ବ୍ରହ୍ମପୁର ଅଫିସ,୭ା୨: ବ୍ରହ୍ମପୁର ଉପକଣ୍ଠ ମୋହଡା ପଞ୍ଚାୟତ ବୁରଗଁାରୁ ରବିବାର ଠାବ ହୋଇଛି ଆଉ ଏକ ନକଲି ବିଦେଶୀ ମଦ ଫ୍ୟାକ୍ଟ୍ରି। ଜଙ୍ଗଲ ଭିତରେ ଥିବା ଏକ ପରିତ୍ୟକ୍ତ ଘରେ ଚାଲିଥିବା ଏହି ଫ୍ୟାକ୍ଟ୍ରିରେ ବ୍ରହ୍ମପୁର ଅବକାରୀ ଭ୍ରାମ୍ୟମାଣ ସଂସ୍ଥା ଚଢାଉ କରି ସେଠାରୁ ୧୦ ପେଟି ନକଲି ବିଦେଶୀ ମଦ ସହ ବିପୁଳ ପରିମାଣରେ କଞ୍ଚାମାଲ ଜବତ କରିଛି। ପ୍ରସ୍ତୁତକାରୀ ୨ଜଣ ଅନନ୍ତେଇ ଗ୍ରାମର ଟିଙ୍କନ ସେଠୀ(୨୩) ଓ ଚାଲାଣକାରୀ ବୁରଗାଁର ମୁନା ମଲିକ(୨୪)ଙ୍କୁ ଟିମ୍ ଗିରଫ କରିଛି।
ପ୍ରକାଶ ଯେ, ଏକ ପରିତ୍ୟକ୍ତ ଘରେ ଅନେକ ଦିନରୁ ନକଲି ବିଦେଶୀ ମଦ ପ୍ରସ୍ତୁତି ହେଉଥିବା ନେଇ କୌଣସି ସୂତ୍ରରୁ ଅବକାରୀ ଭ୍ରାମ୍ୟମାଣ ସଂସ୍ଥାକୁ ଖବର ମିଳିଥିଲା। ରବିବାର ଅବକାରୀ ଉପ ଅଧୀକ୍ଷକ ବିମ୍ବାଧର ପଣ୍ଡାଙ୍କ ତତ୍ତ୍ୱାବଧାନରେ ସେହି ଘରେ ଚଢାଉ କରାଯାଇଥିଲା। ଚଢାଉ ବେଳେ ସେହି ଘରୁ ବିଭିନ୍ନ ବ୍ରାଣ୍ଡର ୧୦ ପେଟି (୨୫୪ ବୋତଲ) ନକଲି ବିଦେଶୀ ମଦ, ୯୮୦ ଖାଲି ବୋତଲ, ୩୬୦୦ ଠିପି, ବିଭିନ୍ନ ବ୍ରାଣ୍ଡର ଲେବଲ୍, ୯ ଲିଟର(ଅର୍ଗାନିକ ଆଲବମ୍) ସ୍ପିରିଟ ଓ ରଙ୍ଗ ଜବତ କରାଯାଇଥିଲା। ଅଭିଯୁକ୍ତ ଟିଙ୍କନ ବାହାର ରାଜ୍ୟରୁ ବୋତଲ, ଠିପି, ରଙ୍ଗ ଓ ସ୍ପିରିଟ ଆଣି ଏଠାରେ ମଦ ପ୍ରସ୍ତୁତ କରିବା ପରେ ସେଗୁଡ଼ିକ ମୁନା ଗଞ୍ଜାମ ଜିଲାର ବ୍ରହ୍ମପୁର ସମେତ ଦିଗପହଣ୍ଡି, ଚିକିଟି, ବାଲିପଡା, ପୋଲସରା, ମହୁରୀକଳୁଆ ଓ ଅନନ୍ତେଇ ଆଦି ବିଭିନ୍ନ ସ୍ଥାନକୁ ବିକ୍ରି ପାଇଁ ପଠାଉଥିଲେ ବୋଲି ଜେରା ବେଳେ ଅବକାରୀ ଟିମ ଜାଣିବାକୁ ପାଇଥିଲେ। ଚଢ଼ାଉରେ ଅବକାରୀ ଇନ୍ସପେକ୍ଟର ଅର୍ଜୁନ ମଲିକ, ଏସ୍ଆଇ ଅଭିରାମ ସାହୁ, ଶେଖ ଇଦରିଶ ହୁସେନ ସମେତ ଅନ୍ୟ ଅଧିକାରୀ ସାମିଲ ଥିଲେ।