ଧର୍ମଶାଳା, ୨୯।୧୦ (ପି.ଟି.): ଚଳିତ ଦିନିକିଆ ବିଶ୍ୱକପ୍ରେ ଶନିବାର ଖେଳାଯାଇଥିବା ଏକ ହାଇ ସ୍କୋରିଂ ମ୍ୟାଚରେ ନ୍ୟୁଜିଲାଣ୍ଡ ବିପକ୍ଷରେ ଅଷ୍ଟ୍ରେଲିଆ ଟ୍ରାଭିସ୍ ହେଡ୍ଙ୍କ ଆକର୍ଷଣୀୟ ଶତକ ସହାୟତାରେ ୫ ରନରେ ରୋମାଞ୍ଚକ ବିଜୟ ହାସଲ କରିଛି। ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଅଷ୍ଟ୍ରେଲିଆ ୩୮୮ରନର ବିଶାଳ ସ୍କୋର ଛିଡ଼ା କରିଥିଲା। ଜବାବରେ ନ୍ୟୁଜିଲାଣ୍ଡ ନିର୍ଦ୍ଧାରିତ ୫୦ ଓଭରରେ ୯ ଉଇକେଟ ବିନିମୟରେ ୩୮୩ ରନ କରିପାରିଥିଲା। ଏକ ବିଶ୍ୱକପ୍ ମ୍ୟାଚରେ ଦୁଇ ଦଳ ମିଶି ସର୍ବାଧିକ ୭୭୧ ରନ ସଂଗ୍ରହ କରି ଏକ ନୂଆ ରେକର୍ଡ ପ୍ରତିଷ୍ଠା କରିଛନ୍ତି। ପୂର୍ବରୁ ଏହି ରେକର୍ଡ ଚଳିତ ଟୁର୍ନାମେଣ୍ଟରେ ଦକ୍ଷିଣ ଆଫ୍ରିକା ବନାମ ଶ୍ରୀଲଙ୍କା ମଧ୍ୟରେ ହୋଇଥିଲା। ଦୁଇ ଦଳ ମୋଟ ୭୫୪ ରନ ସଂଗ୍ରହ କରିଥିଲେ। ପ୍ରତିଯୋଗିତାରେ ଅଷ୍ଟ୍ରେଲିଆର ଆରମ୍ଭ ଉତ୍ସାହଜନକ ନ ଥିଲା। ଦଳ ଏହାର ପ୍ରଥମ ଦୁଇଟି ମ୍ୟାଚରେ ପରାଜିତ ହୋଇଥିଲା। ମାତ୍ର ଚମତ୍କାର ପ୍ରତ୍ୟାବର୍ତ୍ତନ ସହ କ୍ରମାଗତ ୪ର୍ଥ ବିଜୟ ସହ ନିଜକୁ ସେମିଫାଇନାଲ ଦୌଡ଼ରେ ସାମିଲ କରିଛି। ପ୍ଲେୟର ଅଫ୍ ଦି ମ୍ୟାଚ ବିବେଚିତ ଟ୍ରାଭିସ୍ ହେଡ୍ ତାଙ୍କ ପ୍ରଥମ ବିଶ୍ୱକପ୍ ମ୍ୟାଚରେ ୬୭ ବଲ୍ରୁ ୧୦୯ ରନ ସଂଗ୍ରହ କରିଥିଲେ। ସେ ଓ ଡେଭିଡ୍ ଓ୍ବାର୍ନର (୬୫ ବଲ୍ରୁ ୮୧) ଓପନିଂ ଉଇକେଟରେ ୧୭୫ ରନ ଯୋଗ କରିଥିଲେ। ଅଷ୍ଟ୍ରେଲିଆର ଅନ୍ୟ ଖେଳାଳିଙ୍କ ମଧ୍ୟରେ ଗ୍ଲେନ ମାକ୍ସଓ୍ବେଲ ୪୧, ଜୋସ୍ ଇଂଲିଶ ୩୮ ରନ କରିଥିବା ବେଳେ ଶେଷ ପର୍ଯ୍ୟାୟରେ ପ୍ୟାଟ୍ କୁମିନ୍ସ ୧୪ ବଲ୍ରୁ ଦ୍ରୁତ ୩୭ ରନ କରିଥିଲେ। ନ୍ୟୁଜିଲାଣ୍ଡର ସଫଳ ବୋଲର ଗ୍ଲେନ ଫିଲିପ୍ସ ୩୭ ରନ ବିନିମୟାର ୩ ଉଇକେଟ ଅକ୍ତିଆର କରିଥିଲେ। ନ୍ୟୁଜିଲାଣ୍ଡ ଇନିଂସରେ ଟପ୍ ସ୍କୋରର ରାଚିନ ରବିନ୍ଦ୍ର ୮୯ ରନ୍ରୁ ୧୧୬ ରନ କରିଥିଲେ।
ସଂକ୍ଷିପ୍ତ ସ୍କୋର
ଅଷ୍ଟ୍ରେଲିଆ: ୪୯.୨ ଓଭରରେ ୩୮୮ (ଟ୍ରାଭିସ ହେଡ୍-୧୦୯, ଡେଭିଡ୍ ଓ୍ବାର୍ନର-୮୧; ଗ୍ଲେନ ଫିଲିପ୍ସ-୩/୩୭)।
ନ୍ୟୁଜିଲାଣ୍ଡ: ୫୦ ଓଭରରେ ୩୮୩/୯ (ରାଚିନ ରବୀନ୍ଦ୍ର-୧୧୬, ଜିମ୍ମି ନିଶାମ-୫୮, ଜୋଶ ହାଜ୍ଲେଉଡ୍-୨/୭୦)।