ନୂଆଦିଲ୍ଲୀ,୨୧।୧୨ : ମିଥ୍ୟା ଖବର ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରି କେନ୍ଦ୍ର ସରକାର ୟୁଟ୍ୟୁବକୁ ତିନୋଟି ଚ୍ୟାନେଲ ଉପରେ ପ୍ରତିବନ୍ଧକ ଲଗାଇବାକୁ କହିଛନ୍ତି। ସୂତ୍ରରୁ ମିଳିଥିବା ସୂଚନା ଅନୁଯାୟୀ, ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ୟୁଟ୍ୟୁବକୁ ଏହାର ଚ୍ୟାନେଲରୁ ତିନୋଟି ଚ୍ୟାନେଲ ଆଜତକ ଲାଇଭ, ନ୍ୟୁଜ ହେଡଲାଇନ୍ସ ଏବଂ ସରକାରୀ ଅପଡେଟ ଅପସାରଣ କରିବାକୁ ନିର୍ଦ୍ଦେଶ ଦେଇଛି। ମିଥ୍ୟା ଖବର ପ୍ରସାର ପାଇଁ ପିଆଇବି ଫ୍ୟାକ୍ଟ ଚେକ ୟୁନିଟ ଏହି ୟୁଟ୍ୟୁବ ଚ୍ୟାନେଲଗୁଡ଼ିକୁ ଦାୟୀ କରିଛି।
ଚଳିତ ବର୍ଷ ସେପ୍ଟେମ୍ବରରେ, ୧୦ ଟି ୟୁଟ୍ୟୁବ ଚ୍ୟାନେଲକୁ ବିଷୟବସ୍ତୁ ଅଦଳବଦଳ ଏବଂ ଧାର୍ମିକ ସମ୍ପ୍ରଦାୟ ବିରୁଦ୍ଧରେ ଘୃଣା ବ୍ୟାପିବା ପାଇଁ ମିଥ୍ୟା ଖବର ପ୍ରସାରଣ ପାଇଁ ପ୍ରତିବନ୍ଧକ ଲଗାଯାଇଥିଲା। ଗୁପ୍ତଚର ଏଜେନ୍ସିରୁ ପ୍ରାପ୍ତ ଇନପୁଟ ଉପରେ ଆଧାର କରି ୧୦ ଟି ୟୁଟ୍ୟୁବ ଚ୍ୟାନେଲରୁ ୪୫ଟି ଭିଡିଓ ବ୍ଲକ୍ କରାଯାଇଥିଲା। ନିଷିଦ୍ଧ ହୋଇଥିବା ଭିଡିଓଗୁଡିକରେ ସମୁଦାୟ ଏକ କୋଟି ୩୦ ଏକ୍ଷ ନିୟୁତ ଭ୍ୟୁ ଥିଲା। ସେଥିରେ ଦାବି କରାଯାଇଥିଲା ଯେ ସରକାର କେତେକ ସମ୍ପ୍ରଦାୟର ଧାର୍ମିକ ଅଧିକାର ଛଡ଼ାଇ ନେଇଛନ୍ତି।
ଏହାପୂର୍ବରୁ ସରକାର ସାମ୍ପ୍ରଦାୟିକ ସୌହାର୍ଦ୍ଦ୍ୟକୁ ଭଙ୍ଗ କରିବା ଅଭିଯୋଗ ଆଧାରରେ ୧୦୨ ୟୁଟ୍ୟୁବ ଚ୍ୟାନେଲ ଏବଂ ଫେସବୁକ ଆକାଉଣ୍ଟ ଉପରେ ପ୍ରତିବନ୍ଧକ ଲଗାଇଥିଲେ। ଏକ ଗଣମାଧ୍ୟମ ସମ୍ମିଳନୀରେ କେନ୍ଦ୍ର ମନ୍ତ୍ରୀ ଅନୁରାଗ ଠାକୁର ଏହି ସୂଚନା ଦେଇଛନ୍ତି।
