ମୁମ୍ବାଇ, ୧।୬: ସୁଯୋଗ ଅଭାବରୁ ୨୮ ବର୍ଷ ବୟସରେ ସମିତ ପଟେଲ ଭାରତୀୟ କ୍ରିକେଟରୁ ଅସବର ନେଇଛନ୍ତି। ୨୦୧୨ରେ ତାଙ୍କ ପ୍ରତିନିଧିତ୍ୱରେ ୧୯ ବର୍ଷରୁ କମ୍ ବିଶ୍ୱକପ୍ ଟ୍ରଫି ହାତେଇଥିଲା ଭାରତୀୟ ଦଳ। ଦୀର୍ଘ ବର୍ଷ ଧରି ବିଭିନ୍ନ ରାଜ୍ୟ ପାଇଁ ଖେଳିବା ପରେ ଏହି ଉଇକେଟକିପର ବ୍ୟାଟ୍ସମ୍ୟାନ ଆମେରିକା ପକ୍ଷରୁ ପ୍ରତିନିଧିତ୍ୱ କରିବାକୁ ନିଷ୍ପତ୍ତି ନେଇଛନ୍ତି।
ମୁଁ ଭାରତୀୟ କ୍ରିକେଟରୁ ଅବସର ନେଉଛି। ଏ ସମ୍ପର୍କରେ ଇମେଲ ଜରିଆରେ ବିସିସିଆଇକୁ ଜଣାଇ ଦେଇଛି ବୋଲି ଉଇକେଟକିପର ବ୍ୟାଟ୍ସମ୍ୟାନ ପଟେଲ କହିଛନ୍ତି। ଏବେ ସେ ବିଭିନ୍ନ ଦେଶରେ ଫ୍ରାଞ୍ଚାଇଜ କ୍ରିକେଟ ଖେଳିପାରିବେ। ତାଙ୍କର ପ୍ରଥମେ ଷ୍ଟପ୍ ହେଉଛି ଓ୍ବେଷ୍ଟଇଣ୍ଡିଜ। ସେଠାରେ କାରିବିୟନ ପ୍ରିମିୟର ଲିଗ୍ (ସିପିଏଲ)ରେ ବାର୍ବାଡସ ଟ୍ରାଇଡେଣ୍ଟ୍ସ ପକ୍ଷରୁ ସେ ପ୍ରତିନିଧିତ୍ୱ କରିବେ।
ମୁଁ ଆମେରିକା ପକ୍ଷରୁ ପ୍ରତିନିଧିତ୍ୱ କରି ଅନ୍ତର୍ଜାତୀୟ କ୍ରିକେଟର ସ୍ବାଦ ଚାଖିବାକୁ ଚାହେଁ। ଆଉ ପରିବାର ସହ ରହିବି ବୋଲି ଆମେରିକାର ଗ୍ରୀନକାର୍ଡଧାରୀ ସମିତ କହିଛନ୍ତି। କିନ୍ତୁ ୟୁଏସ୍ ଦଳ ପକ୍ଷରୁ ପ୍ରତିନିଧିତ୍ୱ କରିବା ଲାଗି ତାଙ୍କୁ ୩ ବର୍ଷ ଆମେରିକାରେ ରହିବାକୁ ପଡ଼ିବ। ଉଲ୍ଲେଖଯୋଗ୍ୟ, ୧୯ ବର୍ଷରୁ କମ୍ ବିଶ୍ୱକପ୍ ସଫଳତା ପରେ ସମିତଙ୍କୁ ନିୟମିତ ଗୁଜରାଟ ରଣଜୀ ଦଳରେ ସ୍ଥାନ ମିଳି ନ ଥିଲା। କାରଣ ଦଳର ଅଧିନାୟକ ଥିଲେ ଉଇକେଟକିପର ପାର୍ଥତ୍ବ ପଟେଲ। ନିରାଶ ହୋଇ ତ୍ରୀପୁରା, ଗୋଆ ଓ ବରୋଦା ଭଳି ଦଳ ପାଇଁ କିଛି ବର୍ଷ ରଣଜୀ ଖେଳିଥିଲେ। ୫୫ ପ୍ରଥମ ଶ୍ରେଣୀ ମ୍ୟାଚ୍ ଖେଳିଥିବା ସମିତଙ୍କ ନାମରେ ୧୧ ଶତକ ଓ ୧୪ ଅର୍ଦ୍ଧଶତକ ସହ ୩,୨୭୮ ରନ୍ ରହିଛି।
ତେବେ ଆମେରିକା ଦଳରେ ପଟେଲ ଏକମାତ୍ର ଭାରତୀୟ ଖେଳାଳି ନୁହନ୍ତି। ଦଳର କୋଚ୍ ଦାୟିତ୍ୱରେ କର୍ନାଟକର ପୂର୍ବତନ ଅଧିନାୟକ ତଥା କୋଚ୍ ଜେ. ଅରୁଣ କୁମାର ଥିବାବେଳେ ଅଧିନାୟକ ହେଲେ ୨୦୧୦ରେ ଭାରତ ପାଇଁ ୧୯ ବର୍ଷରୁ କମ୍ ବିଶ୍ୱକପ୍ ଖେଳିଥିବା ସୌରଭ ନେତ୍ରାଭଲକର।