ଭୁବନ,୭।୭(ବିପିନ ବିହାରୀ ସେଠୀ): ଢେଙ୍କାନାଳ ଜିଲା ଭୁବନ ଅଞ୍ଚଳରେ ଆଖିଧରା ସଂକ୍ରମଣ ଦ୍ରୁତଗତିରେ ବଢ଼ିବାରେ ଲାଗିଛି। ସାମୂହିକ ଶିକ୍ଷାଦାନ ବେଳେ ଜାଣତ ଅଜାଣତରେ ବହୁସଂଖ୍ୟକ ଛାତ୍ରୀଛାତ୍ର ଏହାର ଶିକାର ହୋଇଛନ୍ତି। ସଂକ୍ରମଣ ଆଶଙ୍କାରେ ସୁସ୍ଥ ପିଲାମାନେ ବିଦ୍ୟାଳୟକୁ ଆସିବାକୁ ଭୟ କରୁଛନ୍ତି। ଫଳରେ ଉପସ୍ଥାନ କମିବାରେ ଲାଗିଛି।
ଭୁବନ ଏନ୍ଏସି ଅଧୀନ ନୂଆ ଭୁବନ ନୋଡାଲ ଉଚ୍ଚ ବିଦ୍ୟାଳୟରେ ଗତ ୫ଦିନ ମଧ୍ୟରେ ୯୧ଜଣ ଛାତ୍ରୀଛାତ୍ର ଅନୁପସ୍ଥିତ ଅଛନ୍ତି। ଅଧିକାଂଶଙ୍କ ଛୁଟିରେ ରହିବାର କାରଣ ଆଖିଧରା ବୋଲି ଜଣାପଡ଼ିଛି। ସ୍କୁଲରେ ୪୮୨ ଜଣ ଛାତ୍ରୀଛାତ୍ର ନାମ ଲେଖାଇଥିବା ବେଳେ ଗୁରୁବାର ୩୯୧ ଜଣ ଉପସ୍ଥିତ ଥିଲେ। ଅଭିଭାବକଙ୍କ କହିବା କଥା, ଯେହେତୁ ସ୍କୁଲରେ ପିଲାମାନେ ମିଳିମିଶି ପାଠ ପଢୁଛନ୍ତି, ତେଣୁ ସେମାନଙ୍କୁ ଆଖିଧରା ଡେଇଁବା ଆଶଙ୍କା ବେଶି। ଏବେ ଅଧିକାଂଶ ଛାତ୍ରୀଛାତ୍ର ଏହି ରୋଗରେ ଆକ୍ରାନ୍ତ ହୋଇଛନ୍ତି। ଏହା ଅତ୍ୟଧିକ କ୍ଷତିକାରକ ନ ହେଲେ ମଧ୍ୟ ୨-୩ଦିନ ଯନ୍ତ୍ରଣା ଦେଇଥାଏ। ସୁସ୍ଥ ପିଲାଙ୍କୁ ସ୍କୁଲକୁ ପଠାଇଲେ ଘରେ ପରିବାରର ସଦସ୍ୟଙ୍କୁ ସଂକ୍ରମଣ ବ୍ୟାପିବ। ତେଣୁ ସତର୍କତାମୂଳକ ପଦକ୍ଷେପ ସ୍ବରୂପ ପିଲାଙ୍କୁ ଘରେ ରହି ପଢ଼ିବାକୁ ପରାମର୍ଶ ଦେଉଛୁ। କେବଳ ନୂଆଭୁବନ ନୋଡାଲ ହାଇସ୍କୁଲ ନୁହେଁ, ଭୁବନ ଅଞ୍ଚଳର ଅଧିକାଂଶ ସରକାରୀ ଓ ବେସରକାରୀ ଶିକ୍ଷାନୁଷ୍ଠାନରେ ସମାନ ସମସ୍ୟା ଦେଖିବାକୁ ମିଳିଛି।
ଅନ୍ୟପଟେ ଶିକ୍ଷା ବିଭାଗ ପକ୍ଷରୁ ଅଦ୍ୟାବଧି ସଂକ୍ରମଣ ରୋକିବା ଲାଗି କୌଣସି ପଦକ୍ଷେପ ନିଆଯାଇ ନ ଥିବା ଜଣାପଡ଼ିଛି। ଏ ସଂକ୍ରାନ୍ତରେ ବିଭାଗୀୟ ପଦସ୍ଥ ଅଧିକାରୀଙ୍କ ନିକଟରେ ସୂଚନା ଥିଲେ ମଧ୍ୟ ବିଦ୍ୟାଳୟ କର୍ତ୍ତୃପକ୍ଷ ବିଧିବଦ୍ଧ ଭାବେ ଅଭିଯୋଗ କରି ନ ଥିବା କହି ସେମାନେ ଦାୟିତ୍ୱରୁ ମୁହଁ ଫେରାଇ ନେଉଛନ୍ତି। ତେଣୁ ସଂକ୍ରମଣ ନିୟନ୍ତ୍ରଣ ବାହାରକୁ ଯିବା ଆଶଙ୍କାକୁ ଏଡ଼ାଇ ଦିଆଯାଇପାରୁନାହିଁ। ରାଜ୍ୟ ସରକାର ଜାରି କରିଥିବା ମାର୍ଗଦର୍ଶିକା ସମ୍ପର୍କରେ ଶିକ୍ଷା ବିଭାଗ ପକ୍ଷରୁ ଶିକ୍ଷାନୁଷ୍ଠାନଗୁଡ଼ିକରେ ବ୍ୟାପକ ସଚେତନତା ସୃଷ୍ଟି କରିବା ଏବଂ ସ୍ବାସ୍ଥ୍ୟ ବିଭାଗ ସହ ସମନ୍ବୟ ରଖି ପ୍ରତିକାରମୂଳକ ପଦକ୍ଷେପ ଗ୍ରହଣ କରିବା ଲାଗି ଅଭିଭାବକମାନେ ଦାବି କରିଛନ୍ତି।