ଭୋପାଳ,୨୬।୩: ଭାଜପା ସଭାପତି ଜେ.ପି. ନଡା ରବିବାର କଂଗ୍ରେସର ସତ୍ୟାଗ୍ରହ ଏବଂ ନାଁ ନ ନେଇ ରାହୁଲ ଗାନ୍ଧୀଙ୍କୁ ଟାର୍ଗେଟ୍ କରିଥିଲେ। ଭୋପାଳର ଲାଲ ପରେଡ ଗ୍ରାଉଣ୍ଡରେ ଡିଭିଜନାଲ ବୁଥ ଅଧ୍ୟକ୍ଷ ସମ୍ମିଳନୀକୁ ସମ୍ବୋଧିତ କରି ନଡା କହିଛନ୍ତି, କଂଗ୍ରେସର ଅର୍ଥ କରପ୍ଶନ୍, କମିଶନ, ଡିଭିଜନ ଏବଂ ନେପୋଟିଜିମ୍ ହୋଇଥିବାବେଳେ ଭାଜପାର ଅର୍ଥ ବିକାଶ, ନିଷ୍ଠା, ସଂଗ୍ରାମ, ସମାଜର ସଶକ୍ତିକରଣ। ଆମେ ଯାହା କହୁ ତାହା କରି ଦେଖାଉ।
ରାହୁଲ ଗାନ୍ଧୀଙ୍କ ସମର୍ଥନରେ ସତ୍ୟଗ୍ରାହ କରୁଥିବା କଂଗ୍ରେସ ନେତାମାନଙ୍କୁ ଜେପି ନଡା କଡ଼ା ଜବାବ ଦେଇଥିଲେ। ସେ କହିଛନ୍ତି, ମୁଁ କୌଣସି ନେତାଙ୍କ ନାମ ନେବାକୁ ଚାହୁଁ ନାହିଁ, ସେ ଅହଂକାରରେ ବୁଡି ରହିଛନ୍ତି। ସେମାନଙ୍କ ଅହଂକାର ବହୁତ ବଡ ଏବଂ ବୁଝାମଣା ଛୋଟ। ଭାରତର ସମ୍ମାନ ଏବଂ ପରିଚୟ ପାଇଁ ମହାତ୍ମା ଗାନ୍ଧୀଙ୍କ ଦ୍ୱାରା ସତ୍ୟାଗ୍ରହ କରାଯାଇଥିଲା। ଏହି ଲୋକମାନେ ସତ୍ୟଗ୍ରାହ ଗଣତନ୍ତ୍ରର ପରମ୍ପରା ଭାଙ୍ଗିବା ପାଇଁ କରୁଛନ୍ତି। ନିୟମକୁ ବିଶ୍ୱାସ କରୁ ନାହଁାନ୍ତି। ପଛୁଆ ଜାତିମାନଙ୍କୁ ଚୋର ବୋଲି କହୁଛନ୍ତି।
ସୂଚନାଯୋଗ୍ୟ, ୨୦୧୯ରେ ରାହୁଲଙ୍କ ‘ସବୁ ମୋଦି ଚୋର’ ମନ୍ତବ୍ୟ ପାଇଁ ତାଙ୍କୁ ଦୋଷୀସାବ୍ୟସ୍ତ କରାଯିବା ସହ ୨ ବର୍ଷ ଜେଲଦଣ୍ଡ ହେବା ପରେ ତାଙ୍କ ଲୋକ ସଭା ସଭ୍ୟପଦ ଚାଲିଯାଇଛି। ଯଦି ତଳ କୋର୍ଟଙ୍କ ରାୟ ଉପରେ ଉଚ୍ଚତର କୋର୍ଟ ସ୍ଥଗିତାଦେଶ ନ ଲଗାନ୍ତି, ତେବେ ସେ ୮ ବର୍ଷ ପର୍ଯ୍ୟନ୍ତ ନିର୍ବାଚନ ଲଢ଼ିପାରିବେ ନାହିଁ। ଏହାର ପ୍ରତିବାଦରେ ହିମାଚଳପ୍ରଦେଶ, ରାଜସ୍ଥାନ, ତେଲଙ୍ଗାନା, ଜମ୍ମୁ-କଶ୍ମୀର, ପଞ୍ଜାବ, ହରିୟାଣା, ଗୁଜରାଟ ସମେତ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ କଂଗ୍ରେସ କର୍ମୀମାନେ ସତ୍ୟାଗ୍ରହରେ ସାମିଲ ହୋଇଥିଲେ।
