ରାଉରକେଲା ଅଫିସ,୧୮ା୧୧:ଷ୍ଟିଲସିଟି ରାଉରକେଲାରେ ବହୁ ଦିନ ଧରି ନକଲି ସସ୍ କାରବାର କରୁଥିବା କେତେଜଣ ବ୍ୟବସାୟୀଙ୍କ ଉପରେ ରାଉରକେଲା ମହାନଗର ନିଗମ (ଆର୍ଏମ୍ସି)ର ସ୍ବାସ୍ଥ୍ୟ ବିଭାଗ ପକ୍ଷରୁ ଗୁରୁବାର ଚଢ଼ାଉ କରାଯାଇଛି। ଏହି ଚଢାଉ ସମୟରେ ରାଉରକେଲା ପ୍ଲାଣ୍ଟସାଇଟ୍ ଥାନା ଅନ୍ତର୍ଗତ ମଧୁସୂଦନପାଲ୍ଲୀ ଅଞ୍ଚଳରେ ନକଲି ସସ୍ ଫ୍ୟାକ୍ଟ୍ରିକୁ ସ୍ବାସ୍ଥ୍ୟ ବିଭାଗ ଠାବ କରିଛି। ଏହି ନକଲି ସସ୍ ଫ୍ୟାକ୍ଟ୍ରି ବିନା ଲାଇସେନ୍ସରେ ଚାଲିଥିଲା। ଏଠାରେ ତିଆରି ହେଉଥିବା ସମସ୍ତ ପ୍ରକାର ସସ୍ ଅତି ନିମ୍ନମାନର। ଫଳରେ ବିଭାଗୀୟ ଅଧିକାରୀ ଉକ୍ତ ସସ୍ ଫ୍ୟାକ୍ଟ୍ରିକୁ ଅତିରିକ୍ତ ମାଜିଷ୍ଟ୍ରେଟଙ୍କ ଉପସ୍ଥିତିରେ ସିଲ୍ କରିଛନ୍ତି। ସୂଚନାଯୋଗ୍ୟ, ମଧୁସୂଦନପାଲି ଅଞ୍ଚଳରେ ବଣ୍ଟୁ ସାହୁ ସପରିବାର ବାସ କରନ୍ତି। ସେ ଦୁର୍ଗାପୁର ପାହାଡ ତଳେ ଥିବା ଏକ ଅନାବାଦି ଜାଗାରେ ଆଜବେଷ୍ଟସ ପକାଇ ଏକ ସସ୍ ଫ୍ୟାକ୍ଟ୍ରି କରିଥିଲେ। ଏହି ସସ୍ ଫ୍ୟାକ୍ଟ୍ରିରେ ବଣ୍ଟୁ ପଚା ଟମାଟୋ, ଲାଉ, କଖାରୁ, ଆଳୁ ଭଳି ବିଭିନ୍ନ ଜିନିଷ ପକାଇ ସେଥିରେ କେମିକାଲ ଓ ରଙ୍ଗ ମିଶାଇ ସସ୍ ତିଆରି କରୁଥିଲେ। ଉକ୍ତ ସସ୍କୁ ବଣ୍ଟୁ ରାଉରକେଲା ବଜାରରେ ବୋତଲ ପିଛା ୩୦ ରୁ ୪୦ ଟଙ୍କା ଭିତରେ ବିଭିନ୍ନ ନାମୀଦାମୀ କମ୍ପାନୀର ଷ୍ଟିକର ମାରି ବିକ୍ରି କରୁଥିଲେ। ଏହି ବିଷୟରେ କୌଣସି ବିଶେଷ ସୂତ୍ରରୁ ଆର୍ଏମ୍ସିର ସ୍ବାସ୍ଥ୍ୟ ବିଭାଗ ଅଧିକାରୀ ଏସ୍.କେ. ପରିଡା ସୂଚନା ପାଇ ଘଟଣାସ୍ଥଳରେ ପହଞ୍ଚି ଚଢାଉ କରିଥିଲେ। ଏହି ଚଢାଉ ସମୟରେ ଉକ୍ତ ଫ୍ୟାକ୍ଟ୍ରିରୁ ନିମ୍ନମାନର ଅଢ଼େଇ କୁଇଣ୍ଟାଲ ସସ୍ ସହିତ ବିଭିନ୍ନ କମ୍ପାନୀର ଷ୍ଟିକରକୁ ଖାଦ୍ୟ ସୁରକ୍ଷା ଅଧିକାରୀ ଓ ସ୍ବାସ୍ଥ୍ୟ ବିଭାଗ ଅଧିକାରୀ ଜବତ କରିଥିଲେ। ପରେ ରାଉରକେଲା ଅତିରିକ୍ତ ମାଜିଷ୍ଟ୍ରେଟ ବବିତା ମୁର୍ମୁଙ୍କ ଉପସ୍ଥିତିରେ ଲାଇସେନ୍ସ ନ ଥିବା ନକଲି ଫ୍ୟାକ୍ଟ୍ରିକୁ ତାଲା ପକାଇ ସିଲ୍ କରିଥିଲେ। ଏଥିସହ ବିଭାଗୀୟ ଅଧିକାରୀମାନେ ଉକ୍ତ ଫ୍ୟାକ୍ଟ୍ରିରେ ତିଆରି ହୋଇଥିବା ନିମ୍ନମାନର କିଛି ସସ୍ର ନମୁନା ସଂଗ୍ରହ କରି ଭୁବନେଶ୍ୱରସ୍ଥିତ ଲ୍ୟାବକୁ ମଧ୍ୟ ପଠାଇଥିଲେ। ଏହି ଚଢ଼ାଉ ସମୟରେ ଆର୍ଏମ୍ସିର ଖାଦ୍ୟ ସୁରକ୍ଷା ଅଧିକାରୀ ସ୍ବାଗତିକା ବେହେରା, ମୋନାଲିସା ଟପ୍ପୋ, ଦିଶା ଦେଙ୍କ ସହ ଖାଦ୍ୟ ସୁରକ୍ଷା ଓ ସ୍ବାସ୍ଥ୍ୟ ବିଭାଗର ଅନ୍ୟ କର୍ମଚାରୀ ଉପସ୍ଥିତ ଥିଲେ। ହକି ବିଶ୍ୱକପ ପୂର୍ବରୁ ଖାଦ୍ୟ ସୁରକ୍ଷା ନିମନ୍ତେ ଏଭଳି ବିଭିନ୍ନ ସ୍ଥାନରେ ଚଢ଼ାଉ ଜାରି ରହିବ ବୋଲି ଖାଦ୍ୟ ସୁରକ୍ଷା ଅଧକାରୀ ସ୍ବାଗତିକା ବେହେରା ସୂଚନା ଦେଇଛନ୍ତି।