ନୂଆଦିଲ୍ଲୀ,୨୮।୨: ଦେଶର ପ୍ରମୁଖ ଟେଲିକମ କମ୍ପାନୀ ଭାରତୀ ଏୟାରଟେଲ୍ ନିକଟରେ ଆଉ ଏକ ବିଶେଷ ସଫଳତା ହାସଲ କରିଥିବା ଜଣାପଡିଛି। ଏପରିକି ଏୟାରଟେଲ ନେଟ୍ୱର୍କରେ ସ୍ବତନ୍ତ୍ର ୫ଜି ୟୁଜର୍ସଙ୍କ ସଂଖ୍ୟା ୧୦ ନିୟୁତରୁ ଅଧିକ ବୋଲି କମ୍ପାନୀ ପକ୍ଷରୁ କୁହାଯାଇଛି।
ଏ ସମ୍ପର୍କରେ ଭାରତୀ ଏୟାରଟେଲ୍ର ସିଟିଓ ରଣଦୀପ ସେଖନ କହିଛନ୍ତି, ଏହା ପ୍ରାରମ୍ଭିକ ଦିନ ହୋଇଥିଲେ ମଧ୍ୟ ଗ୍ରାହକମାନଙ୍କଠାରୁ ମିଳିଥିବା ପ୍ରତିକ୍ରିୟାକୁ ନେଇ ଆମେ ବେଶ୍ ଉତ୍ସାହିତ ରହିଛୁ। ଏକ ଅଧିକ ଯୋଗାଯୋଗ ଭିତ୍ତିକ, ସମାନତା ଏବଂ ନିରନ୍ତର ନେଟୱର୍କ ଗଠନ କରିବା ପାଇଁ ରହିଥିବା ପ୍ରତିବଦ୍ଧତାକୁ ଏୟାରଟେଲ୍ ଜାରି ରଖିବ। ଏୟାରଟେଲ୍ ୫ଜି ପ୍ଲସ୍ର ଗ୍ରାହକମାନଙ୍କ ପାଇଁ ତିନି ପ୍ରକାର ଲାଭ ରହିଛି। ପ୍ରଥମଟି ହେଉଛି ଏହା ଏକ ପ୍ରଯୁକ୍ତି ଦ୍ୱାରା ପରିଚାଳିତ ହେଉଛି, ଯାହା ବେଶ୍ ଉନ୍ନତ ବ୍ୟବସ୍ଥା ସହ ବିଶ୍ୱବ୍ୟାପୀ ଗ୍ରହଣୀୟତା ହାସଲ କରିଛି। ଏହା ନିଶ୍ଚିତ କରୁଛି ଯେ ସମସ୍ତ ୫ଜି ସ୍ମାର୍ଟଫୋନ୍ ନିରବଚ୍ଛିନ୍ନ ଭାବେ ଏୟାରଟେଲ୍ ନେଟ୍ୱର୍କରେ କାର୍ଯ୍ୟ କରିବ। ଦ୍ୱିତୀୟଟି ହେଉଛି କମ୍ପାନୀ ଶ୍ରେଷ୍ଠ ଅନୁଭୂତି ପ୍ରଦାନ କରିବାର ପ୍ରତିଶ୍ରୁତି ଦେଇଛି-ସୁପର-ଫାଷ୍ଟ୍ କଲ୍ ସଂଯୋଗ, ଚମତ୍କାର ଭଏସ ଅନୁଭୂତି ସହିତ ଆଜିର ଦିନ ତୁଳନାରେ ୨୦ରୁ ୩୦ ଗୁଣା ଅଧିକ ଡାଟା ସ୍ପିଡ୍। ତୃତୀୟରେ ସ୍ବତନ୍ତ୍ର ଶକ୍ତି ହ୍ରାସ ସମାଧାନ ସହିତ ପରିବେଶ ପାଇଁ ମଧ୍ୟ ଏୟାରଟେଲ୍ ୫ଜି ପ୍ଲସ୍ ନେଟ୍ୱର୍କ ଅନୁକୂଳ ରହିବ। ଦେଶର ସମସ୍ତ ରିଟେଲ ଷ୍ଟୋର୍ରେ ଏୟାରଟେଲ୍ ପକ୍ଷରୁ ୫ଜି ଏକ୍ସପେରିଏନ୍ସ ଜୋନ୍ ସୃଷ୍ଟି କରାଯାଇଛି। ଅଲ୍ଟ୍ରାଫାଷ୍ଟ୍ ଏୟାରଟେଲ୍ ୫ଜି ପ୍ଲସ୍ର ଅନୁଭବ ହାସଲ କରିବା ଲାଗି ଗ୍ରାହକମାନେ ଷ୍ଟୋର ପରିଦର୍ଶନ କରିପାରିବେ।