ଆସିକା/ହିଞ୍ଜିଳିକାଟୁ/ ପାରଳାଖେମୁଣ୍ଡି, ୨୨ା୫(ଡି.ଏନ୍.ଏ.): ଆସିକା ଅଞ୍ଚଳରେ ରବିବାର ଅପରାହ୍ନରେ କାଳବୈଶାଖୀ ଯୋଗୁ ପ୍ରବଳ ବେଗରେ ପବନ ବୋହିଥିଲା। ଏହାର ପ୍ରଭାବରେ ବହୁ ସ୍ଥାନରେ ବଡ଼ ବଡ଼ ଡାଳ ସବୁ ଭାଙ୍ଗିପଡ଼ିଛି। ଆସିକା ଏନ୍ଏସିର ରେଡିକା ସାହିଠାରେ ନିଜ ପରିବାର ସହ ରହୁଥିବା ତ୍ରିନାଥ ମହାରଣାଙ୍କ ଘର ଉପରେ ବଡ଼ ଗଛଡାଳ ଭାଙ୍ଗି ପଡ଼ିବାରୁ ଦୁଇ ବଖରା ଆଜବେଷ୍ଟସ ଛାତ ଭାଙ୍ଗିଯାଇଛି। ଏହି ସମୟରେ ତ୍ରିନାଥ ଓ ତାଙ୍କ ସ୍ତ୍ରୀ, ପୁଅ ବୋହୂ ଓ ଦୁଇଜଣ ଶିଶୁ ଘରେ ଥିଲେ ମଧ୍ୟ ଦୁର୍ଘଟଣାରୁ ବର୍ତ୍ତି ଯାଇଛନ୍ତି। ଖବର ପାଇ ଆସିକା ଏନ୍ଏସି ଅଧ୍ୟକ୍ଷା ବିନେତା ସ୍ବାଇଁ, ନିର୍ବାହୀ ଅଧିକାରୀ ଲୋକନାଥ ବେଜ୍ ପହଞ୍ଚତ୍ କ୍ଷତିଗ୍ରସ୍ତ ପରିବାରକୁ କିଛି ଆର୍ଥତ୍କ ସହାୟତା ଦେବା ସହ ସରକାରୀ ସହାୟତା ଲାଗି କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିବେ ବୋଲି କହିଛନ୍ତି। ଅଗ୍ନିଶମ ଦଳ ଘଟଣାସ୍ଥଳରେ ପହଞ୍ଚତ୍ ଭାଙ୍ଗିଥିବା ଗଛ ଡାଳସବୁ କାଟି ବାହାର କରିଥିଲେ।
ହିଞ୍ଜିଳିକାଟୁରେ କାଳବୈଶାଖି ପ୍ରଭାବରେ ବର୍ଷା, ପବନ କାରଣର ବିଭିନ୍ନ ସ୍ଥାନରେ ଗଛ ଉପୁଡ଼ି ଯିବା ସହ ଚାଳଛପର ଉଡିଯାଇଛି। ବିଜୁପଟ୍ଟନାୟକ ଛକ ପରିବା ବଜାରରେ ଥିବା ଅସ୍ଥାୟୀ ଦୋକାନ ପାଲ ଛପର ଉଡ଼ିଯାଇଛି। ଏଥି ସହିତ ହିଞ୍ଜିଳିକାଟୁ ଲକ୍ଷ୍ମୀନୃସିଂହ ବଣିକସଂଘ ଦୁର୍ଗା ମଣ୍ଡପ ନିକଟରେ ଏନ୍ଏଚ୍ ନଂ.୫୯ ଉପରେ ଡିଭାଇଡରରେ ଥିବା ବିଦ୍ୟୁତ୍ ଖୁଣ୍ଟ ଲୋଟି ପଡିଥିଲା। ଫଳରେ ବହୁ ସମୟ ଧରି ଯାନବାହାନ ଚଳାଚଳରେ ବାଧା ସୃଷ୍ଟି ହୋଇଥିଲା । ହିଞ୍ଜିଳିକାଟୁ ପୌରପରିଷଦ କର୍ମଚାରୀମାନେ ପହଞ୍ଚି ଲାଇଟ ଖିଣ୍ଟକୁ ରାସ୍ତାରୁ ହରାଇଥିଲେ।
ସେହିପର ଗଜପତି ଜିଲାର ବିଭିନ୍ନ ସ୍ଥାନରେ ରବିବାର କାଳବୈଶାଖୀର ପ୍ରଭାବରେ ପବନ ସାଙ୍ଗକୁ ବର୍ଷା ହେବାରୁ ବଡ଼ବଡ଼ ଗଛ ଓ ବିଦ୍ୟୁତ୍ ଖୁଣ୍ଟ ପଡି ରାସ୍ତା ଅବରୋଧ ହେବା ସହ ବାସଗୃହ ନଷ୍ଟ ହୋଇଛି। କାଶୀନଗର ବ୍ଲକର ରାଣୀପେଣ୍ଟ ଗ୍ରାମ ନିକଟରେ ରାସ୍ତାରେ ଥିବା ଏକ ବଡ଼ ଗଛ ପଡିଯିବା ସହ ପବନର ପ୍ରଭାବରେ ବିଦ୍ୟୁତ୍ ଖୁଣ୍ଟ ଭାଙ୍ଗି ରାସ୍ତା ଉପରେ ପଡିଥିବା ଦେଖିବାକୁ ମିଳିଛି। ସେହିପରି ସିଦ୍ଧାମଡଙ୍ଗ ଗ୍ରାମରେ ମଧ୍ୟ ଏକ ଗଛ ପଡି ବାସଗୃହ ଭାଙ୍ଗିଯାଇଛି। ଫଳରେ କାଶୀନଗର ଓ ପାରଳାଖେମୁଣ୍ଡି ମୁଖ୍ୟ ରାସ୍ତା ଅବରୋଧ ହୋଇଛି। ସ୍ଥାନୀୟ ଗ୍ରାମବାସୀ ଓ ଅଗ୍ନିଶମ ବିଭାଗର କର୍ମଚାରୀ ମିଳିତ ଭାବେ ରାସ୍ତାରୁ ଗଛଗୁଡିକୁ ବାହାର କରୁଛନ୍ତି। ସେହିଭଳି ନୂଆଗଡ଼ ବ୍ଲକର ଖଜୁରିପଦା ଗ୍ରାମ ନିକଟ ରାସ୍ତାକଡ଼ରେ ଗଛ ପଡି କିଛି ସମୟ ପାଇଁ ରାସ୍ତା ଅବରୋଧ ହୋଇଥିଲା। ପରେ ଯୁଦ୍ଧକାଳୀନ ଭିତ୍ତିରେ ଅଗ୍ନିଶମ ବିଭାଗ କର୍ମଚାରୀ ଓ ଅଞ୍ଚଳବାସୀମାନେ ଅବରୋଧ କରିଥିବା ଗଛ ଗୁଡିକୁ ହଟାଇବା ପାଇଁ ଚେଷ୍ଟା କରୁଛନ୍ତି ।
