ବେଗୁନିଆପଡ଼ା,୨୧।୧୨(ଡି.ଏନ.ଏ.): ପୁଣି ଅବକାରୀ କର୍ମଚାରୀଙ୍କୁ ଆକ୍ରମଣ। ଚୋରା ମଦ କାରବାର ଉପରେ ଚଢାଉ କରି ପୁଣି ଥରେ ମଦ ବେପାରୀଙ୍କ ଆକ୍ରମଣର ଶିକାର ହୋଇଛନ୍ତି ଅବକାରୀ କର୍ମଚାରୀ। ଗଞ୍ଜାମ ଜିଲା କୋଦଳାରେ ଘଟିଛି ଏହି ଘଟଣା। ମଙ୍ଗଳବାର ରାତି ପ୍ରାୟ ୧୧ଟାବେଳେ କୋଦଳା ମାଛ ବଜାର ନିକଟରେ ଚୋରା ମଦ କାରବାର ଚାଲିଥିବା ଅଭିଯୋଗରେ ଖଲ୍ଲିକୋଟ ଅବକାରୀ ବିଭାଗ ପକ୍ଷରୁ ଚଢାଉ କରାଯାଇ ଯୁଧିଷ୍ଠିର ମୁନି ନାମକ ଜଣେ ବ୍ୟକ୍ତିଙ୍କୁ ଅବକାରୀ ଗିରଫ କରିଥିଲା। ଏହା ପରେ ତାଙ୍କୁ ଖଲ୍ଲିକୋଟ ଅବକାରୀ ଥାନାକୁ ନିଆଯିବା ପରେ କୋଦଳା କୋର୍ଟରେ ହାଜର ପାଇଁ ଅଣାଯାଇଥିଲା। ତେବେ କୋର୍ଟ ପରିସରରେ ୫ ରୁ ୭ ଜଣ ବ୍ୟକ୍ତି ହଠାତ୍ ଆସି ଅବକାରୀ କର୍ମଚାରୀଙ୍କୁ ଆକ୍ରମଣ କରିଥିଲେ। ଏଥିରେ ଜଣେ ଅବକାରୀ କର୍ମଚାରୀଙ୍କ ମୁଣ୍ଡ ଫାଟି ସେ ଆହତ ହୋଇଥିବା ଜଣାଯାଇଛି। ଘଟଣାକୁ ନେଇ କୋଦଳା ଥାନାରେ ୫ ଜଣଙ୍କ ନାମରେ ଏତଲା ଦିଆଯାଇଛି ବୋଲି କହିଛନ୍ତି ସଦର ଅବକାରୀ ଇନ୍ସପେକ୍ଟର ଦିପ୍ତିମୟୀ ସାହୁ।
ସୂଚାଯୋଗ୍ୟ, ଗତ ୪ ମାସ ତଳେ ଜଣେ ଅବକାରୀ କର୍ମଚାରୀଙ୍କୁ କୋଦଳା ଅଞ୍ଚଳରେ ଆକ୍ରମଣ ହୋଇଥିବା ବେଳେ ଏବେ ପୁଣି ଜଣେ କର୍ମଚାରୀଙ୍କୁ ଆକ୍ରମଣ ହୋଇଛି।