ଭୁବନେଶ୍ୱର,୧୧।୬: (ବ୍ୟୁରୋ) ଚନ୍ଦ୍ରଶେଖରପୁର ଅଞ୍ଚଳରେ ଲୋକଙ୍କୁ ଡରାଇ ଧମକାଇ ଟଙ୍କା ଆଦାୟ କରି ଆତଙ୍କ ସୃଷ୍ଟି କରୁଥିବା ଜଣେ ମହିଳା ଓ ତାଙ୍କ ସହଯୋଗୀଙ୍କୁ ସ୍ଥାନୀୟ ପୋଲିସ ଠକେଇ, ହତ୍ୟା ଉଦ୍ୟମ ଓ ଜଣେ ଭିନ୍ନକ୍ଷମ ବ୍ୟକ୍ତିଙ୍କୁ ଆକ୍ରମଣ ଅଭିଯୋଗରେ ଗିରଫ କରି କୋର୍ଟଚାଲାଣ କରିଛି। ଅଭିଯୁକ୍ତଦ୍ୱୟ ହେଲେ ଅନୁ ମିଶ୍ର ଓ ସାଥୀ ଓମ୍କାର ଯାଦବ। ସେମାନଙ୍କ ନିକଟରୁ ଗୋଟିଏ କାର ଓ ୭ଟି ମାରଣାସ୍ତ୍ର ଜବତ କରିଛି।
ଅଭିଯୋଗ ଅନୁଯାୟୀ ଶୈଳଶ୍ରୀବିହାର ଅଞ୍ଚଳରେ ସରକାରୀ ଜାଗାରେ କିଛି ଲୋକ ଦୋକାନ ଦେଇଥିଲେ। ହେଲେ ଅଭିଯୁକ୍ତା ମହିଳା ନିଜକୁ ବିଏମ୍ସି ଅଧିକାରୀ ବୋଲି ପରିଚୟ ଦେଇ ଉଠାଦୋକାନୀଙ୍କୁ ହଇରାଣ କରିବା ସହ ସେଗୁଡିକୁ ନିଜ ଅକ୍ତିଆରକୁ ନେଉଥିଲେ। ପରେ ଉକ୍ତ ଜାଗାକୁ ଅନ୍ୟ କିଛି ଲୋକଙ୍କୁ ଦେଇ ସେମାନଙ୍କଠାରୁ ମାସିକ ଭଡ଼ା ଆଦାୟ କରୁଥିଲେ। ଏନେଇ ସ୍ଥାନୀୟ ବିଏମ୍ସି କାର୍ଯ୍ୟାଳୟରେ ଅଭିଯୋଗ ଦିଆଯିବାରୁ ଉକ୍ତ ମହିଳାଙ୍କ ନାମରେ ଚନ୍ଦ୍ରଶେଖରପୁର ଥାନାରେ ମାମଲା ରୁଜୁ ହୋଇଥିଲା। ମାମଲାର କିଛିଦିନ ବ୍ୟବଧାନ ପରେ ଅଭିଯୁକ୍ତ ମହିଳା କିଛି ଅଣ ଓଡ଼ିଆ ଯୁବକଙ୍କୁ ସାଙ୍ଗରେ ଆଣି ପୁଣିଥରେ ଉଠାଦୋକାନୀ ଓ ବ୍ୟବସାୟୀମାନଙ୍କ ଠାରୁ ୫୦୦ରୁ ୨ ହଜାର ଟଙ୍କା ଆଦାୟ କରୁଥିଲେ। ଏପରିକି ଉଠା ଦୋକାନୀଙ୍କୁ ଭେଣ୍ଡିଂ ଜୋନ ଦୋକାନ କରାଇଦେବେ ବୋଲି ପ୍ରତିଶ୍ରୁତି ଦେଉଥିଲେ। ଏନେଇ ସ୍ଥାନୀୟ ଅଞ୍ଚଳର ଦିଲ୍ଲୀପ ସାହୁ ନାମକ ଜଣେ ଭିନ୍ନକ୍ଷମ ବ୍ୟକ୍ତି ଅଭିଯୁକ୍ତ ମହିଳାଙ୍କ ପରିଚୟ ଜାଣିବାପାଇଁ ଚେଷ୍ଟା କରିଥିଲେ। ହେଲେ ମହିଳା ଜଣଙ୍କ ତାଙ୍କୁ ଓଲଟି ଗାଳିଗୁଳଜ କରିବା ସହ ଆକ୍ରମଣ ପାଇଁ ତାଙ୍କ ସହଯୋଗୀଙ୍କୁ କହିଥିଲେ। ମହିଳାଙ୍କ କଥାରେ ସହଯୋଗୀ କାର୍ରୁ ଏକ ଧାରୁଆ ଭୁଜାଲି ବାହାର କରି ଭିନ୍ନକ୍ଷମ ବ୍ୟକ୍ତିଙ୍କୁ ଆକ୍ରମଣ କରିଥିଲେ । ଫଳରେ ସ୍ଥାନୀୟ ଲୋକେ ମିଳିତ ହୋଇ ଯୁବକ ଓ ମହିଳା ଜଣଙ୍କୁ କାବୁକରି ପୋଲିସ ଜିମାଦେଇଥିଲେ।