର ବାଡ଼ିରେ ସାପ ଦେଖିବାକୁ ମିଳିଲେ ତାଙ୍କୁ ଖୋଜା ପଡ଼େ। ଏପରି କି ଏହି କାମ ପାଇଁ ନିକଟରେ ସେ ସମ୍ବର୍ଦ୍ଧିତ ମଧ୍ୟ ହୋଇଛନ୍ତି। ସେ ହେଉଛନ୍ତି ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ଦକ୍ଷିଣବାଡ଼ ପଞ୍ଚାୟତ ବଣସାହି ଗ୍ରାମର ସୁରେନ୍ଦ୍ର ଶିଅଳ(୬୫)।
ସୁରେନ୍ଦ୍ର ଚାଷ କରି ଜୀବନ ଜୀବିକା ନିର୍ବାହ କରୁଥିବା ବେଳେ ବିଷାକ୍ତ ସାପ ଧରି ଅଞ୍ଚଳର ଲୋକଙ୍କୁ ସୁରକ୍ଷା ଦେବା ତାଙ୍କର ନିଶା। ସ୍ଥାନୀୟ ଅଞ୍ଚଳରେ ଯଦି କାହା ଘରବାଡ଼ିରେ ବିଷାକ୍ତ ସାପ ଦେଖାଯାଏ ତେବେ ସଙ୍ଗେ ସଙ୍ଗେ ଲୋକେ ତାଙ୍କୁ ଖୋଜନ୍ତି। ଆଉ ଖବର ପାଇବା ମାତ୍ରେ ସେ ସେଠାରେ ପହଞ୍ଚି କେବଳ ଖଣ୍ଡେ ଛୋଟ ବାଡ଼ି କିମ୍ବା କଣି ସାହାଯ୍ୟରେ ସାପ ଉଦ୍ଧାର କାର୍ଯ୍ୟରେ ଲାଗିପଡ଼ନ୍ତି। ପ୍ରାୟ ୧୦ ବର୍ଷ ହେବ ସେ ଏଭଳି କାମ କରିଆସୁଛନ୍ତି। ଏଥିପାଇଁ ସେ କୌଣସି ତାଲିମ ମଧ୍ୟ ନେଇ ନାହାନ୍ତି। କେବଳ ନିଜର ସାହସ ଓ ଅନ୍ୟକୁ ବିପଦ ମୁଖରୁ ରକ୍ଷା କରିବାର ଇଚ୍ଛା ତାଙ୍କୁ ଏଭଳି କାର୍ଯ୍ୟ କରିବା ପାଇଁ ପ୍ରେରଣା ଦେଇଛି ବୋଲି ସୁରେନ୍ଦ୍ର କହନ୍ତି। ଯେକୌଣସି ବିଷାକ୍ତ ସାପକୁ ସେ କୌଶଳ କ୍ରମେ ସୁରକ୍ଷିତ ଭାବେ ଉଦ୍ଧାର କରି ବଣ ବୁଦାରେ ଛାଡ଼ି ଦିଅନ୍ତି। ବିଶେଷକରି ଜୁନ୍ରୁ ଅଗଷ୍ଟ ମଧ୍ୟରେ ସାପଙ୍କର ପ୍ରଜନନ ସମୟ ହୋଇଥିବାରୁ ବାଡ଼ି, ବଗିଚା ଓ ଘରେ ବିଭିନ୍ନ ପ୍ରଜାତିର ବିଷାକ୍ତ ସାପକୁ ଦେଖିବାକୁ ମିଳିଥାଏ। ଏହି ସମୟ ଭିତରେ ଖବର ଆସିଲେ ସେ ପହଞ୍ଚି ସାପ ଧରି ନେଇ ବଣରେ ଛାଡ଼ିଥାନ୍ତି। ଏଥିପାଇଁ ସେ କୌଣସି ପାରିଶ୍ରମିକ ମଧ୍ୟ ଦାବି କରନ୍ତି ନାହିଁ। ସ୍ଥାନୀୟ ବିଜେଡି ପକ୍ଷରୁ ପୂର୍ବତନ ବ୍ଲକ ଅଧ୍ୟକ୍ଷ ପ୍ରଣୀତକାନ୍ତ ସାମଲ ନିକଟରେ ତାଙ୍କୁ ସମ୍ବର୍ଦ୍ଧିତ କରିବା ସହ ସାପ ଧରିବା ଲାଗି ଉପକରଣ ଯୋଗାଇ ଦେଇଛନ୍ତି। ତେବେ ଆର୍ଥିକ ସ୍ବଚ୍ଛଳ ନ ଥିବାରୁ ଉଦ୍ଧାର କରୁଥିବା ସାପଗୁଡ଼ିକୁ ନେଇ କୌଣସି ବନାଞ୍ଚଳରେ ଛାଡ଼ିପାରୁ ନାହାନ୍ତି ବୋଲି ସୁରେନ୍ଦ୍ର କହିଛନ୍ତି।
