ଅହମ୍ମଦାବାଦ,୯।୨: ସ୍ଥାନୀୟ ନରେନ୍ଦ୍ର ମୋଦି ଷ୍ଟାଡିୟମରେ ଗୁରୁବାର ଓ୍ବେଷ୍ଟଇଣ୍ଡିଜ ବିପକ୍ଷରେ ଖେଳାଯାଉଥିବା ଦ୍ୱିତୀୟ ଦିନିକିଆ ମ୍ୟାଚ୍ରେ ବଡ଼ ଏକ୍ସପେରିମେଣ୍ଟ କରିଥିଲା ଭାରତୀୟ ଦଳ। ଆମନ୍ତ୍ରଣ ପାଇ ବ୍ୟାଟିଂ କରିଥିବା ଟିମ୍ ଇଣ୍ଡିଆ ଲାଗି ଓପନିଂ କରିବାକୁ ରୋହିତ ଶର୍ମାଙ୍କ ସହ ଓହ୍ଲାଇଥିଲେ ରିଷଭ ପନ୍ତ। ଦଳରେ ଲୋକେଶ ରାହୁଲଙ୍କ ଉପସ୍ଥିତି ସତ୍ତ୍ୱେ ଟିମ୍ ମ୍ୟାନେଜମେଣ୍ଟ ପନ୍ତଙ୍କୁ ପଠାଇ ସଭିଙ୍କୁ ଚକିତ କରି ଦେଇଥିଲା। ବାମ-ଡାହାଣ କମ୍ବିନେଶନ ଏହି ନିଷ୍ପତ୍ତି ପଛର କାରଣ ହୋଇଥାଇପାରେ। କିନ୍ତୁ ଏହି ଏକ୍ସପେରିମେଣ୍ଟ ପୂରା ଫେଲ ମାରିଥିଲା।
ଆରମ୍ଭରୁ ଅଧିନାୟକ ରୋହିତ (୫)ଙ୍କ ଉଇକେଟ ପଡ଼ିବା ପରେ ପ୍ରଥମ ଥର ଓପନିଂ କରିଥିବା ପନ୍ତ ପେସରଙ୍କ ଆଗରେ ସଂଘର୍ଷ କରିଥିଲେ। ୩୪ ବଲରେ ୧୮ ରନ୍ କରି ଲେଗ୍ ସାଇଡ୍କୁ ଉଠାଇ ମାରିବାକୁ ଯାଇ କ୍ୟାଚ୍ ଆଉଟ୍ ହୋଇଥିଲେ ପନ୍ତ। ସେହି ଓଭରରେ ଆଉଟ୍ ହୋଇଥିଲେ ପୂର୍ବତନ ଅଧିନାୟକ ବିରାଟ କୋହଲି (୧୮ ରନ୍, ୩ ଚୌକା)। ପୂର୍ବ ମ୍ୟାଚ୍ ଭଳି ଏଥର ମଧ୍ୟ ସେ ବିଫଳ ହୋଇଥିଲେ। ରିପୋର୍ଟ ଲେଖା ହେବା ସୁଦ୍ଧା ଟିମ୍ ଇଣ୍ଡିଆ ୧୮ ଓଭରରେ ୩ ଉଇକେଟ ହରାଇ ୬୩ ରନ୍ କରିଛି। ଏବେ ଲୋକେଶ ରାହୁଲ (୪) ଏବଂ ସୂର୍ଯ୍ୟକୁମାର ଯାଦବ (୧୫) ଖେଳୁଛନ୍ତି।
