ଭୁବନେଶ୍ୱର,୧୮ା୧୦(ବ୍ୟୁରୋ): ରାଜଧାନୀରେ ରାହାଗିରି କାର୍ଯ୍ୟକ୍ରମ ଚାଲିଥିବା ସମୟରେ ୨୦୧୬ରେ ଭୁବନେଶ୍ୱର ମହାନଗର ନିଗମ (ବିଏମ୍ସି)କୁ ୨ଟି ସଂସ୍ଥା ସିଏସ୍ଆର୍ ଫଣ୍ଡ୍ରୁ ୨୦୦ ସାଇକେଲ ପ୍ରଦାନ କରିଥିଲେ। ଏବେ ସେଗୁଡ଼ିକ ବିଏମ୍ସି ମୁଖ୍ୟ କାର୍ଯ୍ୟାଳୟ ପରିସରରେ ଖତ ଖାଉଛି। ସେଥିରୁ କିଛି ସାଇକେଲ୍ ଚୋରି ହୋଇଥିବା ଅଭିଯୋଗ ହେଉଥିବାବେଳେ ଆଉ କିଛି କୋଭିଡ୍ ସଚେତକଙ୍କୁ ବିଭିନ୍ନ ଓ୍ବାର୍ଡ ବୁଲି ସଚେତନ କରିବାକୁ ଦିଆଯାଇଛି। ୨ଶହ ସାଇକେଲର ଠିକ୍ ପରିଚାଳନା କରିପାରି ନ ଥିବା ବିଏମ୍ସି ଏବେ ୨୦୦୦ ‘ମୋ ସାଇକେଲ୍’ର ଦାୟିତ୍ୱ ମୁଣ୍ଡକୁ ନେଇଛି। କ୍ୟାପିଟାଲ ଅର୍ବାନ ଟ୍ରାନ୍ସପୋର୍ଟ ଦ୍ୱାରା ପରିଚାଳିତ ‘ମୋ ସାଇକେଲ’କୁ ବିଏମ୍ସି ନିଜ ଅଧୀନକୁ ଆଣିଛି। କରୋନା ସମୟରେ ବିଏମ୍ସିର ହଠାତ୍ ଏପରି ପଦକ୍ଷେପକୁ ନେଇ ନାନା ଆଲୋଚନା ଚାଲିଛି। କରୋନା ପରଠୁ ବିଭାଗରେ କାର୍ଯ୍ୟଭାର ଢେର୍ ବଢ଼ିଯାଇଛି। ଜଣେ ଜଣେ କର୍ମଚାରୀଙ୍କୁ ଏକାଧିକ ଦାୟିତ୍ୱର ବୋଝ ସମ୍ଭାଳିବାକୁ ପଡୁଛି। ପୁଣି ଏହା ଭିତରେ ବର୍ତ୍ତମାନ କର୍ମଚାରୀ ଅଭାବ ବଡ଼ ସମସ୍ୟା ପାଲଟିଥିବା ଖୋଦ୍ କମିଶନର ଓ ଅନ୍ୟ ଅଧିକାରୀମାନେ ବିଭିନ୍ନ ସମୟରେ କହି ଆସୁଛନ୍ତି। ହେଲେ ୨୦୦୦ ମୋ ସାଇକେଲ ପରିଚାଳନା କରିବାକୁ କର୍ମଚାରୀ ଆସିବେ କେଉଁଠୁ? ରାହାଗିରି ସାଇକେଲ ପରି ମୋ ସାଇକେଲ ମଧ୍ୟ ଖତ ଖାଇବ ବୋଲି ଚର୍ଚ୍ଚା ଚାଲିଛି।
ଅନ୍ୟପଟେ ଫେଲ୍ ମାରିବା ପରେ ବିଏମ୍ସି ଏବେ ହଠାତ୍ ସାଇକେଲ ଉପରେ କାହିଁକି ଆଖି ପକାଇଛନ୍ତି ତାହା ବି ରହସ୍ୟ ସୃଷ୍ଟି କରୁଛି। ବର୍ତ୍ତମାନ ବିଏମ୍ସି ନିକଟରେ ଉକ୍ତ ୨୦୦ ସାଇକେଲ୍ରୁ ମାତ୍ର ୧୩୦ରୁ ୧୫୦ଟି ଥିବା ଜଣାପଡ଼ିଛି। କିଛି ସାଇକେଲରେ ଶିଟ୍, ଚକ ଓ ଅନ୍ୟାନ୍ୟ ପାର୍ଟସ ଗାଏବ୍ ହୋଇଯାଇଛି। ସାଇକେଲ୍ଗୁଡ଼ିକ ଗୋଟିଏ ସ୍ଥାନରେ ପଡ଼ି ରହିବା ଯୋଗୁ ଖରାପ ହୋଇଯାଇଛି। ତେବେ ଆଗକୁ ମୋ ସାଇକେଲ୍ର ମଧ୍ୟ ଏପରି ଅବସ୍ଥା ଯେ ନ ହେବ କହି ହେଉନି। ତେବେ ଏହା ଭିତରେ ଖତଗଦାରେ ପଡ଼ି ରହିଥିବା ପୁରୁଣା ରାହାଗିରି ସାଇକେଲ୍ର ପୁନରୁଦ୍ଧାର କରାଯାଉଛି। ବିଏମ୍ସି ମୁଖ୍ୟାଳୟର ଯେଉଁ ସ୍ଥାନରେ ପୁରୁଣା ସାଇକେଲ୍ଗୁଡ଼ିକୁ ରଖାଯାଇଥିଲା, ସେଠାରେ ଜଣେ ମିସ୍ତ୍ରି ସାଇକେଲ ମରାମତି କରୁଛନ୍ତି। ଏଥିସହ ଏବେ ବିଏମ୍ସି ବିଭିନ୍ନ ଆପାର୍ଟମେଣ୍ଟରେ ରହୁଥିବା ଛୋଟ ପିଲାଙ୍କୁ ସାଇକେଲ୍ ଚଳାଇବା ପାଇଁ ପ୍ରୋତ୍ସାହିତ କରୁଛି। କିନ୍ତୁ ଏହା ପଛରେ କିଛି ଜନହିତକର ଯୋଜନା ରହିଛି ନା ଯୋଜନା ନାଁରେ ବିଏମ୍ସି ଆଉକିଛି ଉଦ୍ଦେଶ୍ୟ ହାସଲ ପାଇଁ ଏପରି ପ୍ରସହନ ଆରମ୍ଭ କରିଥିବା ଆଲୋଚନା ହେଉଛି।