ନୀଳଗିରି,୧୭ା୪(ସ୍ବ.ପ୍ର.): ଓଡ଼ିଶାରେ ପ୍ରଥମ କରି ବାଲେଶ୍ୱର ଜିଲା ପଞ୍ଚଲିଙ୍ଗେଶ୍ୱରର ସଂରକ୍ଷିତ ଜଙ୍ଗଲରୁ ଠାବ ହୋଇଛି ବିଦେଶୀ ପକ୍ଷୀ ପାଏଡ଼ ଥ୍ରଶ। ଏହାକୁ ବିଶିଷ୍ଟ ପକ୍ଷୀବିତ୍ ଓ କୁଲଡ଼ିହା ଗାଇଡ୍ ମନୋରଞ୍ଜନ ଦାସ ଚିହ୍ନଟ କରିଛନ୍ତି। ଏହି ପକ୍ଷୀର ଉଭୟ ପୁରୁଷ ଓ ମହିଳା ଦେଖିବାକୁ ମିଳିଛି। କୁଲଡ଼ିହା ପକ୍ଷୀ ସାରଣୀରେ ଆଉ ଏକ ବିଦେଶୀ ପକ୍ଷୀ ଯୋଡ଼ି ହୋଇଛି।
ପାଏଡ ଥ୍ରଶର ବୈଜ୍ଞାନିକ ନାମ ହେଉଛି ଗିଓକିଚଲା ୱାର୍ଡ଼ି ଓ ଏହା ଥ୍ରଶ ଫ୍ୟାମିଲିର ଅନ୍ତର୍ଭୁକ୍ତ। ଏହି ଥ୍ରସର ପୁରୁଷମାନେ ୨୨ସେମି ସ୍ପଷ୍ଟ ଭାବରେ କଳା ଏବଂ ଧଳା। ଉପର ଭାଗରେ ମୁଖ୍ୟତଃ କଳା, ପେଟ ପାଖରେ ମାଛ କାତି ପରି କଳା ଧଳା ରଙ୍ଗର ଆବରଣ ରହିବା ସହିତ ଆଖି ଉପରେ, ଡେଣା ଏବଂ ଲାଞ୍ଜ ଉପରେ ଧଳାର ପଟି ରହିଥାଏ, ଏହା ସହ ଗୋଡ଼ ହଳଦିଆ ରଙ୍ଗ ହୋଇଥାଏ। ନାରୀ ପକ୍ଷୀ ତଥା କିଶୋର ମାନେ ଦେଖିବାକୁ ପ୍ରାୟ ସମାନ ରହିବା ସହ ବାଦାମୀ ରଙ୍ଗ ଓ ଫିକା ବାଦାମୀ ରଙ୍ଗ ହୋଇଥାଏ। ଥଣ୍ଟଟି ସମ୍ପୂର୍ଣ୍ଣ ବଙ୍କା ହୋଇ ନ ଥାଏ। ଏହି ପକ୍ଷୀ ସାଧାରଣତଃ ଗ୍ରୀଷ୍ମ କାଳରେ ହିମାଳୟ ପାଦଦେଶ ତଥା ନେପାଳରେ ଖୁବ୍ ଅଧିକ ଦେଖିବାକୁ ମିଳିଥାଏ। ଏହାସହ ସେ ଶୀତ କାଳରେ ଦକ୍ଷିଣ ତଥା ଶ୍ରୀଲଙ୍କାରେ ଅଧିକ ପରିମାଣରେ ଦେଖିବାକୁ ମିଳିଥାଏ। ଏମାନେ ପ୍ରାୟତଃ ଏକ ଓ ସାଙ୍ଗ ହୋଇ ଖାଦ୍ୟ ଅନୁସନ୍ଧାନ କରିଥାନ୍ତି। ଏମାନେ କୀଟ, ପତଙ୍ଗ ଏବଂ ଫଳ ଖାଇବାକୁ ଅଧିକ ପସନ୍ଦ କରନ୍ତି।