ଭୁବନେଶ୍ୱର,୧୮ା୧୧(ବ୍ୟୁରୋ): ଲୋକଙ୍କୁ ଜରୁରିକାଳୀନ ଆମ୍ବୁଲାନ୍ସ ଓ ସ୍ବାସ୍ଥ୍ୟସେବା ଯୋଗାଇବା ପାଇଁ ସରକାରଙ୍କ ୨୪ଘଣ୍ଟିଆ ମାଗଣା ୧୦୮ ଓ ୧୦୪ କଲ୍ ସୁବିଧା ରହିଛି। ହେଲେ କେତେଜଣ ଅସାମାଜିକ ବ୍ୟକ୍ତି ସରକାରଙ୍କ ଏହି ମାଗଣା ସେବାର ଫାଇଦା ଉଠାଇ ବିନା କାରଣରେ ୧୦୮ ଓ ୧୦୪କୁ ଫେକ୍ କଲ୍ କରୁଥିବା ଅଭିଯୋଗ ହୋଇଛି। ଫଳରେ ଏହି ଫେକ୍ କଲ୍ ପାଇଁ ୧୦୮, ୧୦୪ କଲ୍ ସେଣ୍ଟର ପାଇଁ ସମସ୍ୟା ବଢ଼ାଇଛି। କଲ୍ ସେଣ୍ଟର କର୍ମଚାରୀଙ୍କୁ ଫେକ୍ କଲ୍ କରି ଅଯଥା ଗପିବା ସହ ଅଶ୍ଳୀଳ ଭାଷାରେ ଗାଳିଗୁଲଜ ଦେଇ ସମୟ ନଷ୍ଟ କରୁଛନ୍ତି। ଏଥିଯୋଗୁ କର୍ମଚାରୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଅନ୍ୟପଟେ ଜରୁରୀ ସେବା ଆଶାରେ କଲ୍ କରୁଥିବା ବ୍ୟକ୍ତି ଯୋଗାଯୋଗ କରି ଲାଇନ୍ ରହିବାରେ ଜରୁରୀ ସେବା ପ୍ରଦାନରେ ବ୍ୟାଘାତ ସୃଷ୍ଟି ହେଉଛି। ଅନେକ ଲୋକ ଜରୁରୀ କଲ୍ କ୍ୟୁରେ ରହି ଜରୁରୀ ସେବା ପାଇବାରେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି। ଫେକ୍ କଲ୍ କରି କିଏ ପ୍ରେମ ନିବେଦନ କରୁଛି ତ କିଏ ବିଦେଶ ବୁଲିିବା ପାଇଁ ଟିକେଟର ଦର ପଚାରୁଛି। ଆଉ କିଏ ଫାଙ୍କା ଥିବା ମ୍ୟାଡାମକୁ କଲ ଟ୍ରାନ୍ସଫର କରିବାକୁ କହୁଛି। ଏହାଦ୍ୱାରା ସେଠାରେ କାର୍ଯ୍ୟାରତ ଯୁବତୀଯୁବକ ମାନସିକ ଭାବେ ଭାଙ୍ଗି ପଡ଼ୁଥିବା ବେଳେ ଏଥିପ୍ରତି ପୋଲିସ ଆଖିଦୃଶିଆ ପଦକ୍ଷେପ ନେବାକୁ ସଂସ୍ଥାର ମୁଖ୍ୟଙ୍କ ସମେତ କର୍ମଚାରୀ ଅନୁରୋଧ କରିଛନ୍ତି। ଫେକ୍ କଲ୍ କରୁଥିବା ସମ୍ପୃକ୍ତ ବ୍ୟକ୍ତିଙ୍କୁ ଚିହ୍ନଟ କରି କାର୍ଯ୍ୟାନୁଷ୍ଠାନ ନେବାକୁ ସେମାନେ ଦାବି କରିଛନ୍ତି। ଫଳରେ ଅନ୍ୟମାନେ ମଧ୍ୟ ସତର୍କ ଓ ସଚେତନ ହେବେ। ଏ ନେଇ କଲ୍ ସଂସ୍ଥାର ମୁଖ୍ୟ କହିଛନ୍ତି, ପ୍ରତିଦିନ ୧୦୮ ନମ୍ବରକୁ ମୋଟ ୧୦ ହଜାରରୁ ଅଧିକ କଲ୍ ଆସୁଛି। ସେଥିମଧ୍ୟରୁ କେବଳ ୭ ଶହ ଫେକ୍ କଲ୍ ଆସୁଛି, ଯାହାକି ଜରୁରୀ ସେବା ଚାହୁଁଥିବା ଲୋକ କଲ କରି ଲାଇନରେ ଅପେକ୍ଷା କରି ରହିବାରୁ ରୋଗୀଙ୍କୁ ଜରୁରୀ ଚିକିତ୍ସାରେ ସମସ୍ୟା ସୃଷ୍ଟି ହେଉଛି। ଅନେକ ଛୋଟ ପିଲା ମଧ୍ୟ ଏହି ନମ୍ବରକୁ କଲ କରୁଥିବାରୁ ଅଭିଭାବକମାନେ ଏଥିପ୍ରତି ଗୁରୁତ୍ୱ ଦେବାକୁ ଅନୁରୋଧ କରିଛନ୍ତି। ଏପରି ବିକୃତ ମାନସିକତାର ଲୋକେ ଏପରି କାର୍ଯ୍ୟାରୁ ନିବୃତ୍ତ ରୁହନ୍ତୁ। ନଚେତ୍ ଜରୁରିକାଳୀନ ସେବା ପ୍ରଦାନରେ ଅନାବଶ୍ୟକ ଭାବେ ସମସ୍ୟା ସୃଷ୍ଟି ହେଉଛି।