କେନ୍ଦୁଝର,୨୨ା୨(ସ୍ବ.ପ୍ର.): କେନ୍ଦୁଝର ଜିଲା ବାଂଶପାଳ ବ୍ଲକ ଅନ୍ତର୍ଗତ ବୈତରଣୀ ନଦୀର ଉତ୍ପତ୍ତିସ୍ଥଳ ଗୋନାସିକାକୁ ସଂଯୋଗ କରୁଥିବା ରାସ୍ତା ବିପଦସଙ୍କୁଳ ହୋଇରହିଛି। ଏହି ସ୍ଥାନକୁ ବହୁ ସଂଖ୍ୟାରେ ପର୍ଯ୍ୟଟକମାନେ ବର୍ଷ ତମାମ ଯାତ୍ରା କରୁଥିବାରୁ ଏହି ବିପଦପୂର୍ଣ୍ଣ ରାସ୍ତାର ସ୍ଥାୟୀ ଓ ସୁରକ୍ଷିତ କରିବାକୁ ଦାବି ହେଉଛି। ଏହି ରାସ୍ତାର କିଛି ଅଂଶ ଘାଟି ରାସ୍ତା ରହିଛି। ଏହି ଘାଟି ରାସ୍ତା ପାହାଡ଼ କାଟି କରାଯାଇଥିବାରୁ ଉଭୟ ପାର୍ଶ୍ୱରୁ ବିଶେଷକରି ବର୍ଷାଦିନରେ ଅତଡ଼ା ଖସେ। ଫଳରେ ଅସୁରକ୍ଷିତ ଅବସ୍ଥାରେ ଲୋକମାନେ ଯାତାୟାତ କରିଥାନ୍ତି। ରାସ୍ତାର ଉଭୟ ପାର୍ଶ୍ୱକୁ ସଠିକ୍ ଭାବରେ ପଥର ପ୍ୟାକିଂ କରାଯାଇ ନ ଥିବାରୁ ପଥର ଓ ମାଟି ଧସୁଛି। ଫଳରେ ବହୁ ସଂଖ୍ୟାରେ ବଡ଼ ବଡ଼ ଗଛ ଅସୁକ୍ଷିତ ଅବସ୍ଥାରେ ଛିଡ଼ା ହୋଇରହିଛି। ଗଛ ଉପୁଡ଼ି ପଡ଼ିଲେ ଯାତାୟାତ କରୁଥିବା ଲୋକଙ୍କ ଉପରେ ଖସିପଡ଼ି ବଡ଼ ଦୁର୍ଘଟଣା ଘଟିବା ଆଶଙ୍କା ରହିଥିଲେ ହେଁ ଏହା ଉପରେ କାହାରି ନଜର ନାହିଁ। ଉକ୍ତ ସ୍ଥାନକୁ ଅନେକ ସମୟରେ ବରିଷ୍ଠ ପ୍ରଶାସନିକ ଅଧିକାରୀ, ନେତା, ମନ୍ତ୍ରୀ, ଲୋକପ୍ରତିନିଧିମାନେ ଯାତାୟାତ କରୁଥିଲେ ହେଁ ଅଣଦେଖା କରୁଥିବାରୁ ବିପଦ ଆଶଙ୍କା ରହୁଛି ବୋଲି ସ୍ଥାନୀୟ ଅଞ୍ଚଳ ସାମାଜିକ କର୍ମୀ ବୀରବର ନାୟକ କହିଛନ୍ତି।
ଏଣୁ ସେସବୁର ସୁରକ୍ଷା କରା ନ ଗଲେ ରାସ୍ତାର ଉଭୟ ପାର୍ଶ୍ୱପାହାଡ଼ରୁ ପଥର, ମାଟି ଅତଡ଼ା ଏବଂ ଗଛ ଖସି ରାସ୍ତା ଅବରୋଧ କରିବା ସହ ଦୁର୍ଘଟଣା ଘଟି ଧନଜୀବନ ହାନି ଘଟିବା ସମ୍ଭାବନା ରହୁଥିବାରୁ ପଦକ୍ଷେପ ନେବାକୁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି ।