ନୂଆଦିଲ୍ଲୀ,୧।୮: କରୋନା ଭୂତାଣୁ ସଂକ୍ରମଣ ଭିତରେ ସାରା ବିଶ୍ୱରେ କମ୍ପାନୀଗୁଡ଼ିକୁ ବିଶେଷ କ୍ଷତି ସହିବାକୁ ପଡ଼ୁଛି। ହେଲେ ସୋସିଆଲ ମିଡିଆ କମ୍ପାନୀ ଫେସବୁକ୍ ପକ୍ଷରୁ ଉତ୍କୃଷ୍ଟ ତ୍ରୈମାସିକ ଫଳାଫଳ ପ୍ରକାଶ କରାଯାଇଛି। ଏପ୍ରିଲ-ଜୁନ୍ ମାସରେ କମ୍ପାନୀର ଆୟ ୧୧% ବୃଦ୍ଧି ପାଇଛି। ବର୍ତ୍ତମାନ ପ୍ରଶ୍ନ ଉଠୁଛି, ଫେସବୁକ୍ରେ ସମସ୍ତ ସେବା ମାଗଣା, ଏଣୁ ଏହାର ରୋଜଗାରର ଉତ୍ସ କ’ଣ? ଜାଣନ୍ତୁ..
ହୋଟେଲର ଏକ କୋଠରୀରୁ ଆରମ୍ଭ ହୋଇଥିବା ଏକ ଧାରଣା ଆଜି ଏକ ବିଶ୍ୱସ୍ତରୀୟ ପ୍ରୋଜେକ୍ଟରେ ପରିରତ ହୋଇଛି। ଦୁନିଆର ଏକ ଚତୁର୍ଥାଂଶ ବ୍ୟକ୍ତି ଫେସବୁକ୍ ବ୍ୟବହାର କରିଥାନ୍ତି। ପ୍ରତିଦିନ ପ୍ରାୟ ୧୮୦ କୋଟି ଲୋକ ଫେସ୍ବୁକ୍ରେ ଲାଇକ୍, କମେଣ୍ଟ ଏବଂ ଫଟୋକୁ ପସନ୍ଦ କରନ୍ତି।
କିଭଳି ରୋଜଗାର କରେ କମ୍ପାନୀ: ବିଶେଷଜ୍ଞଙ୍କ ଅନୁଯାୟୀ, ପ୍ରତ୍ୟେକ ଦିନ ଜଣେ ୟୁଜର୍ ହାରାହାରି ୫୮ ମିନିଟ୍ ଫେସବୁକ୍ ବ୍ୟବହାର କରିଥାନ୍ତି। ଗତ କିଛି ବର୍ଷ ମଧ୍ୟରେ କମ୍ପାନୀର ମୋଟ ଆୟ ତିନି ଗୁଣ ବୃଦ୍ଧି ପାଇଛି। ଜୁଲାଇ ୨୦ରେ କମ୍ପାନୀର ରାଜସ୍ବ ୟୁଜର ପିଛା ୫୦୭ ଟଙ୍କା ଥିବା ବେଳେ ଏବେ ଏହା ବଢ଼ିଯାଇ ୫୨୯ ଟଙ୍କା ହୋଇଛି। ସରଳ ଭାଷାରେ କହିଲେ କମ୍ପାନୀ ପ୍ରତି ଉପଭୋକ୍ତାଙ୍କ ମାଧ୍ୟମରେ ୫୦୦ରୁ ଅଧିକ ଟଙ୍କା ରୋଜଗାର କରୁଛି।
ଫେସବୁକ୍ର ସେବା: ଯେପରି ସମସ୍ତେ ଜାଣନ୍ତି, ଫେସବୁକ୍ ବ୍ୟବହାର କରିବାକୁ ବ୍ୟବହାରକାରୀଙ୍କୁ କୌଣସି ଦେୟ ଦେବାକୁ ପଡ଼ି ନ ଥାଏ। ଏଣୁ ପ୍ରଶ୍ନ ଆସିବା ସ୍ବାଭାବିକ ଟଙ୍କା କିଭଳି ରୋଜଗାର କରେ କମ୍ପାନୀ? ତେବେ ସିଧାସଳଖ ଭାବେ ଉପଭୋକ୍ତାଙ୍କଠାରୁ ଟଙ୍କା ନ ନେଲେ ବି ବ୍ୟବହାରକାରୀଙ୍କ ଡାଟା ଆଧାର ସଂଗ୍ରହ କରିଥାଏ କମ୍ପାନୀ। ଏହାକୁ ଅନ୍ୟ ବ୍ୟବସାୟିକ କମ୍ପାନୀକୁ ବିକ୍ରି କରିଥାଏ। ଯେକୌଣସି କ୍ଲିକ୍ କୌଣସି ନା କୌଣସି କମ୍ପାନୀର ରହିଥାଏ।
ତଥ୍ୟ ବଦଳରେ ଟଙ୍କା: ଫେସବୁକ୍ ଏହାର ଉପଭୋକ୍ତାଙ୍କ ବିଷୟରେ ତଥ୍ୟ ବିକ୍ରି କରି କମ୍ପାନୀଗୁଡ଼ିକଠାରୁ ଟଙ୍କା ରୋଜଗାର କରେ। ଉଦାହରଣସ୍ବରୂପ, କୌଣସି ସାଇଟ୍ ଅଥବା କମ୍ପାନୀରେ ପଞ୍ଜିକରଣ କରିବା ପୂର୍ବରୁ ଆପଣଙ୍କୁ ପଚରାଯାଏ ଯେ ଆପଣ ଫେସବୁକ୍ ବ୍ୟବହାରକାରୀ ଭାବେ ଆଗକୁ ବଢ଼ିବାକୁ ଚାହୁଁଛନ୍ତି କି? ଯଦି ଆପଣ ହଁ କରନ୍ତି ତେବେ ଉକ୍ତ କମ୍ପାନୀ/ସାଇଟ୍ ଫେସବୁକ୍ରୁ ଆପଣଙ୍କର ସମସ୍ତ ସୂଚନା ନେଇଥାଏ।
ବିଜ୍ଞାପନ ମାଧ୍ୟମରେ ଟଙ୍କା: ଫେସବୁକ୍ ବିଜ୍ଞାପନ ମାଧ୍ୟମରେ ଟଙ୍କା କମାଇଥାଏ। ଆପଣ ପେଜ୍ ଖୋଲିବା ପରେ ପସନ୍ଦ କରୁଥିବା ଉତ୍ପାଦ ଜନିତ ବିଜ୍ଞାପନ ଦେଖିବାକୁ ପାଉଥିବେ। ଏଥିରୁ କମ୍ପାନୀ ରୋଜଗାର କରିଥାଏ।
କୌଣସି ଦାୟିତ୍ୱ ନେଇ ନଥାଏ ଫେସବୁକ୍: ଫେସ୍ବୁକ୍ କୌଣସି ତଥ୍ୟ ପାଇଁ ଦାୟିତ୍ୱ ନେଇ ନ ଥାଏ। ଏହାଛଡ଼ା ଏହାର ସତ୍ୟତାକୁ ଗ୍ୟାରେଣ୍ଟି ଦିଏ ନାହିଁ।