ମୁମ୍ବାଇ,୧।୧୧: ଜାତୀୟତାବାଦୀ କଂଗ୍ରେସ ପାର୍ଟି (ଏନ୍ସିପି)ର ବରିଷ୍ଠ ନେତା ତଥା ମହାରାଷ୍ଟ୍ର କ୍ୟାବିନେଟ ମନ୍ତ୍ରୀ ନଓ୍ବାବ ମଲିକ ଅଣ୍ଡରଓ୍ବାଲର୍ଡ ସହ ଲିଙ୍କ୍ରେ ଅଛନ୍ତି। ଦୀପାବଳି ପରେ ପ୍ରମାଣ ସହ ସବୁ ପଦାରେ ପକାଇବି ବୋଲି କହିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ। ଏଥି ପୂର୍ବରୁ ସାମ୍ନାକୁ ଆସିଥିବା ଏକ ମ୍ୟୁଜିକ ଭିଡିଓରେ ଫଡ଼ନାଭିସଙ୍କ ସ୍ତ୍ରୀ ଅମୃତାଙ୍କ କଣ୍ଠଦାନକୁ ଟାର୍ଗେଟ କରିଥିଲେ ନଓ୍ବାବ। ସେହି ଭିଡିଓର ନିର୍ମାଣ ଲାଗି ଟଙ୍କା ଲଗାଇଥିଲେ ଜଣେ ଡ୍ରଗ୍ସ ବେପାରୀ, ଯିଏକି ଏବେ ଜେଲରେ ଅଛନ୍ତି। ନଓ୍ବାବ ମଲିକଙ୍କ ଏଭଳି ଅଭିଯୋଗକୁ ହାସ୍ୟସ୍ପଦ କହିଛନ୍ତି ଫଡ଼ନାଭିସ।
”ଯେଉଁମାନେ ଅଣ୍ଡରଓ୍ବାଲର୍ଡ ସହ ଜଡ଼ିତ, ସେମାନେ ମୋ ବିଷୟରେ କିଛି କହିବା ଉଚିତ ନୁହେଁ। ଅଣ୍ଡରଓ୍ବାଲର୍ଡ ସହ ନଓ୍ବାବଙ୍କ ସମ୍ପର୍କରେ ଥିବା ମୋ ପାଖରେ ପ୍ରମାଣ ଅଛି। ମୁଁ କେବଳ ଦୀପାବଳିକୁ ଅପେକ୍ଷା କରିଛି। ପାର୍ବଣ ପରେ ମୁଁ ବଡ଼ ବୋମା ପକାଇବି“ ବୋଲି ସୋମବାର ଖବରଦାତା ସମ୍ମିଳନୀରେ ଫଡନାଭିସ କହିଛନ୍ତି। ଏନ୍ସିପି ମୁଖ୍ୟ ଶରଦ ପାଓ୍ବରଙ୍କୁ ମଧ୍ୟ ପ୍ରମାଣ ପଠାଇବି ବୋଲି ସେ କହିଛନ୍ତି। ଉଲ୍ଲେଖଯୋଗ୍ୟ, ମହାରାଷ୍ଟ୍ରର କ୍ୟାବିନେଟ୍ ମନ୍ତ୍ରୀଙ୍କ ଜ୍ୱାଇଁ ସମୀର ଖାନଙ୍କୁ ଚଳିତ ବର୍ଷ ଏକ ଡ୍ରଗ୍ସ ମାମଲାରେ ଏନ୍ସିବି ଗିରଫ କରିଥିଲା। ସେ ଏବେ ଜାମିନରେ ବାହାରେ ଅଛନ୍ତି।