ବ୍ରହ୍ମପୁର ଅଫିସ,୧୫।୭: ବ୍ରହ୍ମପୁର ବଡ଼ବଜାର ଥାନା ଫାଷ୍ଟଗେଟ୍ ନିକଟରେ ବୁଧବାର ଅବକାରୀ ବିଭାଗର ମାତ୍ରାଧିକ କାର୍ଯ୍ୟାନୁଷ୍ଠାନକୁ ନେଇ ଉତ୍ତେଜନା ପ୍ରକାଶ ପାଇଛି। ଗଞ୍ଜେଇ ଥିବା ସନ୍ଦେହରେ ଯାଞ୍ଚ ବେଳେ ଅବକାରୀ କର୍ମଚାରୀ ଏକ ବୋଲେରୋ କାଚ ଭାଙ୍ଗି ଦେଇଥିବା ଅଭିଯୋଗ ହୋଇଛି। ଫଳରେ ଗାଡ଼ି ଡ୍ରାଇଭର ଓ ସେଥିରେ ଥିବା ଶିଶୁ ଆହତ ହୋଇଛନ୍ତି। ବୋଲେରୋରେ ଥିବା ଲୋକ ଓ ଅବକାରୀ କର୍ମଚାରୀଙ୍କ ମଧ୍ୟରେ ଯୁକ୍ତିତର୍କ ଯୋଗୁ ବ୍ରହ୍ମପୁର-ଦିଗପହଣ୍ଡି ରାସ୍ତାରେ ଗାଡ଼ି ଚଳାଚଳ ବ୍ୟାହତ ହୋଇଥିଲା। ବଡ଼ବଜାର ପୋଲିସ ପହଞ୍ଚତ୍ ସମସ୍ୟା ସମାଧାନ କରି ଆହତଙ୍କୁ ମେଡିକାଲ ପଠାଇଛି।
କୋରାପୁଟର ସହଦେବ ସ୍ବାଇଁ ବୋଲେରୋ (ନଂ ଓଡ଼ି ୦୪-୦୦୦୩) ରେ ଝିଅ ସଙ୍ଗୀତାଙ୍କୁ ତାଙ୍କ ଶାଶୁଘର ଭୁବନେଶ୍ୱରକୁ ଛାଡ଼ିବାକୁ ଆସୁଥିଲେ। ତାଙ୍କ ସହ ଦୁଇ ଭାଇ ଏବଂ ଜଣେ ଶିଶୁ ଥିଲେ। ଅନ୍ୟପଟେ ଉକ୍ତ ଗାଡ଼ିରେ ଗଞ୍ଜେଇ ଚାଲାଣ ହେଉଥିବା ଅବକାରୀ ବିଭାଗ ଖବର ପାଇଥିଲା। ବ୍ରହ୍ମପୁର ଅବକାରୀ ଟିମ୍ ଫାଷ୍ଟଗେଟ୍ ନିକଟରେ ଜଗି ଥିଲା। ଏହି କଳା ରଙ୍ଗର ବୋଲେରୋ ଦେଖି କର୍ମଚାରୀମାନେ ଗାଡ଼ି ଅଟକାଇଥିଲେ। ଡ୍ରାଇଭର କାହିଁକି ଗାଡ଼ି ଅଟକାଇବୁ ବୋଲି ପଚାରିଥିଲେ। ଅବକାରୀ କନ୍ଷ୍ଟେବଳ ଉତ୍ତ୍ୟକ୍ତ ହୋଇ ତାଙ୍କ ଗାଡ଼ି କାଚ ଭାଙ୍ଗି ଦେଇଥିଲେ। ଅନ୍ୟ ଜଣେ ଗାଳିଗୁଲଜ କରି ଡ୍ରାଇଭରଙ୍କୁ ବାହାରକୁ ଟାଣି ଆଣିଥିଲେ। ଗାଡ଼ି ଯାଞ୍ଚ କରାଯାଇଥିଲେ ମଧ୍ୟ ସେଥିରୁ ଗଞ୍ଜେଇ ମିଳି ନ ଥିଲା। ପରେ ଆହତ ସହଦେବ ସ୍ବାଇଁ ଏନେଇ ଥାନାରେ ଏତଲା ଦେଇଛନ୍ତି।