ଭୁବନେଶ୍ୱର,୧୨।୪: ଟାଟା ଷ୍ଟିଲ୍ ମାଇନିଂ ଲିମିଟେଡ୍ (ଟିଏସ୍ଏମ୍ଏଲ୍) ପକ୍ଷରୁ ଏକ ସ୍ବତନ୍ତ୍ର ଆପ୍ରେଣ୍ଟିଶିପ୍ ପ୍ରୋଗ୍ରାମର ଶୁଭାରମ୍ଭ ସମ୍ପର୍କରେ ଘୋଷଣା କରାଯାଇଛି। ବିଶେଷ କରି ବିବିଧତା,ଲିଙ୍ଗଗତ ସମାନତା ଓ ଅନ୍ତର୍ଭୁକ୍ତୀକରଣ ଅଭିଯାନର ଅଂଶ ସ୍ବରୂପ କମ୍ପାନୀର ଓଡ଼ିଶା କାର୍ଯ୍ୟକ୍ଷେତ୍ରରେ ମହିଳାମାନଙ୍କ ଲାଗି ଏଭଳି ଏକ କାର୍ଯ୍ୟକ୍ରମର ଶୁଭାରମ୍ଭ କରାଯାଇଛି। ଏପରିକି ଅଣ ପାରମ୍ପରିକ କ୍ଷେତ୍ରରେ ନିଯୁକ୍ତି ସୁଯୋଗ ପ୍ରଦାନ କରି ମହିଳାମାନଙ୍କୁ ସଶକ୍ତ କରିବା ଲାଗି ଲକ୍ଷ୍ୟ ରଖାଯାଇଥିବା ଉକ୍ତ ଅଭିଯାନକୁ ଯାଜପୁର ଜିଲାରେ ଥିବା କମ୍ପାନୀର ସୁକିନ୍ଦା କ୍ରୋମାଇଟ୍ ଖଣି କ୍ୟାମ୍ପସ୍ରେ ଏହାର କେନ୍ଦ୍ର ଉଦ୍ଘାଟନ କରାଯାଇଥିଲା। ସେହିଭଳି ସମ୍ପୂର୍ଣ୍ଣ ମହିଳା ଆପ୍ରେଣ୍ଟିଶିପ୍ ବ୍ୟାଚ୍ରେ ଓଡ଼ିଶାର ବିଭିନ୍ନ ସ୍ଥାନର ୧୫ଜଣ ମହିଳା ରହିଛନ୍ତି, ଯେଉଁମାନଙ୍କୁ ମେଟାଲର୍ଜି, ଇଲେକ୍ଟ୍ରିକାଲ୍, ସିଭିଲ ଆଦି ଟ୍ରେଡ୍ ଉପରେ ଏକବର୍ଷିଆ ଅବଧିର ପ୍ରଶିକ୍ଷଣ ପ୍ରଦାନ କରାଯିବ। ବିଶେଷ କରି ଖଣିର ବିଭିନ୍ନ ଦିଗ ଯଥା ଜିଓଲୋଜି, ଡ୍ରିଲିଂ, ବ୍ଲାଷ୍ଟିଂ ଆଦି ଉପରେ ମଧ୍ୟ ଏହି ବ୍ୟାଚ୍ ତାଲିମ ହାସଲ କରିବେ। ସେହିପରି ଟିଏସ୍ଏମ୍ଏଲ୍ର ଆଠଗଡ଼, ଗୋପାଳପୁର ଓ ଯାଜପୁରଠାରେ ଥିବା ଫେରୋ ଆଲଏଜ୍ କାରଖାନା ଏବଂ ସୁକିନ୍ଦା ଅଞ୍ଚଳରେ ଥିବା ଖଣିର ଅଭିଜ୍ଞ ବ୍ୟକ୍ତିବିଶେଷଙ୍କ ମାର୍ଗଦର୍ଶନରେ ଆପ୍ରେଣ୍ଟିଶ୍ମାନେ ତାଲିମ ହାସଲ କରିବେ। ଯେଉଁଠାରେ ସେମାନେ ପ୍ରତ୍ୟକ୍ଷ ଜ୍ଞାନ ଆହରଣ କରିବା ସହିତ କାର୍ଯ୍ୟକ୍ଷେତ୍ରର ବାସ୍ତବ ଦୁନିଆ ବିଷୟରେ ପରିଚିତ ହୋଇପାରିବେ।
ଏ ସମ୍ପର୍କରେ ଟିଏସ୍ଏମ୍ଏଲ୍ର ପରିଚାଳନା ନିର୍ଦ୍ଦେଶକ ପଙ୍କଜ ସତିଜା କହିଛନ୍ତି, ସମ୍ପୂର୍ଣ୍ଣ ମହିଳା ଆପ୍ରେଣ୍ଟିଶିପ୍ କାର୍ଯ୍ୟକ୍ରମ ଘୋଷଣାକରି ଆମେ ବେଶ୍ ଆନନ୍ଦିତ, ଯାହା ମହିଳା ସଶକ୍ତୀକରଣ ଓ ଲିଙ୍ଗଗତ ସମାନତାକୁ ସୁଦୃଢ଼ କରିବା ଦିଗରେ ବେଶ୍ ସହାୟକ ହେବ। ଏପରିକି ପ୍ରତିଟି କ୍ଷେତ୍ରରେ ସଫଳତା ହାସଲ କରିବା ଲାଗି ମହିଳାଙ୍କ ମଧ୍ୟରେ ଥିବା ଅପାର ସମ୍ଭାବନାକୁ ଆମେ ବୁଝିଛୁ ଏବଂ ସେମାନଙ୍କ ଅଭିଳାଷ ପୂରଣ କରିବା ଲାଗି ଆବଶ୍ୟକ ସମର୍ଥନ ଓ ସୁଯୋଗ ପ୍ରଦାନ କରିବା ଲାଗି ଆମେ ପ୍ରତିବଦ୍ଧ ରହିଛୁ।
