ବଲାଙ୍ଗୀର,୧୪ା୮(ବୀରେନ୍ଦ୍ର କୁମାର ଝାଙ୍କର): ଚାକିରି ପ୍ରଲୋଭନ ଦେଖାଇ ଭୁବନେଶ୍ୱରର ଜଣେ ଯୁବତୀଙ୍କଠାରୁ ଅର୍ଥ ଶୋଷଣ ସହ ମାନସିକ ନିର୍ଯାତନା ଦିଆଯାଇଥିବା ନେଇ ରବିବାର ସ୍ଥାନୀୟ ଟାଉନ୍ ଥାନାରେ ଅଭିଯୋଗ ହୋଇଥିଲା। ଭୁବନେଶ୍ୱରର ଜଣେ ଯୁବତୀ ବଲାଙ୍ଗୀର ଟାଉନ୍ ଥାନାରେ ଅଭିଯୋଗ କରିଥିଲେ। ସମ୍ପୃକ୍ତ ଯୁବତୀଙ୍କୁ ଏକ ସଂସ୍ଥାର ହଷ୍ଟେଲରୁ ବଲାଙ୍ଗୀର ଯୁବ କଂଗ୍ରେସ ନେତା ନାସିର ଖାନ୍ ଉଦ୍ଧାର କରି ଟାଉନ୍ ଥାନାକୁ ଆଣିଥିଲେ। ପୋଲିସ କାର୍ଯ୍ୟାନୁଷ୍ଠାନ ପରେ ଉଦ୍ଧାର ଯୁବତୀଙ୍କୁ ତାଙ୍କ ମାତା ଓ ଭଉଣୀ ଭୁବନେଶ୍ୱର ନେଇ ଫେରିଯାଇଥିବା ଜଣାପଡିଛି।
ଟାଉନ୍ ଥାନାରେ ଉଦ୍ଧାର ଯୁବତୀ ମୋହିନୀ ଗଣମାଧ୍ୟମ ପ୍ରତିନିଧିଙ୍କୁ କହିଛନ୍ତି ଯେ, ଭୁବନେଶ୍ୱରର ସୋନା ନାମକ ତାଙ୍କର ଜଣେ ସାଙ୍ଗ ପୂର୍ବରୁ ବଲାଙ୍ଗୀର ଆସି ଉକ୍ତ ସଂସ୍ଥାରେ କାମ କରୁଥିଲେ। ସେ ମୋହିନୀଙ୍କୁ ଉକ୍ତ ସଂସ୍ଥାରେ କାମ କରିବାକୁ କହିଥିଲେ। ଏପରିକି ଉକ୍ତ କମ୍ପାନୀ ରାଜ୍ୟ ସରକାରଙ୍କ ଦ୍ୱାରା ପରିଚାଳିତ ହୋଇଥିତ୍ବାରୁ ପରେ ନିୟମିତ ଚାକିରି ହୋଇଯିବ ବୋଲି କହିଥିଲେ। ଏଭଳି ସୂଚନା ପାଇବା ପରେ ଯୁବତୀ ଜଣକ ପ୍ରାୟ ୬ ଦିନ ତଳେ ବଲାଙ୍ଗୀରରେ ପହଞ୍ଚତ୍ଥିଲେ। ସେଠାରୁ ତାଙ୍କୁ ଏକ ହଷ୍ଟେଲରେ ରଖାଯାଇଥିଲା। ଚାକିରୀ ପାଇଁ ଫର୍ମ ଫିଲପ୍ ବାବଦକୁ ୨ ହଜାର ଏବଂ ୧୨ ଦିନ ଟ୍ରେନିଂ, ହଷ୍ଟେଲରେ ରହିବା ଏବଂ ଖାଇବା ବାବଦକୁ ପ୍ରଥମେ ୧୨ ହଜାର ଟଙ୍କା ଦେବାକୁ ପଡିବ ବୋଲି ତାଙ୍କୁ କୁହାଯାଇଥିଲା। ମୋହିନୀଙ୍କଠାରୁ ୧୨ ହଜାର ଟଙ୍କା ଉକ୍ତ ସଂସ୍ଥା ନେବା ପରେ ତାଙ୍କୁ ସଦର ଥାନା ସମ୍ମୁଖ ଗଳିରେ ଥିବା ଏକ ଭଡ଼ା ଘର ହଷ୍ଟେଲରେ ରହିବାକୁ କୁହାଯାଇଥିଲା। ସେଠାରେ ଟ୍ରେନିଂରେ କ’ଣ ସବୁ ନୀତିନିୟମ ରହିଛି କହୁଥିଲେ। ଯୁବତୀ ଜଣକ ଦୁଇଦିନ ରହିବା ପରେ ସନ୍ଦେହ କରି ନିଜ ପରିବାରବର୍ଗଙ୍କୁ ସୂଚନା ଦେବା ସହ ଯୁବ କଂଗ୍ରେସ ନେତା ନାସିର ଖାନ୍ଙ୍କ ସହ ଯୋଗାଯୋଗ କରିଥିଲେ। ଏହାପରେ ଖାନ୍ ସମ୍ପୃକ୍ତ ଯୁବତୀଙ୍କୁ ଉଦ୍ଧାର କରି ଟାଉନ୍ ଥାନାକୁ ଆଣିଥିଲେ। ଟାଉନ୍ ଥାନାରେ ଯୁବତୀ ଜଣକ ଅଭିଯୋଗ କରିବା ପରେ ପୋଲିସ ଗ୍ଳେଜ୍ ଇଣ୍ଡିଆ ସଂସ୍ଥା ବଲାଙ୍ଗୀର ଶାଖାର କେତେଜଣ କର୍ମଚାରୀଙ୍କୁ ଥାନାକୁ ଡାକିଥିଲେ। ଉକ୍ତ ସଂସ୍ଥାର କର୍ମଚାରୀମାନେ ଯୁବତୀଙ୍କ ସମସ୍ତ ଟଙ୍କା ଫେରସ୍ତ କରିଥିଲେ।