ହିଞ୍ଜିଳିକାଟୁ,୨୫।୭(ଦ୍ବିତୀକୃଷ୍ଣ ପଣ୍ଡା): ଆଖିର ରେଟିନାରେ ଛୋଟିଆ ଛିଦ୍ର ଥିବା କହି ତ୍ରୁଟିପୂର୍ଣ୍ଣ ଓ ଫେକ ଅସ୍ତ୍ରୋପଚାର କରିବା କାରଣରୁ ଦୃଷ୍ଟି ଶକ୍ତି ହରାଇଥିବା ଜଣେ ଆଇନଜୀବୀ ହିଞ୍ଜିଳି ଥାନାରେ ଅଭିଯୋଗ କରିଛନ୍ତି। ଅଭିଯୋଗକାରୀ ହେଲେ ଗଞ୍ଜାମ ଜିଲା ହିଞ୍ଜିଳିକାଟୁ ବାର ଆସୋସିଏଶନର ଆଇନଜୀବୀ ନିରଞ୍ଜନ ସାହୁ(୪୧)।
ହିଞ୍ଜିଳିକାଟୁ ନିକଟବର୍ତ୍ତୀ ଏକ ଚକ୍ଷୁ ଚିକିତ୍ସାଳୟରେ ତାଙ୍କୁ ଭୁଲ ତଥ୍ୟ ଦେଇ, ଟଙ୍କା ଶୋଷଣ ଓ ଲୋଭରେ ଭୁଲ ଓ ଫେକ ଅସ୍ତ୍ରୋପଚାର କରାଯାଇଥିବା ଓକିଲ ଜଣକ ଥାନାରେ ଅଭିଯୋଗ କରିଛନ୍ତି । ଏନେଇ ସେ ସାମାଜିକ ଗଣମାଧ୍ୟମରେ ମଧ୍ୟ ପୋଷ୍ଟ କରି ନ୍ୟାୟ ପ୍ରଦାନ ପାଇଁ ଦାବି କରିଛନ୍ତି।
ପ୍ରକାଶ ଯେ, ଆଇନଜୀବୀ ନିରଞ୍ଜନ ପ୍ରାୟ ୭ ମାସ ତଳେ ଦୃଷ୍ଟି ଶକ୍ତି ର ଉନ୍ନତି ପାଇଁ ଉକ୍ତ ଚିକିତ୍ସାଳୟକୁ ଯାଇଥିଲେ । ସେଠାରେ କାର୍ଯ୍ୟରତ ଜଣେ ମହିଳା ଡାକ୍ତର ଆଇନଜୀବୀ ନିରଞ୍ଜନଙ୍କ ଡାହାଣ ଆଖିର ରେଟିନାରେ ଏକ ଛିଦ୍ର ଥିବା ଓ ଏହାର ତୁରନ୍ତ ଅସ୍ତ୍ରୋପଚାର ପାଇଁ ପରାମର୍ଶ ଦେଇଥିଲେ । ମହିଳା ଡାକ୍ତରଙ୍କ ପରାମର୍ଶ କ୍ରମେ ନିରଞ୍ଜନ ଫେବୃଆରୀ ୧୭ ତାରିଖରେ ନଗଦ ୨୫ ହଜାର ଟଙ୍କା ଉକ୍ତ ଚିକିତ୍ସାଳୟରେ ଜମା କରି ଅସ୍ତ୍ରୋପଚାର କରାଇଲେ । ତେବେ ଅସ୍ତ୍ରୋପଚାର ପରେ ନିରଞ୍ଜନଙ୍କ ଦୃଷ୍ଟି ଶକ୍ତିରେ ଉନ୍ନତି ବଦଳରେ ଆଖିକୁ ଜମା ଦିଶିଲାନାହିଁ । ପରେ ଏଥିନେଇ ଆଇନଜୀବୀ ଜଣକ ଅନ୍ୟ ଜଣେ ଅଭିଜ୍ଞ ବରିଷ୍ଠ ଡାକ୍ତରଙ୍କ ପରାମର୍ଶ ନେଲେ, ଫଳରେ ସେ ଜାଣିବାକୁ ପାଇଥିଲେ ଯେ, ହିଞ୍ଜିଳିକାଟୁ ନିକଟସ୍ଥ ଚକ୍ଷୁ ଚିକିତ୍ସାଳୟ ଠାରେ କୌଣସି ଅସ୍ତ୍ରୋପଚାର କରାଯାଇନାହିଁ। ଚିକିତ୍ସାଳୟରେ ଫେକ ଅସ୍ତ୍ରୋପଚାର ନାମରେ ସେ ଲୁଟ ଓ ଠକାମିର ଶିକାର ହୋଇଛନ୍ତି। ଅନ୍ୟପକ୍ଷରେ ହିଞ୍ଜିଳି ଥାନାରେ ଆଇନଜୀବୀଙ୍କ ଅଭିଯୋଗ ପରେ ଥାନା ପକ୍ଷରୁ ଗଞ୍ଜାମ ସିଡିଏମଓଙ୍କୁ ଅବଗତ କରାଯାଇଛି । ସିଡିଏମଓଙ୍କ ତଦନ୍ତ ରିପୋର୍ଟ ପରେ ଆବଶ୍ୟକ ପଦକ୍ଷେପ ପୋଲିସ ଗ୍ରହଣ କରିବ ବୋଲି ଥାନାଧିକାରୀ ଅଭିମନ୍ୟୁ ଦାସ କହିଛନ୍ତି।
