ବରଗଡ଼ ଅଫିସ୍,୧୭।୧୨: ମହାମାରୀ କରୋନା ଯୋଗୁ ୨ବର୍ଷ ଧରି ବରଗଡ଼ ଧନୁଯାତ୍ରା ମହୋତ୍ସବ ବନ୍ଦ ରହିଥିଲା। କରୋନା କଟକଣା ହଟିବା ପରେ ଏଥର ଧନୁଯାତ୍ରା ପାଇଁ ବରଗଡ଼ରେ ବ୍ୟାପକ ପ୍ରସ୍ତୁତି ଚାଲିଛି। ମହୋତ୍ସବ ୭୫ବର୍ଷରେ ପଦାର୍ପଣ କରୁଥିବାବେଳେ ଅନ୍ୟବର୍ଷ ତୁଳନାରେ ଅଧିକ ଦର୍ଶକଙ୍କ ସମାଗମ ହେବ ବୋଲି ଅନୁମାନ କରାଯାଉଛି । ଫଳରେ ଧନୁଯାତ୍ରାକୁ ଆସୁଥିବା ଦର୍ଶକଙ୍କ ପାଇଁ ଯେଭଳି କିଛି ଅସୁବିଧା ହେବନାହିଁ, ମହୋତ୍ସବକୁ ସମସ୍ତେ ଭଲ ଭାବେ ଉପଭୋଗ କରିବେ ଏବଂ ସମ୍ଭାବ୍ୟ ଭିଡ଼କୁ ନିୟନ୍ତ୍ରଣ କରାଯିବ, ସେଥିପ୍ରତି ଧନୁଯାତ୍ରା ମହୋତ୍ସବ ସମିତି ଓ ଜିଲା ପ୍ରଶାସନ ଏବେଠାରୁ ଲାଗି ପଡ଼ିଛି। ଏହି କ୍ରମରେ ଶୁକ୍ରବାର ଧନୁଯାତ୍ରା ମହୋତ୍ସବ ସମିତି ସଭାପତି ତଥା ବରଗଡ଼ ଜିଲାପାଳ ମୋନିଷା ବାନାର୍ଜୀ ଧନୁଯାତ୍ରାବେଳେ ଯମୁନା ପାଲୁଟିଥିବା ଜିରା ନଦୀପଠା ପରିଦର୍ଶନ କରିଥିଲେ। ଏଥର ନଦୀପଠାରେ ପଲ୍ଲିଶ୍ରୀ ମେଳା ଭଳି ବିଭିନ୍ନ ଷ୍ଟଲ ଖୋଲାଯିବାର ପରିକଳ୍ପନା ରହିଛି। ସମ୍ଭାବ୍ୟ ଭିଡ଼କୁ ନିୟନ୍ତ୍ରଣ କରିବା ପାଇଁ ଏଭଳି ପଦକ୍ଷେପ ନିଆଯାଉଥିବା ସୂଚନା ମିଳିଛି। ସେହିପରି ସନ୍ଧ୍ୟାରେ ଧନୁଯାତ୍ରା ମହୋତ୍ସବ କାର୍ଯ୍ୟକାରୀ କମିଟିର ଏକ ବୈଠକ ବସିଥିଲା। ଜିଲାପାଳ ବାନାର୍ଜୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଧନୁଯାତ୍ରା ପାଇଁ ଏଥର ନିଆଯାଉଥିବା ବିଭିନ୍ନ ପଦକ୍ଷେପ ଉପରେ ଜିଲାପାଳ ବାନାର୍ଜୀ ସୂଚନା ଦେଇଥିଲେ। ଏଥର ଧନୁଯାତ୍ରା ପାଇଁ ବ୍ୟୟ ଅଟକଳ ପ୍ରାୟ ୧କୋଟି ୭୦ଲକ୍ଷ ରହିଥିବା ସୂଚନା ଦିଆଯାଇଥିବା ବେଳେ ସେଥିରେ ସ୍ବଚ୍ଛତା ଆଣିବା ପାଇଁ ପଦକ୍ଷେପ ନିଆଯାଇଛି ବୋଲି ଜିଲାପାଳ କହିଥିଲେ। ସମିତିର ସମ୍ପାଦକ ସୁରେଶ୍ୱର ଶତପଥୀ, ଉପସଭାପତି ତଥା ଏସ୍ପି ସ୍ମିତ୍ ପି. ପରମାର୍, ଅତିରିକ୍ତ ଜିଲାପାଳ ମିର୍ଦ୍ଧା ଟପ୍ପୋ ପ୍ରମୁଖ ବୈଠକରେ ଉପସ୍ଥିତ ଥିଲେ।