ଫଡନାଭିସ ସବୁଠାରୁ ଦୁଃଖୀ ମଣିଷ, ଯେମିତିକି କମିଶନରଙ୍କୁ ହାବିଲଦାର କରାଯାଇଛି: ସଞ୍ଜୟ ରାଉତଙ୍କ କଟାକ୍ଷ…

ମୁମ୍ବାଇ,୩୧।୫ : ମହାରାଷ୍ଟ୍ର ରାଜନୀତିରେ ଆରୋପ ପ୍ରତ୍ୟାରୋପ ଜାରି ରହିଛି। କେତେବେଳେ ସରକାର ବିରୋଧୀଙ୍କୁ ଟାର୍ଗେଟ କରୁଛନ୍ତି ତ ଅନ୍ୟ କେତେବେଳେ ବିରୋଧୀ ସରକାରଙ୍କୁ କଡ଼ା ସମାଲୋଚନା କରୁଛନ୍ତି। ଶିବସେନା (ୟୁବିଟି) ମୁଖପାତ୍ର ତଥା ରାଜ୍ୟସଭା ଏମପି ସଞ୍ଜୟ ରାଉତ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କୁ ଟାର୍ଗେଟ କରିଛନ୍ତି। ସଞ୍ଜୟ ଫଡନାଭିସଙ୍କୁ ଜଣେଅସନ୍ତୁଷ୍ଟ ନେତା ବୋଲି ବର୍ଣ୍ଣନା କରିଛନ୍ତି। ଉପମୁଖ୍ୟମନ୍ତ୍ରୀ ନିକଟରେ ସଞ୍ଜୟଙ୍କୁ ଅସନ୍ତୁଷ୍ଟ ବୋଲି ବର୍ଣ୍ଣନା କରିଥିଲେ। ଏବେ ସଞ୍ଜୟ ଏହାର ଜବାବ ଦେଇଛନ୍ତି।

ସଞ୍ଜୟ ଏକ ସାକ୍ଷାତକାରରେ କହିଛନ୍ତି ଥରେ ଦେବେନ୍ଦ୍ର ଫଡନାଭିସଙ୍କୁ ପଚାରନ୍ତୁ ସେ କେତେ ସନ୍ତୁଷ୍ଟ? ସେ ରାଜ୍ୟର ଜଣେ ସବୁଠାରୁ ଦୁଃଖୀ ବ୍ୟକ୍ତି। ସେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ହେବାକୁ ଯାଉଥିଲେ। ସମସ୍ତେ ତାଙ୍କୁ ଅଭିନନ୍ଦନ ଜଣାଇଥିଲେ। କିନ୍ତୁ ତାଙ୍କୁ ହଠାତ ଶପଥ ଗ୍ରହଣରୁ ନିବୃତ୍ତ କରାଯାଇ ଉପମୁଖ୍ୟମନ୍ତ୍ରୀ କରାଯାଇଥିଲା। ସେ ସନ୍ତୁଷ୍ଟ କି ନାହିଁ ଥରେ ତାଙ୍କୁ ପଚାରନ୍ତୁ। ରାଜନୀତିରେ ତାଙ୍କ ଜୁନିଅର ଏକନାଥ ଶିନ୍ଦେଙ୍କୁ ମୁଖ୍ୟମନ୍ତ୍ରୀ କରାଯାଇଥିଲା ଏବଂ ସିନିୟରଙ୍କୁ ଜୁନିଅରଙ୍କ ତଳେ ରଖାଯାଇଥିଲା। ତାଙ୍କୁ ଉପମୁଖ୍ୟମନ୍ତ୍ରୀ ପଦ ଦିଆଯାଇଥିଲା। ଜଣେ ବ୍ୟକ୍ତି ଏହି ଉପାୟରେ ସନ୍ତୁଷ୍ଟ ହୋଇପାରିବ କି? ଫଡନାଭିସଙ୍କୁ ସତେ ଯେପରି କମିଶନର ପଦରୁ ହାବିଲଦାର କରାଯାଇଛି।

ଫଡନାଭିସଙ୍କ ମୁହଁକୁ ଥରେ ଦେଖ, ସେ କେତେ ଦୁଃଖୀ ତାହା ଜଣାପଡ଼ିବ। ଯେଉଁ ବ୍ୟକ୍ତି ନିଜେ ଏତେ ଅସନ୍ତୁଷ୍ଟ, ସେ ଅନ୍ୟମାନଙ୍କ ସନ୍ତୁଷ୍ଟି ବିଷୟରେ କ’ଣ କହିବେ। ଉଦ୍ଧବ ଠାକରେଙ୍କ ନେତୃତ୍ୱକୁ ପ୍ରଶଂସା କରି ସଞ୍ଜୟ କହିଛନ୍ତି ତାଙ୍କ ଦଳର ପ୍ରତ୍ୟେକ ନେତା ଖୁସି ଅଛନ୍ତି। ଯେଉଁମାନେ ଅସନ୍ତୁଷ୍ଟ ଅଛନ୍ତି ତାହା ସେମାନେ ଏବେ ଦେଖୁଛନ୍ତି। ସମସ୍ତେ ବର୍ତ୍ତମାନ ଆମ ସହିତ ଖୁସି ଅଛନ୍ତି।