ପୁରୀ, ୩ା୯(ଅଜିତ ମହାନ୍ତି):ସମୁଦ୍ରକୂଳ ଥାନା ଅନ୍ତର୍ଗତ ପେଣ୍ଠକଟା କନକଦୁର୍ଗା ସାହିରେ ଶନିବାର ମାଛଧରା ଡଙ୍ଗା କାରଖାନା ନିକଟସ୍ଥ ଏକ ଡଙ୍ଗାରେ ବୋମା ବିସ୍ଫୋରଣ ଘଟିଛି। ଏହି ବିସ୍ଫୋରଣରେ କୌଣସି ବ୍ୟକ୍ତି ମୃତାହତ ହୋଇ ନ ଥିବା ବେଳେ ଏକ ବୁଲା କୁକୁରର ଶରୀର ଖଣ୍ଡବିଖଣ୍ଡିତ ହେବା ସହ ଉକ୍ତ ଡଙ୍ଗା କ୍ଷତିଗ୍ରସ୍ତ ହୋଇଛି। ଖବର ପାଇ ସମୁଦ୍ରକୂଳ ଥାନା ପୋଲିସ ଏବଂ ସିଟି ଡିଏସପି ଘଟଣାସ୍ଥଳରେ ପହଞ୍ଚତ୍ ତଦନ୍ତ କରିଛନ୍ତି।
ସୂଚନା ଅନୁଯାୟୀ, ସମୁଦ୍ରକୂଳ ଥାନା ଅନ୍ତର୍ଗତ ପେଣ୍ଠକଟା କନକଦୁର୍ଗା ସାହିରେ ସକାଳେ ବଡ଼ ଶବ୍ଦ ଶୁଭିଥିଲା। ଶବ୍ଦ ଶୁଣି ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚତ୍ବାରୁ ଗୋଟିଏ କୁକୁର ଖଣ୍ଡ ଖଣ୍ଡ ହୋଇ ମରିପଡ଼ିଥିବା ଦେଖିବାକୁ ପାଇଥିଲେ। ପରେ ଏହି ଖବର ପାଇ ସମୁଦ୍ରକୂଳ ଥାନା ପୋଲିସ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଛି। ତେବେ ଘଟଣା ସମ୍ପର୍କରେ ସ୍ଥାନୀୟ ବାସିନ୍ଦାଙ୍କ କହିବା ଅନୁଯାୟୀ, ପୁରୀ ସହରରେ ଏପରି ଘଟଣା ପ୍ରଥମ ଥର ପାଇଁ ଘଟିଛି। ସାହିରେ ବୋଟ୍ ଫ୍ୟାକ୍ଟ୍ରି ରହିଛି, ଯେଉଁଠାରେ ବୋଟ୍ ତିଆରି କରାଯାଇଥାଏ। ଶନିବାର ସକାଳ ସମୟରେ କାରିଗରମାନେ ଫ୍ୟାକ୍ଟ୍ରିକୁ ଆସିଥିଲେ। ତେବେ ଫ୍ୟାକ୍ଟ୍ରି ବାହାରେ ଗୋଟିଏ ଡଙ୍ଗା ରହିଥିଲା। ଗୋଟିଏ କୁକୁର ତା’ ଭିତରୁ କ’ଣ ଗୋଟିଏ ଜିନିଷ ଭିଡୁଥିଲା। ତେବେ କିଛି ସମୟ ପରେ ପ୍ରଚଣ୍ଡ ଶଦ୍ଦ ଶୁଣାଗଲା। ବାହାରକୁ ଆସି ଦେଖିଲା ବେଳକୁ କୁକୁର ଖଣ୍ଡ ବିଖଣ୍ଡିତ ହୋଇ ବିସ୍ଫୋରଣର ପ୍ରାୟ ୧୦୦ ମିଟର ଦୂରରେ ମୃତାବସ୍ଥାରେ ପଡ଼ିିଛି। କେହି ଦୁର୍ବୃତ୍ତ ବୋମା ପୋତିଦେଇଥିବା ସ୍ଥାନୀୟ ଲୋକେ କହିଛନ୍ତି। ସେହିପରି ପାଖରେ ମଦ ଦୋକାନ ଥିବାରୁ ଲୋକେ ବିଳମ୍ବିତ ରାତି ପର୍ଯ୍ୟନ୍ତ ମଦ ପିଉଛନ୍ତି ଓ ଅସାମାଜିକ କାର୍ଯ୍ୟ କରୁଛନ୍ତି, ତେଣୁ ପୋଲିସ ଏଥିପ୍ରତି ଧ୍ୟାନ ଦେବା ଆବଶ୍ୟକ। ସିଟି ଡିଏସ୍ପି ପ୍ରଶାନ୍ତ କୁମାର ସାହୁ କହିଛନ୍ତି, ବାହାରେ ବିସ୍ପୋରଣ ହୋଇଥିବା ନେଇ ଖବର ମିଳିଥିଲା। ପୋଲିସ ପକ୍ଷରୁ ତଦନ୍ତ ଆରମ୍ଭ କରାଯାଇଛି। ବୋମା ସ୍କ୍ବାଡ୍ ଆସି ତାହାର ତଦନ୍ତ କରୁଛି। ବୋଟ୍ ନିର୍ମାଣ ପାଇଁ ବିଭିନ୍ନ ପ୍ରକାର କେମିକାଲ ଦରକାର ପଡିଥାଏ, ଯାହା ଜ୍ୱଳନଶୀଳ । ସେଥିପାଇଁ ବିସ୍ଫୋରଣ ହୋଇଥାଇପାରେ। ଏ ନେଇ ପୋଲିସ ପକ୍ଷରୁ ତଦନ୍ତ କରାଯାଉଛି ଥାନା ଅଧିକାରୀ କହିଛନ୍ତି, ବିସ୍ଫୋରଣର କାରଣ ଜଣାପଡିନାହିଁ। ପୋଲିସ ପକ୍ଷରୁ ତଦନ୍ତ ଜାରି ରହିଛି। ତେବେ ମାଛ ମାରିବା ପାଇଁ ମତ୍ସ୍ୟଜୀବୀଙ୍କ ପକ୍ଷରୁ ଗଭୀର ସମୁଦ୍ରରେ ଏକ ପ୍ରକାର ବୋମା ବ୍ୟବହାର କରାଯାଇଥାଏ। ସେହି ବିସ୍ଫୋରଣ ହୋଇଥାଇପାରେ ବୋଲି ଅନୁମାନ କରାଯାଉଛି। ତଦନ୍ତ ପରେ ଘଟଣା ସମ୍ପର୍କରେ ଜଣାପଡିବ।
