ନୂଆଦିଲ୍ଲୀ,୧୮।୮ : ପେସରଙ୍କ କାରଣରୁ ଟିମ୍ ଇଣ୍ଡିଆ ଚଳିତ ଇଂଲଣ୍ଡ ବିପକ୍ଷ ଟେଷ୍ଟରେ ୧-୦ର ଅଗ୍ରଣୀ ହାସଲ କରିଛି। କିନ୍ତୁ ଇଂଲଣ୍ଡ ଅଧିନାୟକ ଜୋ ରୁଟ୍ଙ୍କ ଆଗରେ ଭାରତୀୟ ପେସରମାନେ ସଂଘର୍ଷ କରୁଥିବା ଦେଖିବାକୁ ମିଳିଛି। ଚଳିତ ସିରିଜ୍ରେ ଏବେ ସୁଦ୍ଧା ଦୁଇଟି ଟେଷ୍ଟରେ ୨ ଶତକ ସହ ସର୍ବାଧିକ ୩୮୬ ରନ କରିଥିବା ରୁଟ୍ ଏବେ ଫୁଲ ଫର୍ମରେ। ୨୦୦୭ ପରେ ଇଂଲଣ୍ଡରେ ଟେଷ୍ଟ ସିରିଜ୍ ଜିତିବାକୁ ଲକ୍ଷ୍ୟ ରଖିଥିବା ବିରାଟ କୋହଲିଙ୍କ ନେତୃତ୍ୱାଧୀନ ଟିମ୍ ଇଣ୍ଡିଆକୁ ରୁଟ୍ଙ୍କ ଉଇକେଟ ଶୀଘ୍ର ନେବାକୁ ପଡ଼ିବ। ବିଶ୍ୱର ଦ୍ୱିତୀୟ ର଼୍ୟାଙ୍କଧାରୀ ଟେଷ୍ଟ ବ୍ୟାଟ୍ସମ୍ୟାନଙ୍କୁ କେଉଁ ଭଳି ଆଉଟ୍ କରାଯାଇପାରିବ, ସେଥି ଲାଗି ଟିମ୍ ଇଣ୍ଡିଆକୁ ପରାମର୍ଶ ଦେଇଛନ୍ତି କିଛି ପ୍ରାକ୍ତନ ଖେଳାଳି।
ଇଂଲଣ୍ଡର ପୂର୍ବତନ ସ୍ପିନର ମଣ୍ଟି ପାନେସରଙ୍କ ଅନୁଯାୟୀ, ରୁଟ୍ କ୍ରିଜକୁ ଆସିବା କ୍ଷଣି ଯଶପ୍ରୀତ ବୁମରାଙ୍କୁ ବୋଲିଂ କରାଇବା ଉଚିତ। ରୁଟ୍ ଏବେ ଚମତ୍କାର ଫର୍ମରେ ଅଛନ୍ତି। ତାଙ୍କୁ ଆଉଟ୍ କରିବା ପାଇଁ ଅଫ୍ ଷ୍ଟମ୍ପ ବାହାରେ ୫ମ ଷ୍ଟମ୍ପ ଲାଇନରେ ବୋଲିଂ କରିବା ଦରକାର। ଯେମିତି ଲଡର୍ସ ଟେଷ୍ଟର ଦ୍ୱିତୀୟ ଇନିଂସରେ ରୁଟ୍ଙ୍କୁ ଆଉଟ୍ କରିବା ପାଇଁ କୋହଲି ଏକ ସ୍ବତନ୍ତ୍ର ଉପାୟ କରିଥିଲେ, ଠିକ୍ ସେହିଭଳି ଆଗାମୀ ଟେଷ୍ଟରେ କରିବାକୁ ପଡ଼ିବ। ସେ ଭଲ ପୁଲ ଶଟ୍ ଖେଳୁଛନ୍ତି। ଏଣୁ ତାଙ୍କୁ ଶର୍ଟ ପିଚ୍ ବଲ ପକାଅ ନାହିଁ।
ଇଂଲଣ୍ଡ ବିପକ୍ଷରେ ୭ ମ୍ୟାଚ୍ ଖେଳିଥିବା ବୁମରା ୫ (୩ ଥର କ୍ୟାଚ୍ ଆଉଟ୍ ଓ ୨ ଥର ଏଲ୍ବିଡବ୍ଲ୍ୟୁ) ଥର ରୁଟ୍ଙ୍କୁ ଆଉଟ୍ କରିଛନ୍ତି।
ପ୍ରଥମେ ଚାପ ପକାଇ ରୁଟ୍ଙ୍କୁ ବିରକ୍ତ କରିବାକୁ ପଡ଼ିବ। ଯଦ୍ଦ୍ବାରା ସେ ବ୍ୟାଟିଂ ପୋଜିଶନରେ ପରିବର୍ତ୍ତନ କରିବେ, ଯାହା ଭାରତୀୟ ଦଳକୁ ଦରକାର। ଏହି ଭଳି ରୁଟ୍ଙ୍କୁ ଶୀଘ୍ର ଆଉଟ୍ କରାଯାଇପାରିବ ବୋଲି ଇଂଲଣ୍ଡ ପାଇଁ ୫୦ ଟେଷ୍ଟ ଖେଳି ୧୬୭ ଉଇକେଟ ନେଇଥିବା ପାନେସର କହିଛନ୍ତି। ସେହିଭଳି ପୂର୍ବତନ ଭାରତୀୟ ଅଧିନାୟକ ମନିନ୍ଦର ସିଂଙ୍କ ମତରେ ରୁଟ୍ ଯେଉଁ ଭଳି ଫର୍ମରେ ଅଛନ୍ତି, ତାଙ୍କୁ ଆଉଟ୍ କରିବା ଲାଗି ଧୈର୍ଯ୍ୟର ସହ ଉଚିତ ଲାଇନ ଓ ଲେନ୍ଥରେ ବୋଲିଂ କରିବାକୁ ପଡ଼ିବ। ସେ ଅନ୍ୟ କୌଣସି ଉପାୟ ନ ପାଇ ଭୁଲ କରିବେ।
