ସବୁ ଝିଅଙ୍କର ଇଛା ଥାଏ ତାଙ୍କ କେଶ ସୁନ୍ଦର, ଲମ୍ବା ଓ ରେଶମୀ ହେଉ। ଏମିତିକି କାହାଣୀର ସୁନ୍ଦରୀ ରାଜ କୁମାରୀ ଓ ପରୀଙ୍କ ପରି ସୁନ୍ଦର ଘନ ଲମ୍ବା କେଶର ସ୍ବପ୍ନ ବି ଅନେକେ ଦେଖନ୍ତି। କିନ୍ତୁ ଏଭଳି କେଶ ସମସ୍ତଙ୍କୁ ମିଳିପାରେନା। ତେବେ ୟୁକ୍ରେନ୍ର ଏଲୋନା କ୍ରେବସେଙ୍କୋ ନାମ୍ନୀ ଯୁବତୀଙ୍କ କେଶ କୌଣସି ପରୀଠାରୁ କମ୍ ନୁହେଁ। ତାଙ୍କୁ ଦେଖିଲେ ଲାଗେ ସତେ ଯେମିତି ସେ କୌଣସି ପରୀକଥାରୁ ବାହାରି ଆସିଛନ୍ତି। ତାଙ୍କ କେଶର ଲମ୍ବା ଜଣେ ସାଧାରଣ ମଣିଷଠାରୁ ଅଧିକ। କାରଣ ତାଙ୍କ କେଶର ଲମ୍ବ ହେଉଛି ୬.୫ ଫୁଟ୍। ସେଇ କେଶରେ ହିଁ ତାଙ୍କର ପୂରା ଶରୀର ଘୋଡେଇ ହେଇଯାଏ। ତାଙ୍କ କେଶ ରେଶମୀ ଓ ସୁନେଲି। ତେଣୁ ଡିଜ୍ନୀର ରାଜକୁମାରୀ ପରି ସେ ଲାଗନ୍ତି। ୩୫ ବର୍ଷୀୟା ଏଲୋନା ୟୁକ୍ରେନ, ଓଡେସାରେ ରୁହନ୍ତି। ପେସାରେ ସେ ଜଣେ ବିଜନେସ୍ ଓମେନ୍। ଏଲୋନା କହନ୍ତି, ଥରେ ମୋ ମା’ ମତେ କହିଥିଲେ ଝିଅମାନେ ନିଜ କେଶ କାଟିବା ଉଚିତ ନୁହେଁ, ଲମ୍ବା କେଶ ରଖିବାକୁ ଚେଷ୍ଟା କରିବା କଥା। ଏଇ କଥା ମୋ ମନରେ ଘର କରିଯାଇଥିଲା। ସେତେବେଳେ ମତେ ବୟସ ମାତ୍ର ୫ ବର୍ଷ। ଆଉ ସେବେଠାରୁ ହିଁ କେଶ କାଟିବିନି ବୋଲି ନିଷ୍ପତ୍ତି ନେଲି।’ ୟା ମଧ୍ୟରେ ୩୦ ବର୍ଷ ହୋଇଗଲାଣି ଏଲୋନା କେଶ କାଟି ନାହାନ୍ତି। କେବେ କେବେ ସେ କେଶ ଟ୍ରିମ୍ କରି ସାଇଜ୍ କରିଦିଅନ୍ତି। କାରଣ ଟ୍ରିମ୍ କଲେ କେଶ ଭଲଭାବେ ବଢିଥାଏ। ସେ ସପ୍ତାହକୁ ଥରେ କେଶ ଧୁଅନ୍ତି। ଏଥିପାଇଁ ତାଙ୍କୁ ୩୦ ମିନିଟ୍ ସମୟ ଲାଗିଯାଏ। କେଶ ଓଦା ଥିବା ସମୟରେ ତ ସେ କେବେ ବି କେଶକୁ କୁଣ୍ଡାନ୍ତି ନାହିଁ। କାରଣ ଏହାଦ୍ୱାରା କେଶ ଅଧିକ ଉପୁଡିଥାଏ। ଏବେ ତାଙ୍କ କେଶ ନିଜ ଉଚ୍ଚତାଠାରୁ ଅଧିକ ଲମ୍ବା। ଆଉ ସେ ନିଜ କେଶକୁ ବହୁତ ଭଲ ପାଆନ୍ତି।