ଲକ୍ଷ୍ନୌ, ୨୧।୫ : ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ରାଜ୍ୟର ଲୋକଙ୍କ ସାମାଜିକ ତଥା ଅର୍ଥନୈତିକ ସ୍ଥିତିର ସଠିକ ମୂଲ୍ୟାଙ୍କନ ପାଇଁ ପରିବାର କାର୍ଡ ପ୍ରସ୍ତୁତ କରିବାକୁ ଯାଉଛନ୍ତି। ଏହି କାର୍ଡ ଆଧାର ସହିତ ଲିଙ୍କ ହେବ। ଗୋଟିଏ ପରିବାରର ଅତି କମରେ ଜଣଙ୍କୁ ରୋଜଗାର ଯୋଗାଇବା ଦିଗରେ ଏହି କାର୍ଡ ଏକ ବଡ ପଦକ୍ଷେପ ପ୍ରମାଣିତ ହେବ ବୋଲି ସରକାରଙ୍କ ପକ୍ଷରୁ କୁହାଯାଇଛି।
ପରିବାର କାର୍ଡ ନହେବା ପର୍ଯ୍ୟନ୍ତ ରାସନ କାର୍ଡକୁ ଆଧାର ଭାବରେ ବିବେଚନା କରାଯିବ। ଭାଜପା ସଙ୍କଳ୍ପ ପତ୍ରରେ ପରବର୍ତ୍ତୀ ପାଞ୍ଚ ବର୍ଷ ମଧ୍ୟରେ ଗୋଟିଏ ପରିବାରକୁ ଅତି କମରେ ଜଣଙ୍କୁ ଚାକିରି ଯୋଗାଇଦେବାକୁ ପ୍ରତିଶ୍ରୁତି ପ୍ରଦାନ କରାଯାଇଥିଲା। ଏବେ ଏହି ନିଷ୍ପତ୍ତି ନିଆଯାଇଛି। ଏଥିପାଇଁ ଯୋଗୀ ସରକାର ନିରନ୍ତର ପ୍ରୟାସ କରୁଛନ୍ତି।
ବିଭିନ୍ନ ଯୋଜନା ଏବଂ ଖାଲି ପଦବୀରେ ନିଯୁକ୍ତି ଦେଇ ସରକାର ଏହାକୁ ପୂରଣ କରିବାକୁ ଯୋଜନା ପ୍ରସ୍ତୁତ କରୁଛନ୍ତି। ଏଥିପାଇଁ ରାଜ୍ୟର ସମସ୍ତ ପରିବାରର ସାମାଜିକ ତଥା ନିଯୁକ୍ତି ସ୍ଥିତି ବିଷୟରେ ସରକାର ଜାଣିବା ଆବଶ୍ୟକ। ଯୋଗୀ ସରକାର ଏଥିପାଇଁ ଏକ ବଡ ପଦକ୍ଷେପ ନେବାକୁ ଯାଉଛନ୍ତି। ସରକାର ସମସ୍ତ ପରିବାରର କାର୍ଡ ତିଆରି କରିବାକୁ ଯାଉଛନ୍ତି। ପରିବାର ବିଷୟରେ ସମସ୍ତ ସୂଚନା ଏହି କାର୍ଡରେ ରେକର୍ଡ କରାଯିବ। ପରିବାରରେ କେତେଜଣ ସଦସ୍ୟ ଅଛନ୍ତି, ସେମାନଙ୍କର ବୟସ କେତେ, କିଏ ଚାକିରି କରେ କିମ୍ବା ଚାକିରୀ ସହିତ ଜଡିତ, ଏହି ସମସ୍ତ ତଥ୍ୟ ରେକର୍ଡଭୁକ୍ତ ହେବ। ପରିବାର କାର୍ଡ ଆଧାର ସହିତ ଲିଙ୍କ ହେବ।
ଏହି ଆଧାରରେ, ସରକାରଙ୍କ ପାଖରେ ସଠିକ ସୂଚନା ରହିବ କେଉଁ ପରିବାର ସଦସ୍ୟମାନେ ଚାକିରି କରି ନାହାନ୍ତି। ପରିବାରର ସାମାଜିକ ସ୍ଥିତି କ’ଣ? ଏହି ଆଧାରରେ ସରକାର ଏହାକୁ ବିଭିନ୍ନ ନିଯୁକ୍ତି ଯୋଜନା ସହିତ ଯୋଡି ନିଯୁକ୍ତି ଯୋଗାଇ ଦେବେ। ଯୋଗୀ ସରକାରଙ୍କ ଏହା ଏକ ବଡ ପଦକ୍ଷେପ ବୋଲି କୁହାଯାଉଛି।