ଅନୁଗୋଳ ଅଫିସ, ୭ା୫ ଦୀର୍ଘ ୬ ବର୍ଷ ପରେ ଅନୁଗୋଳ ରାସ୍ତାକୁ ଫେରିଛି ରାହାଗିରି। ପୁଣି ନାଚଗୀତରେ ମସ୍ଗୁଲ ହେବେ ସହରବାସୀ। ଆସନ୍ତା ରବିବାର ସକାଳ ୬ଟାରୁ ୯ଟା ପର୍ଯ୍ୟନ୍ତ ଜଗନ୍ନାଥ ମନ୍ଦିର ରାସ୍ତାରେ ଏହି କାର୍ଯ୍ୟକ୍ରମ ଆୟୋଜନ କରାଯିବ। ଏଥିଲାଗି ପ୍ରସ୍ତୁତି ଆରମ୍ଭ ହୋଇଥିବାବେଳେ ଏଭଳି ନିଆରା ମନୋରଞ୍ଜନଭିତ୍ତିକ କାର୍ଯ୍ୟକ୍ରମରେ ସାମିଲ ହେବାକୁ ଯୁବଗୋଷ୍ଠୀଙ୍କ ମଧ୍ୟରେ ନାହିଁ ନ ଥିବା ଉତ୍କଣ୍ଠା ପ୍ରକାଶ ପାଇଛି।
ବ୍ୟସ୍ତବହୁଳ ସହରୀ ମଣିଷଙ୍କୁ ମନୋରଞ୍ଜନ କାର୍ଯ୍ୟକ୍ରମ ମାଧ୍ୟମରେ ମାନସିକ ଚାପ କମାଇବା ଉଦ୍ଦେଶ୍ୟରେ ୬ବର୍ଷ ତଳେ ଅନୁଗୋଳରେ ଆୟୋଜନ କରାଯାଇଥିବା ‘ରାହାଗିରି’କୁ ମିଳିଥିଲା ବିପୁଳ ଜନସମର୍ଥନ। ଖୋଲା ଆକାଶ ତଳେ ଯୋଗ, ପ୍ରାଣାୟମ ସମେତ ଦୁଃସାହସିକ କ୍ରୀଡ଼ା କୌଶଳ ପ୍ରଦର୍ଶନରୁ ରୋମାଞ୍ଚକର ଅନୁଭୂତି ସାଉଁଟିଥିଲେ ସ୍ଥାନୀୟ ବାସିନ୍ଦା। ତେବେ ବିଭିନ୍ନ କାରଣରୁ ଏହା ବନ୍ଦ ହୋଇଯାଇଥିଲା। ଏହାକୁ ପୁନର୍ବାର ଆରମ୍ଭ କରିବାକୁ ଯୋଜନା କରାଯାଉଥିବାବେଳେ କରୋନା ସଂକ୍ରମଣ ଏଥିରେ ସାଧିଥିଲା ଦାଉ। ତେବେ ପ୍ରଶାସନ ସହାୟତାରେ ‘ରାହାଗିରି’ ଫେରୁଥିବାରୁ ଏହାକୁ ସବୁ ମହଲରେ ସ୍ବାଗତ କରାଯାଇଛି। ଏଭଳି କି ସୋସିଆଲ ମିଡିଆରେ କାର୍ଯ୍ୟକ୍ରମ ସମ୍ପର୍କରେ ପ୍ରଚାର ଆରମ୍ଭ କରିଦେଇଛନ୍ତି ସ୍ଥାନୀୟ ବାସିନ୍ଦା। ଦର୍ଶକଙ୍କୁ ମତୁଆଲା କରିବାକୁ ଓଲିଉଡ କଣ୍ଠଶିଳ୍ପୀ କୁଲଦୀପ ପଟ୍ଟନାୟକ ଆସୁଥିବାରୁ ଏହାକୁ ନେଇ ଉତ୍କଣ୍ଠା ବଢ଼ିଛି। ଏହାକୁ ଦୃଷ୍ଟିରେ ରଖି ଜିଲା ପ୍ରଶାସନ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି। ଜଗନ୍ନାଥ ମନ୍ଦିର ରାସ୍ତାରୁ ବିଇଡି ଛକ ପର୍ଯ୍ୟନ୍ତ ରାସ୍ତାରେ ୩ ଘଣ୍ଟା ଧରି ରାହାଗିରି ଆୟୋଜନ ହେବ। ଯୋଗ, ପ୍ରାଣାୟମ, ମ୍ୟାଜିକ୍, ପ୍ରଦର୍ଶନୀ, ସାଇକେଲିଂ ସହିତ ସାଂସ୍କୃତିକ କାର୍ଯ୍ୟକ୍ରମ ସାଜିବ ପ୍ରମୁଖ ଆକର୍ଷଣ। ଲୋକଙ୍କ ଉତ୍ସାହ ଓ ଉନ୍ମାଦନା ଦେଖି ପୁଣି ରାହାଗିରି କାର୍ଯ୍ୟକ୍ରମକୁ ଅବ୍ୟାହତ ରଖାଯିବ ବୋଲି ପ୍ରଶାସନିକ ନିଷ୍ପତ୍ତି ନିଆଯାଇଛି।