ତାଳଚେର, ୧୦ା୪(ନି.ପ୍ର.) – ତାଳଚେର ମେଡିକାଲ କଲେଜକୁ ସରକାରୀ ପରିଚାଳନାରେ କାର୍ଯ୍ୟକାରୀ କରିବା ଦାବି ଜୋର୍ଧରିଛି। ଏହାର ପ୍ରତିବାଦରେ ଆସନ୍ତା ଏପ୍ରିଲ୍ ୨୯ରେ ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଗଣଧାରଣା ଡାକରା ଦେଇଛି ତାଳଚେର ସରକାରୀ ମେଡିକାଲ କଲେଜ କ୍ରିୟାନୁଷ୍ଠାନ କମିଟି। ଏହାକୁ ସଫଳ କରିବା ପାଇଁ ଶନିବାର ପୂର୍ବାହ୍ନରେ ହାଟତୋଟାସ୍ଥିତ ତାଳଚେର ପ୍ରେସ କ୍ଲବ୍ ପରିସରରେ ବରିଷ୍ଠ ଆବାହକ ଦିଗାମ୍ବର ଗଡ଼ନାୟକଙ୍କ ସଭାପତିତ୍ୱରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। କମିଟିର ଦାବି ସମ୍ପର୍କରେ ଜନଜାଗରଣ ସୃଷ୍ଟି କରିବା ଉଦ୍ଦେଶ୍ୟରେ ଏପ୍ରିଲ ୧୫ରେ ହେବାକୁ ଥିବା ପ୍ରସିଦ୍ଧ ହିଙ୍ଗୁଳା ଯାତ୍ରାରେ ବ୍ୟାପକ ପ୍ରଚାର କରାଯିବ। ଏପ୍ରିଲ୍ ୧୮ରେ ତାଳଚେର ହାଟତୋଟାଠାରେ ସର୍ବସାଧାରଣଙ୍କୁ ନେଇ ଆଲୋଚନା ସଭା ଅନୁଷ୍ଠିତ ହେବ। ଏହି ଦୁଇ କାର୍ଯ୍ୟକ୍ରମକୁ ସଫଳ କରିବାକୁ କମିଟି ପକ୍ଷରୁ ନିବେଦନ କରାଯାଇଛି। ବୈଠକରେ ପଦ୍ମଚରଣ ସାମଲ, ଓକିଲ ସଂଘ ସଭାପତି ସନ୍ତୋଷ ସାହୁ, ପୂର୍ବତନ ନଗରପାଳ କେଶବ ଭୂତିଆ, ଗଣମାଧ୍ୟମ ପ୍ରତିନିଧି ଡ. ରଶ୍ମିରଞ୍ଜନ ମିଶ୍ର, ବାଉରୀବନ୍ଧୁ ବେଜ, ଭଗବାନ ପ୍ରଧାନ, ବିନୋଦ ଲାଲ୍, ଚନ୍ଦ୍ରସେନ ସାହୁ, ବାରିକ ପ୍ରଧାନ, ସୁନୀଲ ସିଂ, କୈଳାସ ସାହୁ, ପ୍ରହ୍ଲାଦ ସାହୁ, ଜୟସେନ ମେହେର, ମାନସୀ ସ୍ବାଇଁ, ପ୍ରେମାନନ୍ଦ ମହାନ୍ତି, କୁମର ସାହୁ, ଅଭୟ ପାଣି, ସୁରେଶ କଅଁର ପ୍ରମୁଖ ଉପସ୍ଥିତ ଥିଲେ।
