ବାରିପଦା ଅଫିସ,୯।୫: ମୟୂରଭଞ୍ଜ ଜିଲା କପ୍ତିପଦା ବ୍ଲକ ମଝିଗଡିଆ ହାଇସ୍କୁଲର ଜଣେ ଶିକ୍ଷକ ଓ ତାଙ୍କ ସ୍ତ୍ରୀ ନକଲି ସାର୍ଟିଫିକେଟ ଦେଇ ଚାକିରି କରିଥିବା ଘଟଣାରେ ତଦନ୍ତ କରିବାକୁ ଜିଲା ଶିକ୍ଷା ଅଧିକାରୀ ନିର୍ଦ୍ଦେଶ ଦେଇଛନ୍ତି। ଉଭୟଙ୍କୁ ମାସକ ମଧ୍ୟରେ ସାର୍ଟିଫିକେଟ ଦାଖଲ କରି ତଦନ୍ତରେ ସହଯୋଗ କରିବାକୁ କୁହାଯାଇଛି।
ପ୍ରକାଶ, ଶିକ୍ଷକ ଜଣକ ୬ବର୍ଷ ଧରି ଚୁକ୍ତିଭିତ୍ତିକ ଶିକ୍ଷକତା କରିଥିଲେ । ସେ ଦେଇଥିବା ସାର୍ଟିଫିକେଟ ନକଲି ବୋଲି ସୂଚନା ଅଧିକାର ତଥ୍ୟରୁ ଜଣାପଡିଛି ।
ଏ ନେଇ ଅଭିଯୋଗ ହେବା ପରେ ଶିକ୍ଷକ ଜଣକ ଢ଼େଙ୍କାନାଳ ସ୍ଥିତ ଜଗନ୍ନାଥ କଲେଜରୁ ଯୁକ୍ତ ଦୁଇ ପାସ ସାର୍ଟିଫିକେଟ ପ୍ରଦାନ କରିଛନ୍ତି । ମାତ୍ର ଶିକ୍ଷକଙ୍କ ନାମ ଥିବା କୌଣସି ଛାତ୍ର କଲେଜରୁ ପାସ ହୋଇ ନ ଥିବା ଆରଟିଆଇ ତଥ୍ୟରୁ ଜଣାପଡିଛି । ସେହିପରି ତାଙ୍କ ସ୍ତ୍ରୀ ଉତ୍କଳ ବିଶବିଦ୍ୟାଳୟରୁ ସଂସ୍କୃତରେ ଏମଏ କରିଥିବା ସାର୍ଟିଫିକେଟ ପ୍ରଦାନ କରିଥିବା ବେଳେ ଆରଟିଆଇ ମାଧ୍ୟମରେ କୌଣସି ଛାତ୍ରୀ ନ ଥିବା ଜଣାପଡିଛି ।
ଘଟଣା ପ୍ରଘଟ ହେବା ପରେ ଜିଲା ଶିକ୍ଷାଧିକାରୀ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି । ତେବେ ଉକ୍ତ ଘଟଣାରେ ଶିକ୍ଷକଙ୍କ ଦରମା ଏକ ବର୍ଷ ପୂର୍ବରୁ ବନ୍ଦ ହୋଇ ଥିବା ବେଳେ ତାଙ୍କ ସ୍ତ୍ରୀଙ୍କ ଦରମା ଗତ ମାର୍ଚ୍ଚ ମାସରେ ବନ୍ଦ କରାଯାଇଛି ।
