ଅନୁଗୋଳ ଅଫିସ, ୫।୯:ଅନୁଗୋଳ ସହରର ମିଶ୍ରପଡ଼ାସ୍ଥିତ ସହରାଞ୍ଚଳ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ରବିବାର କରୋନା ବୁଷ୍ଟର ଡୋଜ୍ ଟିକାକରଣକୁ ନେଇ ଅବ୍ୟବସ୍ଥା ଦେଖିବାକୁ ମିଳିଛି। ଆଶାୟୀମାନେ ଲାଇନ୍ରେ ଛିଡ଼ା ହୋଇଥିବାବେଳେ ଭ୍ୟାକ୍ସିନ୍ ସରିଯାଇଥିବା କହି ସ୍ବାସ୍ଥ୍ୟକର୍ମୀ ସେମାନଙ୍କୁ ଫେରାଇ ଦେଇଥିବା ଅଭିଯୋଗ ହୋଇଛି। ଏହାକୁ ନେଇ ସ୍ବାସ୍ଥ୍ୟକେନ୍ଦ୍ରରେ ଚାପା ଉତ୍ତେଜନା ସୃଷ୍ଟି ହୋଇଥିଲା। ତେବେ ଜିଲା ମୁଖ୍ୟ ଚିକିତ୍ସାଳୟରୁ ଭ୍ୟାକ୍ସିନ ଅଣାଯିବା ପରେ ଟିକାକରଣ ସ୍ବାଭାବିକ ହେବା ସହ ଏବଂ ସ୍ଥିତି ନିୟନ୍ତ୍ରଣକୁ ଆସିଥିଲା।
ଅନୁଗୋଳ ସହରାଞ୍ଚଳ ସ୍ବାସ୍ଥ୍ୟକେନ୍ଦ୍ରରେ ବୁଷ୍ଟର ଡୋଜ୍ ନେବାକୁ ବ୍ୟବସ୍ଥା କରାଯାଇଥିବାବେଳେ ଲୋକଙ୍କୁ ଠିକ୍ ଭାବେ ଟିକା ପ୍ରଦାନ କରାଯାଉ ନ ଥିବା ଅଭିଯୋଗ ହେଉଛି। ଲୋକମାନେ ଭ୍ୟାକ୍ସିନ ପାଇଁ ଧାଡ଼ି ବାନ୍ଧି ଦୀର୍ଘ ସମୟ ଅପେକ୍ଷା କରି ରହୁଥିବାବେଳେ ଶେଷରେ ସେମାନଙ୍କୁ ଟିକା ନ ଥିବା କହି ଫେରାଇ ଦିଆଯାଉଛି। ଏପରି କି ଆବଶ୍ୟକସଂଖ୍ୟକ ଲୋକ ନ ହେଲେ ଟିକାପ୍ରଦାନ କରାଯିବ ନାହିଁ ବୋଲି ସ୍ବାସ୍ଥ୍ୟକର୍ମୀ ମନା କରିଦେଉଛନ୍ତି। ଏହାକୁ ନେଇ ପୁଞ୍ଜୀଭୂତ ଅସନ୍ତୋଷ ଲାଗି ରହିଥିବାବେଳେ ରବିବାର ତାହା ଉଗ୍ରରୂପ ନେଇଥିଲା। ଦୈନିକ ଏଭଳି ସମସ୍ୟା ହେଉଥିବାରୁ ଜନସାଧାରଣ ହଇରାଣ ହେଉଛନ୍ତି। ଏହାର ସ୍ଥାୟୀ ସମାଧାନ କରିବାକୁ ସାଧାରଣରେ ଦାବି ହୋଇଛି।
ଏ ସଂକ୍ରାନ୍ତରେ ଡାକ୍ତର ଦିଲ୍ଲୀପ ପଟ୍ଟନାୟକ କହିଛନ୍ତି, ଟିକାକରଣ କେନ୍ଦ୍ରକୁ ଲୋକମାନେ ଆସୁନାହାନ୍ତି। ପ୍ରଥମରୁ ଗୋଟିଏ ଭାଏଲ ଖୋଲାଯାଇ ଟିକାକରଣ କରାଯାଉଛି। ପରେ ଲୋକମାନେ କମିଯିବାରୁ ଟିକା ନଷ୍ଟ ହେଉଛି। ତେଣୁ ଲୋକ ନ ହେଲେ ଟିକାକରଣ ବନ୍ଦ କରାଯାଉଛି। ନଚେତ୍ ରାଜ୍ୟ ସରକାରଙ୍କୁ ଟିକା କାହିଁକି ନଷ୍ଟ କରାଯାଉଛି, ତାହାର ଉତ୍ତର ଦେବାକୁ ପଡୁଛି। ତେଣୁ ଏଭଳି ସମସ୍ୟା ଉପୁଜୁଛି। ଯେଉଁମାନେ ଟିକାଦାନ କେନ୍ଦ୍ରକୁ ଆସୁଛନ୍ତି, ସେମାନଙ୍କୁ ଅପେକ୍ଷା କରିବାକୁ କୁହାଯାଉଛି। ଅତିକମ୍ରେ ୧୦ ଜଣ ଲୋକ ହେଲେ ଟିକାକରଣ କରାଯିବ ବୋଲି ଡାକ୍ତର ପଟ୍ଟନାୟକ ପ୍ରକାଶ କରିଛନ୍ତି।