ଯାଜପୁର ଅଫିସ,୫।୪: ଇଷ୍ଟକୋଷ୍ଟ ରେଲୱେ ଅନ୍ତର୍ଗତ ୯ ପାସେଞ୍ଜର ଓ ମେମୁ ଟ୍ରେନ୍କୁ ସ୍ପେଶାଲ ଟ୍ରେନ ଭାବେ ଘୋଷଣା କରାଯାଇଛି। ଏହାସହ ଏହି ଟ୍ରେନ୍ଗୁଡ଼ିକ ନିମନ୍ତେ ଅଣସଂରକ୍ଷିତ ମେଲ୍ କିମ୍ବା ଏକ୍ସପ୍ରେସ୍ ଟିକେଟ୍ ବ୍ୟବସ୍ଥା କରାଯାଇଛି। ୩୧ା୩ା୨୦୨୧ରେ ରେଲୱେ ବୋର୍ଡର ନିଷ୍ପତ୍ତିକ୍ରମେ ଇଷ୍ଟକୋଷ୍ଟ ରେଲୱେର ଉପମୁଖ୍ୟ ପରିଚାଳନା ପ୍ରବନ୍ଧକ ଡି.ଆର. ପାଲ ଉପରୋକ୍ତ ନିର୍ଦ୍ଦେଶ ଜାରି କରିଛନ୍ତି। ଏଥିରେ ଭୁବନେଶ୍ୱର-କେନ୍ଦୁଝର, ପୁରୀ-ଅନୁଗୋଳ, ଭୁବନେଶ୍ୱର-ଭଦ୍ରକ, ପୁରୀ-କଟକ, କଟକ-ଭଦ୍ରକ, କଟକ-ପାରାଦୀପ, କଟକ-ଭଦ୍ରକ(ସନ୍ଧ୍ୟା), ବିଶାଖାପାଟଣା-ଗୁଣୁପୁର ଓ ବିଶାଖାପାଟଣା-ରାୟପୁର (୫୮୫୨୮)କୁ ସାମିଲ କରାଯାଇଛି। କୋଭିଡ-୧୯ କଟକଣା ମଧ୍ୟରେ ସାଧାରଣ ଜନତାଙ୍କ ଆର୍ଥିକ ମାନଦଣ୍ଡ ଦୁର୍ବଳ ହୋଇ ପଡ଼ିଥିବାବେଳେ କେନ୍ଦ୍ର ସରକାରଙ୍କ ଅଧୀନ ରେଲଓ୍ବେ ବୋର୍ଡ ସେବା ନାମରେ ସାଧାରଣ ଜନତାଙ୍କୁ ଶୋଷଣ କରୁଥିବା ଏଥିରୁ ସ୍ପଷ୍ଟ ହେଉଛି। ସୂଚନାଯୋଗ୍ୟ ଯେ, ପୂର୍ବତଟ ରେଳପଥ ୨୩ା୩ା୨୦୨୧ରେ ୧୬ଟି ପାସେଞ୍ଜର/ଏକ୍ସପ୍ରେସ ଟ୍ରେନ୍ ଏପ୍ରିଲରେ ଚଳାଚଳ କରିବାକୁ ନୋଟିସ ଜାରି କରିଥିଲେ। କରୋନା କଟକଣା ପରେ ଏହି ନିଷ୍ପତ୍ତି ସାଧାରଣ ଲୋକଙ୍କ ମଧ୍ୟରେ ଆଶ୍ୱସ୍ତି ଆଣିଥିଲା। କିନ୍ତୁ ରେଲଓ୍ବେ ବୋର୍ଡର ଏକପାଖିଆ ନିଷ୍ପତ୍ତି କ୍ରମେ ସମସ୍ତ ମେମୁ/ପାସେଞ୍ଜର ଟ୍ରେନ ପାଇଁ ଉପରୋକ୍ତ ବ୍ୟବସ୍ଥା କରାଯାଇଛି। ଫଳରେ ସାଧାରଣ ଯାତ୍ରୀଙ୍କୁ ଅଣସଂରକ୍ଷିତ ଏକ୍ସପ୍ରେସ୍ ଟ୍ରେନ୍ର ଟିକେଟ୍ ମୂଲ୍ୟ ଦେବାକୁ ପଡ଼ିବ।