ଖୋର୍ଦ୍ଧା ଅଫିସ,୨୦ା୩: ଖୋର୍ଦ୍ଧା ଜିଲାରେ ଲଘୁ ଖଣିଜ ସମ୍ପଦ ଚୋରା ଚାଲାଣ ଚାଲିଛି। ମାଫିଆମାନେ ଦୈନିକ ଶହ ଶହ ଟ୍ରକରେ ମାଙ୍କଡ଼ା, ମୋରମ, ବାଲି, କଳାମୁଗୁନି ପଥର, ବଉଳମାଳା (ମନ୍ଦିର ନିର୍ମାଣରେ ବ୍ୟବହୃତ ମୂଲ୍ୟବାନ ପଥର) ଚାଲାଣ କରୁଛନ୍ତି। ବେଆଇନ ଭାବେ ପାହାଡ଼ ଖନନ ଚାଲିଛି। ଏଠାରୁ ପଥର ଜିଲା ତଥା ଜିଲା ବାହାରକୁ ଚାଲାଣ ହେଉଛି। ପ୍ରଶାସନ ପକ୍ଷରୁ ଚଢାଉ ଓ ଜରିମାନା ଆଦାୟ ସତ୍ତ୍ୱେ ଫରକ ପଡୁନାହିଁ। ମହାପ୍ରଭୁ ଶ୍ରୀଜଗନ୍ନାଥଙ୍କ ଜମି, ସରକାରୀ ଏବଂ ଗୋଚର ଜମି ଉପରେ ଏମାନଙ୍କ ନଜର ରହିଛି।
ଭୁବନେଶ୍ୱର ତଳି ଅଞ୍ଚଳ ପର୍ଯ୍ୟନ୍ତ ସବୁଠି ବେଆଇନ ଭାବେ ପଥର ଓ ମୋରମ ଚାଲାଣ ଚାଲିଛି। ତାପଙ୍ଗ ମୁଣ୍ଡିଆ, ଟାଙ୍ଗୀ ଆରିଆପଡ଼ା ବୃଷବନ୍ଧ ପାହାଡ଼, ୧୬ ନମ୍ବର ଜାତୀୟ ରାଜପଥ ଉଭୟ ପାର୍ଶ୍ୱରେ ରହିଥିବା ପାହାଡ଼କୁ ନଣ୍ଡା କରିସାରିଲେଣି ମାଫିଆ। ରାଜପଥ ସମ୍ପ୍ରସାରଣ ଆଳରେ ପଥର ଓ ମୋରମ ଚାଲାଣ କରାଯାଉଛି। ପ୍ରଶାସନ ପକ୍ଷରୁ ସାରଞ୍ଜାମ ଜବତ ହେଉଛି, ପରେ ମୋଟା ଅଙ୍କ ନେଇ ଅଭିଯୁକ୍ତଙ୍କୁ ଖସାଇ ଦିଆଯାଉଛି। ପଥର, ମୋରମ ଚାଲାଣ ଯୋଗୁ ରାସ୍ତାଘାଟ ଖାଲଖମା ହୋଇଛି। ଅସରାଏ ବର୍ଷା ହେଲେ କୃତ୍ରିମ ହ୍ରଦ ପାଲଟୁଛି। ଜାତୀୟ ରାଜପଥ ଏମାନଙ୍କ ଗଳାବାଟ ସାଜିଛି। ପ୍ରଶାସନ ପକ୍ଷରୁ ଖଣି ଉପରେ ଚଢ଼ାଉ ହେଉଛି। ମେଶିନ, ଯନ୍ତ୍ରପାତି ଓ ମାଲ ବୋଝେଇ ଟ୍ରକ ଆଦି ଭାରି ଯାନବାହନ ଜବତ କରାଯାଉଛି। କିନ୍ତୁ ମାଫିଆ ଖସିଯାଉଛନ୍ତି। ଚୋରା ଚାଲାଣ ପଛରେ ରାଜନୈତିକ ବ୍ୟକ୍ତି, ବଡ଼ବଡ଼ିଆଙ୍କ ହାତ ରହିଥିବାବେଳେ ପ୍ରଶାସନ ଓ ପୋଲିସ ଚୁପ ବସିଥିବା ସାଧାରଣରେ ଅଭିଯୋଗ ହେଉଛି। ଚୋରା ଚାଲାଣ ଯୋଗୁ ସରକାର ବିପୁଳ ରାଜସ୍ବ ହରାଉଛନ୍ତି। ବେଆଇନ ପଥର ଖନନ ଓ ଚାଲାଣ, ବ୍ଲାଷ୍ଟିଙ୍ଗ୍ ବନ୍ଦ କରାଯିବା ସହ ଗୋଚର, ଶ୍ରୀମନ୍ଦିର ପ୍ରଶାସନ ଜମିକୁ ସୁରକ୍ଷା ଦେବାକୁ ଅଞ୍ଚଳବାସୀ ଦାବିକରି ଆସୁଛନ୍ତି। ଏ ନେଇ ପ୍ରଶାସନକୁ ଅଭିଯୋଗ ମଧ୍ୟ କରୁଛନ୍ତି। ହେଲେ ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି କହି ପ୍ରଶାସନ ଚୁପ୍ ବସିପଡୁଛି। ପୂର୍ବରୁ ଏସ୍ଟିଏଫ୍ର ଚଢ଼ାଉ ଫଳରେ ମାଫିଆଙ୍କ ମଧ୍ୟରେ ଛନକା ପଶିଥିଲା। ତେବେ କିଛି ଦିନ ପରେ ଏହି ଚଢାଉ ଶିଥିଳ ପଡ଼ିିଗଲା। ପ୍ରଶାସନର ଚଢାଉ କେବଳ ଲୋକ ଦେଖାଣିଆ ବୋଲି ସାଧାରଣରେ ଅଭିଯୋଗ ହେଉଛି। ଚୋରା ଚାଲାଣକୁ ରୋକା ନ ଗଲେ ଆଗକୁ ଖୋର୍ଦ୍ଧା ସହରର ଲଘୁ ଖଣିଜ ସମ୍ପଦ ଲୋପ ପାଇଯିବ ବୋଲି ପରିବେଶବିତ ମତ ଦେଉଛନ୍ତି।
ନେଇ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀ କହିଛନ୍ତି, ଲଘୁ ଖଣିଜ ଚୋରା ଚାଲାଣ ରୋକିବା ଉପରେ ଗୁରୁତ୍ୱ ଦିଆଯାଇଛି। ପ୍ରଶାସନ, ପୋଲିସ ଓ ଜଙ୍ଗଲ ବିଭାଗର ଅଧିକାରୀଙ୍କୁ ନେଇ ଯୁଗ୍ମ କମିଟି ଗଠନ ହୋଇଛି। ଏହି କମିଟି ବେଆଇନ ଭାବେ ଚାଲିଥିବା ପଥରଖଣି ଓ କ୍ରଶର ୟୁନିଟ ଉପରେ ଚଢାଉ କରୁଛି। ଚୋରା ଚାଲାଣରେ ବ୍ୟବହୃତ ଯାନବାହନ ଧରାପଡିଲେ ଜବତ କରାଯାଇ ଜରିମାନା ଆଦାୟ ସହ ଏହାର ଲାଇସେନ୍ସ ରଦ୍ଦ କରାଯାଉଛି। ଜିଲା ପ୍ରଶାସନ ପକ୍ଷରୁ ସ୍ବତନ୍ତ୍ର ଡ୍ରାଇଭ ଆରମ୍ଭ କରାଯାଇ ଲକ୍ଷାଧିକ ଟଙ୍କା ଜରିମାନା ଆଦାୟ ସହ ଥାନାରେ ଏକାଧିକ ମାମଲା ରୁଜୁ ହୋଇଛି। ଚୋରା ଚାଲାଣକୁ ପ୍ରଶ୍ରୟ ଦିଆଯିବ ନାହିଁ। ଆଗାମୀ ଦିନରେ ଚଢ଼ାଉକୁ ଆହୁରି ଜୋରଦାର କରାଯିବ ବୋଲି ଜିଲାପାଳ ପ୍ରକାଶ କରିଛନ୍ତି।