ନୟାଗଡ଼ ଅଫିସ,୧୩।୪: ଡାକସେବକ ପଦବୀ ପାଇଁ ନକଲି ସାର୍ଟିଫିକେଟ ଦେଇ ପୋଷ୍ଟାଲ ଡିଭିଜନରେ ଚାକିରି କରିବା ଖବର ରାଜ୍ୟରେ ଝଡ଼ ସୃଷ୍ଟି କରିଛି। ଏଭଳିସ୍ଥଳେ ନୟାଗଡ଼ ପୋଷ୍ଟାଲ ଡିଭିଜନରେ ୧୪ ଡାକସେବକ ଆବେଦନକାରୀ ସନ୍ଦେହ ଘେରକୁ ଆସିବା ପରେ ଜାଲ ସାର୍ଟିଫିକେଟ ର଼୍ୟାକେଟର ଚେର ମଧ୍ୟ ଜିଲାକୁ ଲମ୍ବିଥିବା ଜଣାପଡିଛି। ଉତ୍ତରପ୍ରଦେଶ, ଝାଡଖଣ୍ଡର ସାର୍ଟିଫିକେଟରେ ଆବେଦନ ହୋଇଥିବା ପ୍ରାୟ ୧୪ ସାର୍ଟିଫିକେଟ ନକଲି ବୋଲି ସନ୍ଦେହ ପ୍ରକାଶ ପାଇଛି। ତେବେ ସମ୍ପୃକ୍ତ ଆବେଦନକାରୀ ଭେରିଫିକେଶନକୁ ନ ଆସି ଚାଲିଯିବା ଘଟଣା ସନ୍ଦେହକୁ ଘନୀଭୂତ କରିଛି। ସେପଟେ ନୟାଗଡ଼ ପୋଷ୍ଟାଲ ଡିଭିଜନ ପକ୍ଷରୁ ସାର୍ଟିଫିକେଟ ଯାଞ୍ଚକୁ କଡ଼ାକଡ଼ି କରାଯାଇ ୯ ଜଣଙ୍କୁ ନୂତନ ନିଯୁକ୍ତି ଦିଆଗଲାଣି। ଅବଶିଷ୍ଟ ଆବେଦନକାରୀଙ୍କ ଭେରିଫିକେଶନ ଶେଷ ପରେ ପୁଣି ନିଯୁକ୍ତି ମିଳିବ ବୋଲି ଜଣାପଡିଛି।
ନୟାଗଡ଼ ଜିଲାରେ ୪୦ଟି ଡାକସେବକ ପଦବୀ ପାଇଁ ବିଜ୍ଞାପନ ପ୍ରକାଶ ପାଇଥିଲା। ଏଥିରେ ଉତ୍ତୀର୍ଣ୍ଣ ହୋଇଥିବା ଆବେଦନକାରୀଙ୍କ ମଧ୍ୟରୁ ୨୬ଜଣ ରିପୋଟିଂ କରାଯାଇଥିଲା। ସାର୍ଟିଫିକେଟ ଭେରିଫିକେଶନରେ ୫ଜଣଙ୍କର ସାର୍ଟିଫିକେଟ ଉପରେ ସନ୍ଦେହ ଉପୁଜି ଥିଲା। ଏଭଳିସ୍ଥଳେ ରାଜ୍ୟରେ ନକଲି ସାର୍ଟିଫିକେଟ କେଳେଙ୍କାରି ପଦାକୁ ଆସିଥିଲା। ପରବର୍ତ୍ତୀ ସମୟରେ ଏହା ୧୪ରେ ପହଞ୍ଚତ୍ଛି। ହେଲେ ସନ୍ଦେହ ଘେରରେ ଥିବା ଆବେଦନକାରୀ ଭେରିଫିକେଶନକୁ ଆସୁନାହାନ୍ତି। ଯେଉଁମାନଙ୍କର ୯୭ରୁ ୯୮ ପ୍ରତିଶତ ନମ୍ବର ରହିଥିଲା। ଏ ନେଇ ନୟାଗଡ଼ ପୋଷ୍ଟାଲ ଡିଭିଜନର ସୁପରିଣ୍ଟେଣ୍ଡେଣ୍ଟ ଖଗେଶ୍ୱର ମଲ୍ଲିକଙ୍କୁ ପଚାରିବାରେ ନୟାଗଡ଼ ଜିଲାରେ ୪୦ଟି ଡାକସେବକ ପଦବି ବାହାରିଥିଲା। ଏଥିରୁ ୨୬ଜଣ ଆବେଦନକାରୀ ସାର୍ଟିଫିକେଟ ଭେରିଫିକେଶନ ପାଇଁ ଆସିଥିଲେ। ଏଥିରୁ ୩ ଜଣଙ୍କର ବିଭିନ୍ନ କାରଣରୁ କଟି ଯାଇଥିଲା। ୨୩ ଜଣଙ୍କ ଭେରିଫିକେଶନ ହେବାର ପ୍ରକ୍ରିୟା ଆରମ୍ଭ ହୋଇଥିଲା। ହେଲେ ରାଜ୍ୟରେ ନକଲି ସାର୍ଟିଫିକେଟରେ ଚାକିରି ଘଟଣା ପ୍ରଚାରିତ ହେବା ପରେ ୫ଜଣ ଭେରିଫିକେଶନକୁ ଆସି ନ ଥିଲେ। ପରେ ଏମାନଙ୍କର ସଂଖ୍ୟା ବଢ଼ି ଯାଇଛି। ସେମାନଙ୍କର ଡିଟେଲ୍ କିଛି ନ ଥିବାରୁ କିଛି କରି ହେଲାନି। ବକେୟା ୧୪ ଟି ପଦବି ପାଇଁ ୨ୟ ଫେଜରେ ଯେଉଁମାନେ ମେରିଟରେ ଅଛନ୍ତି ସେମାନେ ପାଇବେ। ନକଲି ସାର୍ଟିଫିକେଟ ବାହାରିଲେ ତୁରନ୍ତ ଥାନାରେ ଏଫ୍ଆଇଆର ଦିଆଯିବ ବୋଲି ସେ କହିଛନ୍ତି।