ଗଞ୍ଜାମ,୩ା୧୧(ଡି.ଏନ୍.ଏ.): ସହରରେ ନକଲି ସାମଗ୍ରୀ ବିକ୍ରି ଘଟଣା ନୂଆ ନୁହେଁ। ଏହା ପୂର୍ବରୁ ନକଲି ମଦ, ଗୁଟ୍ଖା, ଟମାଟୋ ସସ୍ ଆଦି ଧରା ପଡ଼ିଥିବା ବେଳେ ଏବେ ଆଉ ଏକ ନକଲି ସାମଗ୍ରୀ ବିକ୍ରିକୁ ଧରିଛି ଗଞ୍ଜାମ ପୋଲିସ।
କୌଣସି ସୂତ୍ରରୁ ଗଞ୍ଜାମ ପୋଲିସ ଖବର ପାଇ ଆଇଆଇସି ସନ୍ତୋଷ କୁମାର ବେହେରାଙ୍କ ନେତୃତ୍ୱରେ ଏସ୍ଆଇ ଅଜିତ ପରିଡ଼ା, ନାରାୟଣ କହଁର, ମହିଳା ଏସ୍ଆଇ ସୁପ୍ରଭା ସାହୁ ପ୍ରମୁଖ ପୁଇଁତୋଳାଠାରୁ ଲକ୍ଷ୍ମୀପୁର ପର୍ଯ୍ୟନ୍ତ ୧୬ ନଂ ଜାତୀୟ ରାଜପଥ ପାର୍ଶ୍ୱରେ ଥିବା ଚା’ ପାନ ଦୋକାନ ଉପରେ ଚଢ଼ାଉ କରାଯାଇଥିଲା। ନକଲି ଇଞ୍ଜିନ ଅଏଲ ଭର୍ତ୍ତି ୫୦ରୁ ଊର୍ଦ୍ଧ୍ୱ ବାଲ୍ଟି ଜବତ କରାଯାଇଥିବା ବେଳେ ୫ ଦୋକାନୀଙ୍କୁ ଥାନାରେ ଅଟକ ରଖି ସେମାନଙ୍କ ନାମରେ କେସ୍ ନଂ ୨୦୪/୨୨ ମାମଲା ରୁଜୁ କରାଯାଇଥିବା ଆଇଆଇସି ସନ୍ତୋଷ କୁମାର ବେହେରା ଗଣମାଧ୍ୟମକୁ ସୂଚନା ଦେଇଛନ୍ତି। ଏହି ନକଲି ଇଞ୍ଜିନ ଅଏଲ ଚେର ବ୍ରହ୍ମପୁରରେ ହୋଇଥିବା ପୋଲିସ ଆଶଙ୍କା କରୁଛି। ଅଧିକ ତଦନ୍ତ ପରେ ପ୍ରକୃତ ତଥ୍ୟ ପଦାକୁ ଆସିବ ବୋଲି ଗଞ୍ଜାମ ପୋଲିସ ପକ୍ଷରୁ କୁହାଯାଇଛି। ଅନ୍ୟପଟେ ଏହା ନକଲି କି ଅସଲି ଦୋକାନ ମାଲିକମାନେ ଜାଣି ନ ଥିବା କହିଛନ୍ତି।
ପ୍ରକାଶ ଯୋଗ୍ୟ, ଉକ୍ତ ନକଲି ଇଞ୍ଜିନ ଅଏଲ ଟ୍ରକ୍ କିମ୍ବା ବସ୍ରେ ପକାଇବା ପରେ କିଛି ଗାଡ଼ିି ଖରାପ ହୋଇଯାଇଥିଲା l ଫଳରେ ଏନେଇ ଗାଡ଼ିମାଲିକମାନେ ଟାଟା ଇଞ୍ଜିନ ଅଏଲ ଡିପୋରେ ପହଞ୍ଚି ଅଭିଯୋଗ କରିଥିଲେ। ଅଭିଯୋଗ ପରେ ପ୍ରକୃତ ଇଞ୍ଜିନ ଅଏଲ ଡିପୋ ଘଟଣାର ଖୋଳତାଡ଼ ଆରମ୍ଭ କରିଥିଲା। କେଉଁ ସ୍ଥାନରେ ଏହି ନକଲି ଜିନିଷ ବିକ୍ରି ହେଉଛି ଗାଡ଼ି ଡ୍ରାଇଭରମାନେ ଚି଼ହ୍ନଟ କରିବା ପରେ ପ୍ରକୃତ ଘଟଣା ଜଣାପଡ଼ିଥିଲା।