ଚମ୍ପୁଆ, ୨୯।୧ (ଡି.ଏନ.ଏ.) ଧାନକିଣାକୁ ନେଇ ଚାଷୀ ଅସନ୍ତୋଷ ବଢ଼ିବାରେ ଲାଗିଛି। ଚାଷୀ ଟୋକନ ପାଇ ନିର୍ଦ୍ଧାରିତ ଦିନରେ ଧାନ ବିକିବାକୁ ଆସୁଥିବା ବେଳେ ଟାର୍ଗେଟ ନ ଥିବାରୁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଶୁକ୍ରବାର କେନ୍ଦୁଝର ଜିଲା ଚମ୍ପୁଆର ଭଣ୍ଡା ଲ୍ୟାମ୍ପ୍ସରେ ଧାନ କ୍ରୟକୁ ନେଇ ଉତ୍ତେଜନା ଦେଖାଦେଇଥିଲା।
ପ୍ରକାଶ ଯେ, ୨୦୦ରୁ ଊର୍ଦ୍ଧ୍ୱ ଚାଷୀ ଲ୍ୟାମ୍ପ୍ସରେ ପହଞ୍ଚି ଉପସ୍ଥିତ ଅଧିକାରୀମାନଙ୍କୁ ଧାନ କିଣାରେ ବିଳମ୍ବ ଓ ହଇରାଣ ହେଉଥିବା ସମ୍ପର୍କରେ ଅବଗତ କରିଥିଲେ। ମାତ୍ର ଟାର୍ଗେଟ କମ୍ ରହୁଥିବାରୁ ଧାନ କିଣାଯାଇ ପାରୁ ନ ଥିବା ଜଣାପଡ଼ିବା ପରେ ଉତ୍ତେଜନା ପ୍ରକାଶ ପାଇଥିଲା। ଟୋକନରେ ପ୍ରଦତ୍ତ ଦିନ ଧାନ କିଣିବାକୁ ଲ୍ୟାମ୍ପ୍ସ ବାଧ୍ୟ ବୋଲି ଚାଷୀମାନେ ଦାବି କରିବା ସହ କ୍ରୟ ନ ହେଲେ ଟୋକନ ଲାପ୍ସ ହୋଇଯିବ ବୋଲି କହିଥିଲେ। ଟୋକନ ଅବଧି ସରିବା ପୂର୍ବରୁ ଧାନ କିଣାଯାଉ ବୋଲି ସେମାନେ ଦାବି କରିଥିଲେ। ପ୍ରାୟ ୩ ଘଣ୍ଟା କାଳ ଚାଷୀମାନେ ଲ୍ୟାମ୍ପ୍ସ ଆଗରେ ଜଗି ରହିଥିଲେ। ଏ ସମ୍ପର୍କରେ ଲ୍ୟାମ୍ପ୍ସ ଅଧିକାରୀ ଆର୍ତ୍ତତ୍ରାଣ ସାହୁଙ୍କୁ ପଚାରିବାରୁ ଧାନ କ୍ରୟ ପାଇଁ ଚେଷ୍ଟା ଜାରି ରହିଥିବା ବେଳେ ମିଲରଙ୍କ ସହ ଆଲୋଚନା କରାଯାଉଥିବା କହିଛନ୍ତି।
