ପୁରୀ ଅଫିସ,୧୯।୨:ଦାରୁଦିଅଁଙ୍କ ପ୍ରତି ମନରେ ଅତ୍ୟନ୍ତ ଶ୍ରଦ୍ଧା ଓ ଭକ୍ତିଭାବନା ଦୁଇଜଣ ଦୃଷ୍ଟିହୀନ ଶ୍ରଦ୍ଧାଳୁଙ୍କୁ ଗୁରୁବାର ଶ୍ରୀକ୍ଷେତ୍ରକୁ ଟାଣି ଆଣିଥିଲା। ସେମାନେ ପ୍ରାୟ ୬୫ କି.ମି. ଚାଲିଚାଲି ଭୁବନେଶ୍ୱରରୁ ପୁରୀରେ ପହଞ୍ଚିଥିଲେ। ଏଠାରେ ପହଞ୍ଚିବା ପରେ ପ୍ରଶାସନ ପକ୍ଷରୁ ଜଣେ ଯାତ୍ରୀ ସହଯୋଗୀ ତାଙ୍କୁ ଶ୍ରୀମନ୍ଦିର ଭିତରକୁ ନେଇ ମହାପ୍ରଭୁଙ୍କ ଦର୍ଶନ କରାଇଥିଲେ। ଏହି ଦୁଇଜଣ ଦୃଷ୍ଟିହୀନ ଶ୍ରଦ୍ଧାଳୁ ହେଉଛନ୍ତି ବଂଶୀଧର ପ୍ରଧାନ ଏବଂ ପ୍ରଶାନ୍ତ ସାହୁ। ଜନ୍ମରୁ ଦୁହେଁ ଦୃଷ୍ଟିଶକ୍ତି ହରାଇଥିବାରୁ ସ୍ବଚକ୍ଷୁରେ ଶ୍ରୀଜୀଉଙ୍କ ଦର୍ଶନ କରିପାରି ନ ଥିଲେ ମଧ୍ୟ ତାଙ୍କ ଅସ୍ତିତ୍ୱକୁ ଅନୁଭବ କରିପାରୁଛନ୍ତି ବୋଲି ବଂଶୀଧର ଓ ପ୍ରଶାନ୍ତ ଭାବବିହ୍ବଳ କଣ୍ଠରେ କହିଛନ୍ତି।
ବଡଦେଉଳରୁ ଫେରିବା ପରେ ବଂଶୀଧର କହିଥିଲେ, ଚର୍ମ ଚକ୍ଷୁ ଦ୍ୱାରା ଦର୍ଶନକୁ କେବଳ ଦର୍ଶନ ବୋଲି କୁହାଯାଇପାରିବ ନାହିଁ। ମୋ’ ବିଚାରରେ ମହାପ୍ରଭୁଙ୍କ ସତ୍ତା ଓ ମହାନତାକୁ ଅନୁଭବ କରିବା ପାଇଁ ଚକ୍ଷୁର ଆବଶ୍ୟକତା ହୋଇ ନ ଥାଏ। ସେ ଭାବର ଠାକୁର। ଭାବାବେଗ ସହ ଓତପ୍ରୋତ ଭାବେ ଜଡ଼ିତ। ତାଙ୍କୁ ଅନୁଭବ କରି ମହାସାନ୍ନିଧ୍ୟ ଲାଭ କରିଛି। ସେହିପରି ଯାତ୍ରା ସମ୍ପର୍କରେ ବର୍ଣ୍ଣନା କରି ପ୍ରଶାନ୍ତ କହିଥିଲେ, କରୋନା ଯୋଗୁ ଦୀର୍ଘ ୧୦ ମାସରୁ ଊର୍ଦ୍ଧ୍ୱ ସମୟ ହେବ ମହାପ୍ରଭୁଙ୍କ ଦୁଆରକୁ ଆସିପାରି ନ ଥିଲୁ। ତେଣୁ ୭ ଜଣ ବନ୍ଧୁ କାଳିଆ ଠାକୁରଙ୍କ ଦର୍ଶନ ପାଇଁ ଚାଲିଚାଲି ଆସିବା ଲାଗି ମଙ୍ଗଳବାର ପବିତ୍ର ଶ୍ରୀପଞ୍ଚମୀ ଅବସରରେ ନିଷ୍ପତ୍ତି ନେଲୁ। ଶ୍ରୀପଞ୍ଚମୀ ଦିନ ଭୁବନେଶ୍ୱର ସତ୍ୟନଗର ନିକଟସ୍ଥ ନବୀନ ବସ୍ତିଠାରୁ ଯାତ୍ରା ଆରମ୍ଭ କରିଥିଲୁ। ରାସ୍ତାରେ କେବଳ ପାଣି ପିଇଛୁ। ଆହାର ସ୍ପର୍ଶ କରିନାହୁଁ। ଏବେ ଶ୍ରୀମନ୍ଦିରରେ ପହଞ୍ଚି ଆତ୍ମା ତୃପ୍ତ ହେଲା। ସେମାନଙ୍କର ଅନ୍ୟ ୫ ଜଣ ବନ୍ଧୁ ମାଳତୀପାଟପୁର ପାଖରେ ଅଟକି ରହିଛନ୍ତି। ସେମାନେ କ୍ଳାନ୍ତି ମେଣ୍ଟାଇ ଶୁକ୍ରବାର ଦାରୁବିଗ୍ରହଙ୍କ ଦର୍ଶନ କରିବେ ବୋଲି ପ୍ରଶାନ୍ତ ପ୍ରକାଶ କରିଥିଲେ।
