ଖଇରା, ୨୫।୨(ଉତ୍କଳବନ୍ଧୁ ପଣ୍ଡା)ଶନିବାର ରାଜ୍ୟ ସରକାର ୩୪ଟି ନୂଆ ବିଜ୍ଞାପିତ ଅଞ୍ଚଳ ଘୋଷଣା କରିଛନ୍ତି। ଦୀର୍ଘଦିନରୁ ମାନ୍ୟତା ଲାଗି ଦାବି ହୋଇଆସୁଥିବା ଖଇରା ବାଦ୍ ପଡିବା ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ସବୁ ସର୍ତ୍ତ ପୂରଣ କରୁଥିବା ଖଇରା ପାଇଁ ପ୍ରଶାସନିକ ସର୍ଭେ ରିପୋର୍ଟ ବହୁ ବର୍ଷ ପୂର୍ବରୁ ପ୍ରଦାନ କରାଯାଇଥିଲେ ହେଁ କେଉଁ ପରିସ୍ଥିତିରୁ ଖଇରାକୁ ବଞ୍ଚିତ କରାଗଲା ତାକୁ ନେଇ ଜନସାଧାରଣଙ୍କ ମନରେ ପ୍ରଶ୍ନବାଚୀ ସୃଷ୍ଟି ହୋଇଛି। ଆଗାମୀ ଦିନରେ ଶାସକ ଦଳ ଉପରେ ଏହାର ପ୍ରଭାବ ପଡିବାରେ ନିଶ୍ଚିତ ସମ୍ଭାବନା ଥିବା ବେଳେ ମୁଖ୍ୟମନ୍ତ୍ରୀ ନିଷ୍ପତ୍ତିର ପୁନର୍ବିଚାର କରି ନୂଆ ତାଲିକାରେ ଖଇରାର ନାମ ଯୋଡିବାକୁ ଖଇରାର ବିଭିନ୍ନ ସଙ୍ଗଠନ ଲୋକପ୍ରତିନିଧି ତଥା ୩୭ ପଞ୍ଚାୟତର ଜନସାଧାରଣ ଦାବି କରିଛନ୍ତି।
ଖଇରା ଜନଜାଗରଣ ମଞ୍ଚ ତଥା ଅନ୍ୟାନ୍ୟ ବହୁ ସଙ୍ଗଠନ ତରଫରୁ ଖଇରାକୁ ବିଜ୍ଞାପିତ ଅଞ୍ଚଳ ପରିଷଦ ଭାବେ ଘୋଷଣା କରିବାକୁ ଦାବିପତ୍ର ଦିଆଯାଇଥିଲା। ୨୦୨୨ ଜୁଲାଇ ୧୨ତାରିଖ ଚିଠି ନମ୍ବର ୧୨୬୦ରେ ପୁନର୍ଗଠନ ପାଇଁ ଆବଶ୍ୟକ ତଥ୍ୟ ପ୍ରଦାନ କରିବାକୁ ଉଭୟ ବିଡିଓ ଓ ତହସିଲଦାରଙ୍କୁ ଜିଲା ସହରାଞ୍ଚଳ ଉନ୍ନୟନ କର୍ତ୍ତୃପକ୍ଷଙ୍କ ପକ୍ଷରୁ ଚିଠି କରାଯାଇଥିଲା ା ଉଭୟ ଅଧିକାରୀଙ୍କ ଦ୍ୱାରା ବିଭିନ୍ନ ପଞ୍ଚାୟତର ଗ୍ରାମ ଚିହ୍ନଟ କରାଯାଇ ଏହାର ସ୍କେଚ ମ୍ୟାପ ସହ ୨୦୨୨ ନଭେମ୍ବର ୧ତାରିଖରେ ସବିଶେଷ ରିପୋର୍ଟ ପ୍ରଦାନ କରାଯାଇଥିଲା। ଏଥିମଧ୍ୟରେ ଖଇରାର ୭, ମହତୀପୁରର ୧୦, ପଳସାରେ ୬, ନୟାଖଣ୍ଡିର ୮, ସୁଣ୍ଢିରାର ୪, ସାରକୋଣାର ୩ ଓ ସାରୁଗାଁର ଗୋଟିଏ ଗ୍ରାମର ମୋଟ ୨୦ହଜାର ୩୦୫ ଲୋକଙ୍କୁ ଏଥିରେ ସାମିଲ କରାଯାଇଥିଲା। ଏହି କାରଣରୁ ବିଜ୍ଞାପିତ ଅଞ୍ଚଳ ଘୋଷଣାରେ କୌଣସି ଅସୁବିଧା ନ ଥିଲା। ହେଲେ ଖଇରାର ୨ ପଡୋଶୀ ସହର ସିମୁଳିଆ ଓ ଆଗରପଡା ଏହି ତାଲିକାରେ ସ୍ଥାନ ପାଇଥିବା ବେଳେ ଖଇରା ଲୋକଙ୍କୁ ହତାଶ ହେବାକୁ ପଡିଛି ା ରାଜନୈତିକ ଇଛାଶକ୍ତି ଏହାର ମୁଖ୍ୟ କାରଣ ବୋଲି ବିଶିଷ୍ଟ ବାମପନ୍ଥୀ ନେତା ତଥା ନୟାଖଣ୍ଡିର ପୂର୍ବତନ ସରପଞ୍ଚ ମାନସ ମହାପାତ୍ର କହିଛନ୍ତି ା ସବୁ ପ୍ରକାର ଭିତ୍ତିଭୂମି ଥାଇ ଖଇରା ବ୍ଲକ ତାଲିକାରେ ସ୍ଥାନ ନ ପାଇବା ଦୁର୍ଭାଗ୍ୟଜନକ ବୋଲି ଭାଜପା ମୁଖପାତ୍ର ଠାକୁର ରଞ୍ଜିତ ଦାସ କହିଛନ୍ତି ା ସିମୁଳିଆକୁ ଘୋଷଣାରେ କିଛି ଅସୁବିଧା ନାହିଁ କିନ୍ତୁ ଖଇରାକୁ ଅଣଦେଖା କରାଯିବା ପରିତାପର ବିଷୟ ବୋଲି ବିଶିଷ୍ଟ କଂଗ୍ରେସ ନେତା ହିମାଂଶୁ ଶେଖର ବେହେରା କହିଛନ୍ତି ା ପ୍ରଶାସନିକ ରାଜନୈତିକ ଇଛାଶକ୍ତିର ଅଭାବ ଏଥିପାଇଁ ଦାୟୀ ବୋଲି ଖଇରା ବ୍ଲକ ଅଧ୍ୟକ୍ଷା ଅଭିଲିପ୍ସା ସାହୁ କହିଛନ୍ତି ା ସିମୁଳିଆ ବିଧାୟକ ଜ୍ୟୋତି ପ୍ରକାଶ ପାଣିଗ୍ରାହୀ ଏ ସମ୍ପର୍କରେ ପ୍ରତିକ୍ରିୟା ରଖି ଖଇରାକୁ ଘୋଷଣା ସମ୍ପର୍କରେ ସରକାରୀ ସ୍ତରରେ ତର୍ଜମା ଚାଲିଛି ା ମାନ୍ୟତା ମିଳିବାରେ କୌଣସି ଅସୁବିଧା ନାହିଁ ବୋଲି କହିଛନ୍ତି।