ନୂଆଦିଲ୍ଲୀ: କରୋନାର ପ୍ରଭାବ ବଜାରରୁ ବର୍ତ୍ତମାନ ଯାଏ ଯାଇନାହିଁ। ଫଳରେ ଦେଶର ଫ୍ୟାକ୍ଟ୍ରିଗୁଡିକର ଉତ୍ପାଦନ ନଭେମ୍ବରରେ ୧.୯% ହ୍ରାସ ପାଇଛି। ସେହିଭଳି ଡିସେମ୍ବରରେ ଖୁଚୁରା ମୁଦ୍ରାସ୍ଫୀତି ୪.୫୯% ସ୍ତରକୁ ବଢିଛି। ପନିପରିବା ଦର ହ୍ରାସ ଯୋଗୁ ଏଭଳି ସ୍ଥିତି ଉପୁଜିଛି। ମୁଦ୍ରାସ୍ଫୀତିକୁ ୨ରୁ ୬% ମଧ୍ୟରେ ରଖିବା ନେଇ କେନ୍ଦ୍ରୀୟ ବ୍ୟାଙ୍କ ଲକ୍ଷ୍ୟ ଧାର୍ଯ୍ୟ କରିଥିଲା। ବର୍ତ୍ତମାନ ଏହା ଆର୍ବିଆଇର ଧାର୍ଯ୍ୟ ଲକ୍ଷ୍ୟ ମଧ୍ୟକୁ ଫେରିଛି। ନଭେମ୍ବରରେ ଖାଉଟି ମୂଲ୍ୟସୂଚୀ(ସିପିଆଇ) ୬.୯୩% ସ୍ତରରେ ରହିଥିଲା। ମୁଦ୍ରାସ୍ଫୀତି ୫.୨୮% ସ୍ତରରେ ରହିବା ନେଇ ପୂର୍ବରୁ ରଏଟର୍ସ ଅର୍ଥନୀତିଜ୍ଞ କହିଥିଲେ। ରେପୋ ରେଟ୍ ନିର୍ଦ୍ଧାରଣ ବେଳେ ଆର୍ବିଆଇ ଖାଉଟି ମୂଲ୍ୟସୂଚୀ ଡାଟାକୁ ଗୁରୁତ୍ୱ ଦେଇଥାଏ। ସରକାରଙ୍କ ଡାଟା ମୁତାବକ, ନଭେମ୍ବରରେ ଔଦ୍ୟୋଗିକ ଉତ୍ପାଦନ ସୂଚକାଙ୍କ(ଆଇଆଇପି) ୧.୭% ନିମ୍ନରେ ରହିଥିଲା। ଚଳିତ ବର୍ଷ ନଭେମ୍ବରରେ ଖଣି ଉତ୍ପାଦନ ୭.୩% ଖସିଛି। ଏହାବାଦ ଶକ୍ତି ଉତ୍ପାଦନ ୩.୫% ବଢିଛି। ୨୦୧୯ ନଭେମ୍ବରରେ ଆଇଆଇପି ୨.୧% ସ୍ତରରେ ରହିଥିଲା। କୋଭିଡ୍ ଯୋଗୁ ଗତ ମାର୍ଚ୍ଚରୁ ଶିଳ୍ପ ଉତ୍ପାଦନ କ୍ଷତିଗ୍ରସ୍ତ ହୋଇ ରହିଛି। ମାର୍ଚ୍ଚରେ ଆଇଆଇପି ୧୮.୭% ନିମ୍ନରେ ରହିଥିଲା।
