ପାହାଡ଼ରେ ଖଞ୍ଜୁଥିଲେ ବିସ୍ଫୋରକ: ଧରାପଡ଼ିଲେ ୩ ଯୁବକ

ସୁନାବେଡା/ସେମିଳିଗୁଡା,୨୫ା୯(ସ୍ବ.ପ୍ର.): ପାହାଡ଼ରେ ପଥର ଫଟାଇବା ଲାଗି ବିସ୍ଫୋରକ ଖଞ୍ଜୁଥିବା ବେଳେ ସେମିଳିଗୁଡ଼ା ପୋଲିସ ୩ ଜଣ ଯୁବକଙ୍କୁ ଗିରଫ କରିଛି। ସେମାନେ ହେଲେ ଉପର ମାନିଆ ଗ୍ରାମର ତ୍ରିନାଥ ବେନିଆ(୨୬), ଲୁଙ୍ଗୁରି ଗ୍ରାମର ଧନୀ ଖରା(୩୦) ଓ ଗୋବିନ୍ଦ ଖରା(୪୨)। ପୋଲିସ ତାଙ୍କଠାରୁ ୯୬ଟି ଜିଲୋଟିନ୍‌, ୧୭ଟି ଡିଟୋନେଟର ଏବଂ ୪ ବଣ୍ଡଲ ବିଦ୍ୟୁତ୍‌ ତାର ଜବତ କରିଛି।

ପୋଲିସ ସୂଚନା ମୁତାବକ, ଶନିବାର ଅପରାହ୍ନରେ ସେମିଳିଗୁଡ଼ା ଏସ୍‌ଆଇ ଦୀପକ ବାରିକ ପୋଲିସ କର୍ମଚାରୀଙ୍କ ସହ ପାଟ୍ରୋଲିଂ କରୁଥିଳେ। ସେତିକିବେଳେ ୩ଜଣ ଯୁବକ ଦାମନଯୋଡି ରାସ୍ତାରେ ଥିବା ପାହାଡ଼ରେ ବିସ୍ଫୋରକ ସାମଗ୍ରୀ ଖଞ୍ଜୁଥିବା ଦେଖିବାକୁ ପାଇଥିଲେ। ପୋଲିସ ତାଙ୍କୁ ଧରି ପଚରାଉଚରା କରିଥିଲା। ଏପରିକି ପୋଲିସ ସେମାନଙ୍କ ନିକଟରୁ ଉପରୋକ୍ତ ପରିମାଣର ବିସ୍ଫୋରକ ସାମଗ୍ରୀ ଜବତ କରିଥିଲା। ଏନେଇ ସେମିଳିଗୁଡା ଥାନା ପୋଲିସ ଏକ ମାମଲା(ନଂ.୧୪୦/୨୨) ରୁଜୁ କରି ଘଟଣାର ଅଧିକ ତଦନ୍ତ ଚଳାଇଛି।