ସମ୍ବଲପୁର, ୯ା୧୧(ବ୍ୟୁରୋ): ସମ୍ବଲପୁରର ବୁର୍ଲାସ୍ଥିତ ଭିମ୍ସାରରେ ୪ଜଣ ଯୁବତୀଯୁବକଙ୍କୁ ଆଟେଣ୍ଡାଣ୍ଟ ପଦରେ ନିଯୁକ୍ତି ଦିଆଯାଇଛି। ଏଥିରେ ସ୍ବାସ୍ଥ୍ୟ ବିଭାଗ ସଚିବଙ୍କ ସ୍ବାକ୍ଷର ସହ ଓଡ଼ିିଶା ସରକାରଙ୍କ ଲୋଗୋ ରହିଛି। ନିଯୁକ୍ତି ପାଇଥିବା ଜଣେ ଯୁବକ ଭିମ୍ସାର କର୍ତ୍ତୃପକ୍ଷଙ୍କ ସହ ଯୋଗାଯୋଗ କରିବା ପରେ ଏହା ନକଲି ବୋଲି ଜାଣିବାକୁ ପାଇଥିଲେ। ଏହି ପତ୍ର ଏବେ ସାମାଜିକ ଗଣ ମାଧ୍ୟମରେ ଭାଇରାଲ ହେବାରେ ଲାଗିଛି। ଚାକିରି ଦେବାକୁ କହି ଟଙ୍କା ଅସୁଲି କରୁଥିବା ଏକ ଠକ ଗୋଷ୍ଠୀ ଏଥିରେ ସମ୍ପୃକ୍ତ ଥିବା କୁହାଯାଉଛି। ଏହାଦ୍ୱାରା ଭିମ୍ସାରର ଛବି ଖରାପ ହେଉଛି। ଅନେକ ବେକାର ଯୁବତୀଯୁବକ ଚାକିରି ପାଇବା ଆଶାରେ ଠକେଇର ଶିକାର ହେଉଛନ୍ତି। ତେଣୁ ପ୍ରଶାସନ ଘଟଣାକୁ ଗୁରୁତର ସହ ନେଇ ତଦନ୍ତ ପୂର୍ବକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି।
ଭାଇରାଲ ହୋଇଥିବା ଚିଠିରେ ପରିବାର କଲ୍ୟାଣ ବିଭାଗ ଓଡ଼ିଶା ସରକାର ପକ୍ଷରୁ ଚିଠି କରାଯାଇଛି। ନିଯୁକ୍ତିପତ୍ରରେ ବୀରକିଶୋର ପରିଡା, ବର୍ଷାରାଣୀ ବିଭାର, ସ୍ନେହା ଡାଙ୍ଗୁଆ, ସୁଶୀଲ ଗୌଣ୍ଡଙ୍କ ନାମ ଉଲ୍ଲେଖ ରହିଛି। ଠିକଣା ନ ଥିବାରୁ ଉକ୍ତ ଯୁବତୀଯୁବକଙ୍କ ସହ ଯୋଗାଯୋଗ ହୋଇପାରି ନାହିଁ। ହେଲେ ବୁର୍ଲାରେ ଏକ ର଼୍ୟାକେଟ କାମ କରୁଛି। ସେମାନେ ସ୍ଥାନୀୟ ତଥା ଜିଲାର ବିଭିନ୍ନ ସ୍ଥାନରୁ ଯୁବତୀଯୁବକଙ୍କୁ ଚାକିରି କରାଇଦେବା ନାମରେ ଟଙ୍କା ଲୁଟୁଛନ୍ତି। ଏହି ଘଟଣାରେ ସେମାନେ ଜଣ ପିଛା ୪୦ ହଜାର ଟଙ୍କା ନେଇଥିବା ଅଭିଯୋଗ ହୋଇଛି। ବିଶ୍ୱାସ ଜିଣିବା ପାଇଁ ଉକ୍ତ ଚିଠିରେ ଭିମ୍ସାର ନିର୍ଦ୍ଦେଶକ, ଅଧ୍ୟକ୍ଷ, ଅଧୀକ୍ଷକ, ଡିନ୍ଙ୍କ ପାଖକୁ ପତ୍ର ଦିଆଯାଇଥିବା ଉଲ୍ଲେଖ ରହିଛି। ଏ ସମ୍ପର୍କରେ ଭିମ୍ସାର ଅଧୀକ୍ଷକ ପ୍ରଫେସର ଲାଲମୋହନ ନାଏକ କହିଛନ୍ତି, କିଛିଦିନ ପୂର୍ବରୁ ମୋ ପାଖକୁ ଏଭଳି ଖବର ଆସିଥିଲା। ହେଲେ କେହି ଅଭିଯୋଗ କରି ନାହାନ୍ତି। ଏବେ କୌଣସି ଚାକିରି ଦିଆଯାଉ ନାହିଁ। ସ୍ବାସ୍ଥ୍ୟ ବିଭାଗ ପକ୍ଷରୁ ଆମ ପାଖକୁ କୌଣସି ଚିଠି ଆସି ନାହିଁ। ଏହା ଏକ ଠକ ଗ୍ରୁପ୍ର କାମ। ଚାକିରି ଦେବା ନାମରେ ଠକେଇ କରୁଛନ୍ତି। ଭିମ୍ସାରରେ ଆଉଟସୋର୍ସିଂ ମାଧ୍ୟମରେ କେତେକ ନିଯୁକ୍ତି ଦିଆଯାଇଥିଲା। ତାହା ମଧ୍ୟ ଏବେ ବନ୍ଦ ଅଛି। ନିଯୁକ୍ତି ଦେବା ପାଇଁ ଭିମ୍ସାରର ସ୍ବତନ୍ତ୍ର କ୍ଷମତା ରହିଛି। ହେଲେ କୌଣସି ପଦ ପାଇଁ ବିଜ୍ଞପ୍ତି ପ୍ରକାଶ ପାଇ ନାହିଁ, ନିଯୁକ୍ତି କେମିତି ହେବ। ତେଣୁ ଯୁବତୀଯୁବକ ଓ ଅଭିଭାବକଙ୍କୁ ଅନୁରୋଧ, ଏଭଳି ପ୍ରଲୋଭନରେ କେହି ପଡନ୍ତୁ ନାହିଁ। ସ୍ବତନ୍ତ୍ର ନୀତିନିୟମ ଓ ପ୍ରକ୍ରିୟାରେ ନିଯୁକ୍ତି ହୋଇଥାଏ। ସରକାର କିମ୍ବା ଭିମ୍ସାର ପକ୍ଷରୁ ପ୍ରକାଶ ପାଉଥିବା ବିଜ୍ଞାପନ ଉପରେ କେବଳ ଭରସା କରନ୍ତୁ ବୋଲି ଅଧୀକ୍ଷକ ନାଏକ କହିଥିଲେ।