ଦିଗପହଣ୍ଡି,୫ା୬(ଡି.ଏନ.ଏ.): କରୋନାରେ ପ୍ରାଣ ହରାଇଥିବା କୋଭିଡ ଯୋଦ୍ଧା ତଥା ଦିଗପହଣ୍ଡି ବ୍ଳକ ଅଧୀନ ଭୀଷ୍ମଗିରୀ ଗ୍ରାମର ଅଙ୍ଗନୱାଡ଼ି କର୍ମୀ ଏମ୍ .ମାଙ୍ଗାମ ପାତ୍ରଙ୍କ ପରିବାରକୁ ଗତ ୫୦ ଲକ୍ଷ ଟଙ୍କାର ଆର୍ଥିକ ସହାୟତା ପ୍ରଦାନ କରାଯାଇଛି। ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ମିଳିଥିବା ଏହି ସହାୟତା ରାଶିକୁ ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ମାଙ୍ଗାମଙ୍କ ସ୍ବାମୀ ଲକ୍ଷ୍ମୀନାରାୟଣ ପାତ୍ରଙ୍କୁ ପ୍ରଦାନ କରିଛନ୍ତି।
୨୦୨୦ରେ କରୋନାର ପ୍ରକୋପ ବୃଦ୍ଧି ପାଉଥିବା ବେଳେ ଅଙ୍ଗନୱାଡ଼ି କର୍ମୀ ମାଙ୍ଗାମା ଲୋକଙ୍କୁ ସେବା ଯୋଗାଇବା ସହ ସଚେତନ କରାଇ ପ୍ରଶଂସାର ପାତ୍ର ପାଲଟିଥିଲେ। ସଙ୍ଗରୋଧ କେନ୍ଦ୍ରରେ କାମ ବେଳେ ସେ କରୋନାରେ ସଂକ୍ରମିତ ହୋଇ ସେହିବର୍ଷ ଅକ୍ଟୋବର ୧୦ ତାରିଖରେ ଆଖି ବୁଜିଥିଲେ। ଅଙ୍ଗନୱାଡ଼ି କର୍ମୀ ଜଣଙ୍କ ଜଣେ ନିଷ୍ଠାପର କର୍ମୀ ଭାବେ ୨୦ବର୍ଷ ଧରି ନିଃସ୍ବାର୍ଥପର ସେବା ଯୋଗାଇ ଗାଁ ସାରା ଲୋକପ୍ରିୟ ହୋଇପାରିଥିଲେ। ସେ ଜଣେ ଶାନ୍ତ ସ୍ବଭାବ, କର୍ମନିଷ୍ଠା, କର୍ତ୍ତବ୍ୟପରାୟଣ ତଥା ମିଷ୍ଠଭାଷି ଭାବେ ସମସ୍ତଙ୍କ ପରିଚିତ ଥିଲେ। ଜିଲାପାଳଙ୍କ ଆର୍ଥିକ ସହାୟତା ପ୍ରଦାନ ବେଳେ ଦିଗପହଣ୍ଡି ସମନ୍ବିତ ଶିଶୁ ବିକାଶ ପ୍ରକଳ୍ପ ଅଧିକାରୀ ପୁଷ୍ପାଞ୍ଜଳୀ ଶତପଥୀଙ୍କ ସମେତ ସ୍ବର୍ଗତା ମାଙ୍ଗାମାଙ୍କ ପରିବାର ସଦସ୍ୟ ଉପସ୍ଥିତ ଥିଲେ।