ଭୁବନେଶ୍ୱର, ୨୪।୯ (ବ୍ୟୁରୋ):ନିଜକୁ ସେଲ୍ସ ଟ୍ୟାକ୍ସ ବିଭାଗର ଜଣେ ବରିଷ୍ଠ ଅଧିକାରୀ ବୋଲି ପରିଚୟ ଦେଉଥିଲେ। ଅଭିଯୁକ୍ତ ଜଣଙ୍କ ନିଜେ ଜଣେ ଆୟକର ବିଭାଗର ପୂର୍ବତନ ଅଫିସର ହୋଇଥିବାରୁ ବ୍ୟବସାୟୀଙ୍କ ଦୋଷ ଦୁର୍ବଳତା ବେଶ୍ ଜାଣିଥିଲେ। ଏହାର ଫାଇଦା ଉଠାଇ ଲୋକଙ୍କ ଠାରୁଟଙ୍କା ନେଉଥିବା ଜଣେ ବ୍ୟକ୍ତିଙ୍କୁ ମାଲଗୋଦାମ ଥାନା ପୋଲିସ ଗିରଫ କରିଛି। ନକଲି ପରିଚୟ ଦର୍ଶାଇ ଟଙ୍କା ଆଦାୟ କରିବା ଏହି ବ୍ୟକ୍ତିଙ୍କ ପାଇଁ ମହଙ୍ଗା ପଡ଼ିଛି। ଗିରଫ ଅଭିଯୁକ୍ତ ଜଣଙ୍କ ହେଲେ ଜଗତସିଂହପୁର ଜିଲା ବିରିଡ଼ିି ଥାନା ଅନ୍ତର୍ଗତ ହଳଦୀପଦାର ଉମାକାନ୍ତ ରାଉତ (୫୯)। ତାଙ୍କ ବିରୋଧରେ କେସ୍ ନଂ. ୧୮୩/୨୦, ଆଇପିସି ଧାରା ୪୧୯, ୩୮୭, ୨୯୪, ୫୦୬ ରୁଜୁ କରାଯାଇ ତାଙ୍କୁ କୋର୍ଟ ଚାଲାଣ କରାଯାଇଛି ବୋଲି ଡିସିପି ପ୍ରତୀକ ସିଂ କହିଛନ୍ତି। ପୋଲିସଠାରୁ ମିଳିଥିବା ସୂଚନା ମୁତାବକ, ଗତ ରବିବାର ପୂର୍ବାହ୍ନ ପ୍ରାୟ ସାଢେ ୧୧ଟାରେ ଆଶିଷ କୁମାର ସାହୁ ନାମକ ଜଣେ ପ୍ରତିଷ୍ଠିତ ବ୍ୟବସାୟୀଙ୍କ ନିକଟକୁ ଏକ ଫୋନ କଲ୍ ଆସିଥିଲା। ତୁମର ଲକ୍ଷାଧିକ ଟଙ୍କା ଟ୍ୟାକ୍ସ ବକେୟା ରହିଛି। ଟ୍ୟାକ୍ସ ନ ଦେଲେ ଠକେଇ ଅଭିଯୋଗରେ ତୁମକୁ ଗିରଫ କରାଯିବ ବୋଲି ଅଭିଯୁକ୍ତ ଉମାକାନ୍ତ କହିଥିଲେ। ମୋତେ ଲକ୍ଷେ ଟଙ୍କା ଦିଅ। ନଚେତ୍ ସେଲ୍ସ ଟ୍ୟାକ୍ସ ବିଭାଗ ପକ୍ଷରୁ ଚଢାଉ କରାଯିବ ବୋଲି କହିଥିଲେ। ଏ ନେଇ ଆଶିଷ ମାଲଗୋଦାମ ଥାନାରେ ଅଭିଯୋଗ କରିବା ପରେ ପୋଲିସ ତଦନ୍ତ ଆରମ୍ଭ କରିଥିଲା। ଉମାକାନ୍ତ ପୂର୍ବରୁ ଏଭଳି ଅନେକ ଘଟଣାରେ ସମ୍ପୃକ୍ତ ଅଛନ୍ତି। ଚାକିରି ଛାଡ଼ିବା ପରେ ଏଭଳି ଅସାଧୁ ଉପାୟରେ ସେ ଅର୍ଥ ରୋଜଗାର କରୁଥିଲେ ବୋଲି ପୋଲିସ କହିଛି।